புலிகள் தப்பிச் செல்வதற்கு உத்தரவிட்டவர் யார் என்பதனை ரணில் தெரிவிக்கவேண்டும்

புலிகள் தப்பிச் செல்வதற்கு உத்தரவிட்டவர் யார் என்பதனை ரணில் தெரிவிக்கவேண்டும்

வீரகேசரி நாளேடு

கொழும்பிலிருந்து விடுக்கப்பட்ட உயர்மட்ட உத்தரவின் பேரிலேயே தொப்பிகலையிலிருந்து ஆயிரம் புலி உறுப்பினர்கள் வன்னிக்கு தப்பிச் சென்றதாக எதிர்க்கட்சி தலைவர் ரணில் விக்ரமசிங்க தெரிவித்துள்ளார். அப்படியானால் யார் அவ்வாறு கொழும்பிலிருந்து உத்தரவை பிறப்பித்த உயர்மட்ட நபர் என்பதனை ரணில் வெளிப்படுத்தவேண்டும் என்று ஊடகத்துறை அமைச்சர் லக்ஷ்மன் யாப்பா அபேவர்த்தன தெரிவித்தார்.

கொழும்பில் நேற்று இடம்பெற்ற செய்தியாளர் மாநாட்டில் கலந்துகொண்டு கருத்து தெரிவிக்கையில் அவர் மேற்கண்டவாறு கூறினார்.

அவர் அங்கு மேலும் கூறியதாவது :

தொப்பிகலை காட்டுப்பிரதேசம் என்று முதலில் ரணில் கூறினார். பின்னர் மக்கள் கருத்தபிப்பிராயம் வேறுவகையில் இருந்தததை கண்ட ரணில் தொப்பிகலையை மீட்டதற்கான கௌரவம் படையினருக்கு வழங்கப்படவேண்டும் என்று கூறுகின்றார். படையினருக்கு மக்களின் கௌரவத்தை பெற்றுக்கொடுப்பதற்காகவே நாங்கள் அரச விழாவை நடத்துகின்றோம். கிழக்கு மாகாணத்தை மீட்பதற்காக நாம் படையினருக்கு முழுமையான சுதந்திரத்தை வழங்கியிருந்தோம்.

இதேவேளை ரணில் விக்ரமசிங்க இராணுவ பேச்சாளர் பிரிகேடியர் பிரசாத் சமரசிங்க அரசியல் நடத்துகின்றார் என்று தெரிவித்துள்ளார். அவர் அவ்வாறு அரசியல் நோக்கில் எந்தக்கருத்தையும் கூறவில்லை. கிழக்கு மாகாண வெற்றியை குறைத்து மதிப்பிடவேண்டாம் என்று மட்டுமே கூறினார். பிரசாத் சமரசிங்க கொத்தலாவல பாதுகாப்பு கல்விக்கல்லூரியில் பட்டம் பெற்றவர். அத்துடன் இங்கிலாந்தில் விசேட பட்டமொன்றை பெற்றவர். போர் நடவடிக்கைகளில் பல சந்தர்ப்பங்களில் பிரதேச மட்டத்தில் படையினருக்கு தலைமைத்துவம் வழங்கியவர்.

ரிவிரெச இராணுவ நடவடிக்கையில் பங்கேற்று செயலாற்றியவர். பல விருதுகளையும் பெற்றுக்கொண்டவர்.

ஊடகவியலார் விஜேரட்ன பொடிபண்டார அரலகங்வில பகுதியில் அண்மையில் தாக்கதலுக்கு உள்ளாகியிருந்தார். அது தொடர்பில் நான்கு பேர் கைதுசெய்யப்பட்டு பிணையில் விடுதலை செய்யப்பட்டுள்ளனர். பொலிஸார் மேலதிக விசாரணைகளை மேற்கொண்டு வருகின்றனர். அது தொடர்பில் நாங்கள் அவதானமாக இருக்கின்றோம்.