"கலப்படம்"

 

"தாய்ப் பால் ஒன்றைத்  தவிர

தாரத்தின் உறவிலும் பிள்ளையின் அன்பிலும் 

தாரக மந்திரத்திலும் மதத்தின் போதனையிலும்  

தாராளமாக இன்று பலபல கலப்படம்"

 

"எந்த பொருளிலும் செயலிலும் கலப்படம்

எங்கும் எதிலும் சுத்தம் கிடையாது  

எச்சில் படும் முத்தத்திலும் கலப்படம்

எழுதும் காதல் மொழியிலும் கலப்படம்"

 

 

"பெண் முட்டையுடன் விந்து இணையும்   

பெரும் கலவையிலும் சிலசில கலப்படம்

பெருத்து குழந்தை வயிற்றில் உருவாகி

பெற்று எடுத்தால் அரவாணியென்ற கலப்படம்" 

  

"குழந்தை சிரிப்பும் குறும்பும் தவிர

குமரி தோற்றத்திலும் வனப்பிலும் கலப்படம்

குடும்ப அன்பிலும் பண்பாட்டிலும் கலப்படம் 

குறிஞ்சிநில முருகன் தமிழிலும் கலப்படம் " 

"ஓதிடும் மந்திரத்திலும் போதகர் போதனையிலும்
ஓதுவார் ஓசையிலும் ஒழுகிடும் நெறியிலும்
ஓர்மனமாய் நின்று வழிபடும் அடியாரிலும்
ஓகை கொண்டு இணைந்துவிட்டது கலப்படம்"

"உழைத்து பெற்ற ஊதியத்திலும் கலப்படம்
உண்மை தந்த உயர்விலும் கலப்படம்
உணர்வுகொள் தாய் மொழியிலும் கலப்படம்
உணவுப் பொருட்கள் அனைத்திலும் கலப்படம்"

"கூட்டம் சேர்க்கும் அரசியலில் கலப்படம்
கூர்மையான அரச அறிக்கையில் கலப்படம்
கூறிடும் ஊடக செய்தியில் கலப்படம்
கூசாமல் பேசிடும் வரலாற்றில் கலப்படம்"

"தெரிந்து வேண்டும் என்று சேர்ப்பதும்
தெரியாமல் தவறி அங்கு சேர்ப்பதும்
தெளித்து பட்டும் படாமலும் சேர்ப்பதும்
தெளிவாக அவை எல்லாம் கலப்படம்தான்"

[கந்தையா தில்லைவிநாயகலிங்கம்,
அத்தியடி, யாழ்ப்பாணம்] 

ஓகை - உவகை, மகிழ்ச்சி

  

 

 

 

Edited July 12, 20241 yr by kandiah Thillaivinayagalingam

நல்லதொரு தலைப்பும் கவிதையும்.

கவிதை, தலைப்பு + படங்கள் யாவும் அசத்தல்..........!   👍

எல்லோருக்கும் நன்றிகள்