ஷாபி விவகாரம்; பரிசோதனையில் பாதிப்பில்லை என கண்டறியப்பட்டது

குருநாகல் போதனா வைத்தியசாலையின் பிரசவ மற்றும் மகப்பேற்று பிரிவின் வைத்தியராகவிருந்த சேகு சிஹாப்தீன் மொஹம்மட் ஷாபி மீது, கருத்தடை விவகார முறைப்பாட்டை முன்வைத்த பெண் ஒருவருக்கு குளியாபிட்டிய போதனா வைத்தியசாலையில் முன்னெடுக்கப்பட்ட எச்.எஸ்.ஜி பரிசோதனைகளில் அவரது பெலோபியன் குழாயில் எந்த தடைகளும் தடங்கல்களும் இல்லை என்பது உறுதி செய்யப்பட்டுள்ளது.

நேற்று (25) இது தொடர்பான வழக்கு விசாரணை நீதிமன்றில் இடம்பெற்ற போது இந்த விடயம் வெளிப்படுத்தப்பட்டது.

சிங்கள தாய்மார்களுக்கு சட்ட விரோத கருத்தடைசெய்தார் என வைத்தியர் மொஹம்மட் ஷாபி மீது குற்றச்சாட்டுக்கள் முன்வைக்கப்பட்டுள்ள நிலையிலேயே, குருநாகல் நீதிமன்றின் உத்தரவில் குளியாபிட்டி போதனா வைத்திய சாலையில் முறைப்பாட்டாளரான பெண்ணுக்கு எச்.எஸ். ஜி பரிசோதனைகள் முன்னெடுக்கப்பட்டன.

குறித்த பெண்ணுக்கு வைத்தியர் ஷாபி எல்.ஆர்.டி சத்திர சிகிச்சையை, அப்பெண்ணின் அனுமதியின்றி செய்ததாக குற்றம் சுமத்தியிருந்த நிலையிலேயே, நீதிமன்ற உத்தரவில் இந்த எச்.எஸ்.ஜி. பரிசோதனை முன்னெடுக்கப்பட்டுள்ளது.

இது தொடர்பில் முன்னெடுக்கப்பட்ட பரிசோதனை குறித்து சி.ஐ.டி.யின் இந்த விவகாரத்தை தற்போது கையாளும் பிரதான பொலிஸ் பரிசோதகர் மொஹான் விஜேகோனும், அந்த பரிசோதனையின் முடிவை தாய்மார் சார்பில் மன்றில் ஆஜரான சட்டத்தரணி சானக அபேவிக்ரமவும் நீதிமன்றில் வெளிப்படுத்தினர்.

இதன்போது குளியாபிட்டி போதனா வைத்தியசாலையில் முன்னெடுக்கப்பட்ட எச்.எஸ்.ஜி. பரிசோதனைகளில் தமக்கு நம்பிக்கை இல்லை எனவும், குளியாப்பிட்டி வைத்தியசாலை தொடர்பிலேயே நம்பிக்கை இல்லாமல் போயுள்ளதாகவும் குறிப்பிட்ட சட்டத்தரணி சானக அபேவிக்ரம, இந்த பரிசோதனை முடிவு வைத்திய மாபியாவின் ஒரு அங்கம் என எண்ணத் தோன்றுவதாக கூறினார்.

விசாரணையின் நிலை குறித்து சமூக கொள்ளை விசாரணைன் அறையின் பிரதான பொலிஸ் பரிசோதகர் மொஹான் விஜேகோன் மன்றில் தெரிவிக்கையில், ‘இதுவரை வைத்தியர் ஷாபியுடன் ஒன்றாக பணியாற்றியதாக கூறப்படும் 57 வைத்தியர்கள், 62 தாதியர், 64 குடும்பநல சுகாதார உத்தியோகத்தர்களிடம் நாம் வாக்கு மூலம் பெற்றுள்ளோம்.

