நின்னிலா நின்னிலா (தீனி) - வார இறுதியை ரம்மியமாக்கிய திரைப்படம்

ஞாயிறு பின்னேரம், கையில் ஒரு சிறு மது கிளாசை நிரப்பியபடி இந்த வார இறுதி முடிவை மகிழ்சியாக முடிக்க ஏதாவது ஒரு படம் பார்ப்பமா என IPTV யில் உள்ள புதுப்படங்களின் வரிசையை மேய்ந்து கொண்டு இருக்கும் பொழுது வித்தியாசமான பெயரில் இப் படம் அமைந்து இருந்தது. சரி ஒரு 10 நிமிடம் பார்த்துவிட்டு நல்லா இருந்தால் தொடரலாம் என்று பார்க்க தொடங்கினேன்.

சில படங்களின் கதை ஆழமானதாகவும் இருக்காது, குறிப்பிட்டு சொல்லக் கூடியமாதிரி நடிகர்களும் இருக்க மாட்டினம், இசையில் இருந்து காட்சிகள் வரைக்கும் கொஞ்சம் சாதாரணமாக இருக்கும்...ஆனால் படம் பச்சக் என்று மனசில் ஒட்டிக் கொள்ளும். இந்த வகைப்படங்கள் Feel Good Movies வகையானது. ';காதலும் கடந்து போகும்', 'பெங்களூர் நாட்கள்', 'தோழா' போன்ற படங்கள் எனக்கு இப்படியான வகைக்குள் உள்ளன.

இந்த வரிசையில் இப் படமும் ஒட்டி கொண்டு விட்டது. ஒரு வார விடுமுறையை குடும்பத்துடன் இருந்து பார்த்து ரசிக்க கூடிய குதூகலமான உணர்வைத் தரும் திரைப்படம். மலையாளத்தில் 'நின்னிலா நின்னிலா எனும் பெயரில் எடுக்கப்பட்டு தமிழில் தீனி என்று மொழிபெயர்க்கப்பட்ட திரைப்படம் இது. இதன் இயக்குனர் அனி சசி, பிரபல மலையாள இயக்குனர் ஐ.வி.சசியின் மகன்.

நாயகனுக்கு தசை நார் பிரச்சனையால் பக்கத்தில் இருப்பர் பார்த்தால் பயப்படும் அளவுக்கு அடிக்கடி உடம்பு இழுத்து கொள்ளும். நாயகியோ எல்லாமே படு சுத்தமாக இருக்க வேண்டும் என்று கையில் எந்த நேரமும் சனிற்றைசரை வைத்து அலைகின்ற நோய்க் குணம் உள்ளவர். இவர்கள் லண்டனில் ஒரு உணவு விடுதியில் வேலையாட்களாக சேர்கின்றனர்.அந்த உணவு விடுதியினை நடாத்துகின்ற நாசர் உலகின் மிகச்சிறந்த சமையல்காறர் என்று பெயர் வாங்கியவர். உணவை சுவைக்காமல் அதன் மணத்தினை வைத்தே அது நல்ல சாப்பாடா இல்லையா என்று அறியக்கூடியவர். ஆனால் ஆள் படு முசடு. மனுசியும் மகளும் பிரிந்து போனதால் மனவழுத்தத்துடன் அடிக்கடி தற்கொலை செய்ய முனைபவர்.

இந்த மூன்று வித்தியாசமான குணாதிசயங்களை கொண்டவர்களின் வாழ்க்கையும், அதில் நாயகனின் வாழ்வில் வந்து கலந்து இறந்து போன நித்தியா மேனனின் (அவர் கண்களின் அழகோ அழகு) வாழ்க்கையும் கொண்டு பின்னப்பட்ட ரம்மியமான படம் இது.

உணவு விடுதியில் நடக்கும் கதை என்பதாலும் நாயகனும் நல்ல சமையல்காரர் என்பதாலும் படம் முழுதும் விதவிதமான சமையல் காட்சிகளும் உணவும் வந்து போகின்றன. லண்டன் நகரை அழகாக காட்சிப்படுத்தியும் உள்ளனர். மெல்லிய நகைச்சுவை இழையோடும் கதையோட்டமும், நாயனின் செயல்களும், நித்தியா மேனனின் குறும்பும் என்று படம் நல்ல உணர்வுகளை தருகின்றது.

ஒருவரின் இழப்பினால் பாதிக்கப்படுகின்றவருக்கு ஏற்படும் hallucination பிரச்சனையை கொஞ்சம் 'ஆவி' வகையயாக காட்டியது மட்டும் கொஞ்சம் உறுத்தினாலும், கதையின் போக்கும், உணவுக் காட்சிகளும், நகைச்சுவையும், லண்டன் நகரின் அழகும், நித்தியா மேனனும் படம் பார்த்த பின் நல்ல உணர்வை அருட்டி என் ஞாயிறு பின்னேரத்தை ரம்மியமாக்கியது.

நிழலி