• ரஞ்சன் அருண்பிரசாத்
• பிபிசி தமிழுக்காக

மாகாண சபை முறைமையை இல்லாதொழிக்கும் எண்ணத்தை அரசாங்கம் கொண்டுள்ளதாக தமிழ்த் தேசியக் கூட்டமைப்பு தெரிவிக்கின்றது. 

தமிழ்த் தேசியக் கூட்டமைப்பின் நாடாளுமன்ற உறுப்பினரும், ஊடகப் பேச்சாளருமான எம்.ஏ.சுமந்திரன், பிபிசி தமிழுக்கு இதனைக் குறிப்பிட்டார். 

எந்தவொரு சந்தர்ப்பத்திலும் மாகாண சபை முறைமையை இல்லாதொழிக்க இடமளிக்க முடியாது என்பதே தமிழ்த் தேசியக் கூட்டமைப்பின் நிலைப்பாடு என அவர் கூறுகின்றார். 

இரண்டு நாடுகளின் ஒப்பந்தத்தின் அடிப்படையில் உருவாக்கப்பட்ட ஒரு முறைமை இதுவென அவர் சுட்டிக்காட்டுகின்றார். 

இந்த ஒப்பந்தத்தின் ஊடான அதிகார பகிர்வு முறைமை தமிழர்களுக்கு ஏற்றதாக இல்லாத போதிலும், இந்த முறையை அடிப்படையாகக் கொண்டே அர்த்தமுள்ள அதிகார பகிர்வொன்றை பெற்றுக்கொள்ள வேண்டும் என அவர் கூறுகின்றார். 

இந்த உறுதிமொழிகளை இலங்கை அரசாங்கம், பல்வேறு சந்தர்ப்பங்களில் சர்வதேசத்திற்கு வழங்கியுள்ளமையினால், மாகாண சபை முறைமையை இல்லாது செய்வதற்கு அனுமதி வழங்க முடியாது எனவும் அவர் தெரிவிக்கின்றார். 

மாகாண சபை முறைமையை அர்த்தமுள்ளதாக்குவதற்கான செயற்பாடுகளை முன்னெடுக்க நடவடிக்கை எடுக்கப்படும் என எம்.ஏ.சுமந்திரன் குறிப்பிடுகின்றார். 

அத்துடன், மாகாண சபை முறையை அர்த்தமுள்ளதாக வலுப்படுத்தி, இனப் பிரச்சினைக்கான தீர்வாக அது அமைய வேண்டும் என தமிழ்த் தேசியக் கூட்டமைப்பின் ஊடகப் பேச்சாளர் எம்.ஏ.சுமந்திரன் தெரிவிக்கின்றார்.

"கருத்தொற்றில்லாமல் செயல்படுத்த முடியாது"

பட மூலாதாரம், RAUF HAKKIM FB

 

படக்குறிப்பு, ரவூப் ஹக்கீம்

அரசாங்கத்திற்குள்ளேயே இரண்டு நிலைப்பாடுகள் காணப்படுகின்றமையினால், தற்போதைய சூழ்நிலையில் மாகாண சபை முறைமையை அவர்களினால் இல்லாதொழிக்க முடியாது என தாம் நம்புவதாக மக்கள் விடுதலை முன்னணி தெரிவிக்கின்றது.

மக்கள் விடுதலை முன்னணியின் நாடாளுமன்ற உறுப்பினர் விஜித்த ஹேரத், பிபிசி தமிழுக்கு இதனைக் குறிப்பிட்டார். 

அரசாங்கம் சார்பில் நாடாளுமன்ற பதவிகள் கிடைக்காத தரப்பினர், மாகாண சபையின் ஊடாகவே தமக்கான அங்கீகாரத்தை பெற்றுக்கொள்ள எதிர்பார்த்துள்ளதாக அவர் கூறுகின்றார். 

நாட்டுக்காக அன்றி, தமக்கான அங்கீகாரத்திற்காக அரசாங்கம் மாகாண சபை முறைமையை பாதுகாக்கும் என தாம் நம்புவதாகவும் மக்கள் விடுதலை முன்னணியின் நாடாளுமன்ற உறுப்பினர் விஜித்த ஹேரத் தெரிவிக்கின்றார். 

அரசாங்கத்தின் பதில் 

மாகாண சபை முறைமையை இல்லாதொழிக்கும் எண்ணம் அரசாங்கத்திற்கு கிடையாது என அமைச்சரவை பேச்சாளர், அமைச்சர் கெஹேலிய ரம்புக்வெல தெரிவிக்கின்றார். 

மாகாண சபை இல்லாதொழிக்கப்படும் என வெளியாகியுள்ள தகவல் தொடர்பில் பிபிசி தமிழுக்கு வழங்கிய பிரத்யேக பேட்டியிலேயே அவர் இதனைக் கூறினார்.

இந்த விடயம் தொடர்பில் அரசாங்கத்திற்குள் எந்தவொரு பேச்சுவார்த்தையும் இடம்பெறவில்லை எனவும் அவர் குறிப்பிடுகின்றார். 

இதேவேளை, மாகாண சபைத் தேர்தல் பிற்போட தாம் தீர்மானித்துள்ளதாக அவர் தெரிவிக்கின்றார். 

நாட்டில் காணப்படுகின்ற கோவிட் வைரஸ் தாக்கத்தை அடுத்தே, இந்த தீர்மானத்தை எட்டியுள்ளதாகவும் அமைச்சரவை பேச்சாளர், அமைச்சர் கெஹேலிய ரம்புக்வெல தெரிவிக்கின்றார்.