அவ்வாக்கு மூலங்கள் பதிவு செய்யப்பட்டபோது தெரிய வந்த சில விடயங்களை நான் கூற வேண்டும். முதலாவது, 20 தாதியர்கள், வைத்தியர் ஷாபியின் சத்திர சிகிச்சையின் போது வொஸ் டவல் எனும் துவாய் ஒன்றை பயன்படுத்தி கர்ப்பப் பையை துடைப்பதாக கூறியுள்ளனர்.

அத்துடன் 15 தாதியர்கள், ஷாபியின் சிசேரியனின் போது சிங்கள தாய்மாருக்கு ஒரு தையலும், முஸ்லிம் தாய்மாருக்கு இரு தையலும் போடுவதாக கூறியுள்ளனர்.

அத்துடன் சிங்கள தாய்மாருக்கு சிசேரியன் செய்யும் போது தேவையற்ற குழப்ப நிலையை வைத்தியர் ஷாபி ஏர்படுத்துவதாக வைத்தியர்கள் 4 பேர், 7 தாதியர்கள், 3 குடும்பநல சுகாதார உத்தியோகத்தர்கள் வாக்கு மூலமளித்துள்ளனர்.

முஸ்லிம் தாய்மாருக்கு சிசேரியன் செய்து குழந்தைகளை வெளியில் எடுக்கும் போது, மத அனுஷ்டானங்களை ஷாபி செய்வதாக 5 வைத்தியர்கள், 20 தாதியர்கள் 6 குடும்ப நல சுகாதார உத்தியோகத்தர்கள் தெரிவித்துள்ளனர்.

வைத்தியர் ஷாபி, ஏனையவர்களை விட வேகமாக சத்திர சிகிச்சை ஒன்றைச் செய்வதாக 29 வைத்தியர்கள், 40 தாதியர்கள், 30 குடும்ப நல சுகாதார உத்தியோகத்தர்கள் வாக்குமூலம் அளித்துள்ளனர்.

இந்நிலையில் இந்த விவகாரத்தில், நீதிமன்றினால் நியமிக்கப்பட்ட கொழும்பு பல்கலைக்கழக வைத்தியபீட பீடாதிபதியின் கீழான குழுவின் அவதானிப்புகளின் பிரகாரம், கர்ப்பப் பையை, அதன் சுவர்களை அழுத்தமாக துடைக்கும் போது அங்கு சிதைவுகள் ஏற்பட வாய்ப்புள்ளதாக கூறியுள்ளனர். அத்துடன் அந்த விசேட வைத்திய நிபுணர்கள், கருத்தடைச செய்யப்பட்டதா என்பதை உறுதி செய்ய லெத்தஸ்கொபி உள்ளிட்ட இரு பரிசோதனை முறைகளை பரிந்துரைத்துள்ளனர்.

அத்துடன் வைத்தியர் ஷாபி முன்னெடுத்த சிசேரியன் சத்திர சிகிச்சைகளையும், அதே காலப் பகுதியில் ஏனைய வைத்தியர்கள் முன்னெடுத்த சிசேரியன் சத்திர சிகிச்சைகளையும் ஒப்பு நோக்கி புள்ளி விபரியல் ரீதியிலான பகுப்பாய்ப்பு ஒன்றை முன்னெடுப்பதும் சிறந்தது என வைத்திய நிபுணர்கள் குழு தெரிவித்துள்ளது.

அத்துடன் வைத்தியர் ஷாபி முஸ்லிம் தாய்மாருக்கு முன்னெடுத்த சிசேரியன் சத்திர சிகிச்சைகள் குறித்த தகவல்களையும் நாம் ஆராய்வுள்ளோம்.’ – என கூறினார்.

இந்தநிலையில் வழக்கை எதிர்வரும் ஆகஸ்ட் 26ம் திகதிக்கு நீதிவான் ஒத்திவைத்தார்.

https://newuthayan.com/ஷாபி-விவகாரம்-பரிசோதனைய/