பங்களாதேஷில் பாலியல் துஷ்பிரயோகங்களில் ஈடுபடுபவர்களுக்கு மரண தண்டனை: புதிய சட்டத்துக்கு ஒப்புதல்!

பங்களாதேஷில் பாலியல் துஷ்பிரயோகங்களில் ஈடுபடுபவர்களுக்கு மரண தண்டனை விதிக்கும் சட்டமூலத்துக்கு அந்நாட்டின் அமைச்சரவை ஒப்புதல் அளித்துள்ளது.

அமைச்சர்கள் கூட்டத்தில், அமைச்சர்கள் ஒரு மனதாக ஒப்புதல் அளித்துள்ளனர். இதனிடையே பாலியல் துஷ்பிரயோக வழக்குகளை குறிப்பிட்ட நேரத்தில் விரைந்து முடிக்கும்படி பிரதமர் ஷேக் ஹசீனா வலியுறுத்தியதாக அமைச்சரவை செயலர் அன்வருல் இஸ்லாம் தெரிவித்தார்.

இது குறித்து அந்நாட்டின் சட்ட அமைச்சர் அனிஷுல் ஹூக் கூறுகையில், ‘இந்த சட்ட சட்டமூலத்துக்கு பங்களாதேஷ் அப்துல் ஹமித் ஒப்புதல் அளிப்பார். தற்போது கொவிட்-19 கால சூழ்நிலை காரணமாக நாடாளுமன்றம் கூட முடியாததால் அந்த சட்டமூலம் இன்று சட்டமாகிவிடும். இந்த சட்டமூலம் கண்டிப்பாக பல்வேறு குற்றங்களை கட்டுப்படுத்த உதவும்’ என கூறினார்.

பங்களாதேஷில் பெண்னொருவர் கும்பலால் பாலியல் துஷ்பிரயோகத்துக்கு உள்ளாக்கப்பட்டு துன்புறுத்தப்படும் காணொளி சமுக வலைத்தளத்தில் வெளியாகி நாடு முழுவதும் பெரும் அதிர்வலைகளை ஏற்படுத்தியது.

இதையடுத்து கடந்த ஒரு வாரமாக பாலியல் துஷ்பிரயோகத்துக்கு எதிராக பல்வேறு இடங்களில் போராட்டங்கள் வெடித்தன.

இந்நிலையில் பாலியல் துஷ்பிரயோகத்தில் ஈடுபடுவர்களுக்கு கடுமையான மரண தண்டனை வழங்கும் வகையிலான பெண்கள் மற்றும் குழந்தைகள் மீதான அடக்குமுறை தடுப்பு சட்ட சட்டமூலத்துக்கு அமைச்சரவை அமைச்சர்கள் குழு ஒப்புதல் அளித்தது.

http://athavannews.com/பங்களாதேஷில்-பாலியல்-துஷ/

பாலியல் துஷ்பிரயோகம்: பங்களாதேஷின் புதிய சட்டத்தின்படி ஐவருக்கு மரண தண்டனை அறிவிப்பு!

2012இல் 15 வயது சிறுமியை பாலியல் துஷ்பிரயோகத்திற்கு உட்படுத்தியமை தொடர்பாக, பங்களாதேஷ் நீதிமன்றம் ஐந்து பேருக்கு மரண தண்டனை விதித்துள்ளது.

பெண்கள் மற்றும் குழந்தைகளுக்கு எதிரான முறைகேடு வழக்குகளைக் கையாள்வதற்காக அமைக்கப்பட்ட சிறப்பு தீர்ப்பாயத்தால் இன்று (வியாழக்கிழமை) இந்தத் தண்டனை வழங்கப்பட்டுள்ளது.

பிரதமர் ஷேக் ஹசீனாவின் அரசாங்கம் இவ்வாரம் துஷ்பிரயோகம் தொடர்பான மரண தண்டனையை அறிமுகப்படுத்தியதன் பின்னர் வழங்கப்பட்ட முதலாவது தண்டனை இதுவென்பது குறிப்பிடத்தக்கது.

2012இல் குறித்த சிறுமியை, அவரது காதலன் ஆற்றங்கரைக்கு அழைத்துச் சென்றதுடன், காதலனின் இரண்டு நண்பர்களும் சிறுமியை பாலியல் துஷ்பிரயோகம் செய்துள்ளனர். அத்துடன், வேறு இருவர் அவர்களுக்கு உதவியுள்ளனர்.

இந்நிலையில், குறித்த ஐவரும் குற்றவாளிகள் என நிரூபிக்கப்பட்டு மரண தண்டனை விதிக்கப்பட்டுள்ளனர் என வழக்கறிஞர் அஹமது தெரிவித்துள்ளார்.

இதேவேளை, பங்களாதேஷில் பாலியல் துஷ்பிரயோகங்களில் மூன்று வீதம் மட்டுமே முறைப்பாடுவரை வருவதாக தெரிவிக்கப்படுகிறது.

இந்நிலையில், இவ்வாண்டின் முதல் ஒன்பது மாதங்களில் மாத்திரம் குறைந்தது 208 பாலியல் துஷ்பிரயோக வழக்குகள் பதிவாகியுள்ளதுடன், இது ஆயிரம் வழக்குகளில் ஐந்தில் ஒரு பங்கு என  உள்ளூர் உரிமைகள் குழு தெரிவித்துள்ளது.

மேலும், 2013 முதல் பங்களாதேஷில் பாலியல் துஷ்பிரயோக வழக்கில் 23 பேர் தூக்கிலிட்டுள்ளனர் என்பதுடன் இதுவரை ஆயிரத்து 718 பேர் மரண தண்டனையில் உள்ளனர்.

இதேவேளை, பாலியல் துஷ்பிரயோகத்திற்காக மரண தண்டனை அறிமுகப்படுத்தப்படுவதை மனித உரிமை ஆர்வலர்கள் விமர்சித்துள்ளனர் என்பதுடன் இது பெண்களுக்கு எதிரான வன்முறையைக் குறைக்காது எனத் தெரிவித்துள்ளனர்.

இதனிடையே, பங்களாதேஷ் பெண்கள் எதிர்கொள்ளும் பயங்கரமான மிருகத்தனத்தை நிவர்த்திசெய்வதற்கான உண்மையான நடவடிக்கை இல்லாததே இதற்கான காரணம் என சர்வதேச மன்னிப்புச்சபை தெரிவித்துள்ளது.

http://athavannews.com/பாலியல்-துஷ்பிரயோகம்-பங/