ஈழத்தமிழ் மக்களுக்கு உதவுவதற்கு கனடா முன்வர வேண்டும் கனேடிய அரசியல் தலைவர்களிடம் ஈழவேந்தன் எம்.பி.கோரிக்கை

ஈழத்தமிழ் மக்களுக்கு உதவுவதற்கு கனடா முன்வர வேண்டும் கனேடிய அரசியல் தலைவர்களிடம் ஈழவேந்தன் எம்.பி.கோரிக்கை

வீரகேசரி நாளேடு

இலங்கையின் இனப்பிரச்சினைக்கு கனடாவின் அரசியல் அமைப்பினை ஒத்த தீர்வினை ஏற்க நாம் தயாராகவுள்ளோம். ஆனால் இத்தகைய தீர்வினை வழங்க இலங்கை அரசாங்கம் தயாராக இல்லை. எனவே ஈழத்தமிழ் மக்களுக்கு உதவ கனடா முன்வர வேண்டும் என்று அந்த நாட்டின் அரசியல் தலைவர்களிடம் தமிழ் தேசிய கூட்டமைப்பின் பாராளுமன்ற உறுப்பினர் எம்.கே.ஈழவேந்தன் கோரியுள்ளார்.

கனடாவுக்கு அண்மையில் விஜயம் மேற்கொண்ட அவர் அந்நாட்டின் பிரதமர், வெளிவிவகார அமைச்சர் உட்பட பலரையும் சந்தித்து பேச்சுவார்த்தை நடத்தியுள்ளார். இச்சந்திப்பின்போதே ஈழவேந்தன் எம்.பி. இவ்வாறு கூறியுள்ளார்.

கனடாவில் இடம்பெற்ற சந்திப்பு தொடர்பாக அவர் மேலும் தெரிவித்ததாவது;

கனடாவின் பிரதமர், வெளிவிவகார அமைச்சர் உட்பட பலரையும் நான் சந்தித்து பேசினேன். இச்சந்திப்பில் பல்வேறு விடயங்கள் குறித்து பேசினார். கனடாவின் அரசியலமைப்பினை ஒத்த தீர்வினை ஏற்க ஈழத்தமிழ் மக்கள் தயாராக உள்ளனர். ஆனால் அதனை வழங்க இலங்கை அரசாங்கம் தயாராக இல்லை.

எனவே இத்தகைய தீர்வினை வழங்குமாறு கனடா அரசாங்கம் இலங்கைக்கு அழுத்தம் கொடுக்கவேண்டும்.

இதனை இலங்கை ஏற்காத பட்சத்தில் ஈழத்தமிழர்களின் அபிலாசைகளை பூர்த்தி செய்ய கனடா முன்வர வேண்டும்.

வேற்றுமையில் ஒற்றுமை காணும் கனடாவின் அரசியலமைப்பில் காணப்படுவதை போன்ற இணையாட்சியினை நாம் ஏற்றுக் கொள்வோம். ஆனால் சிங்கள அரசு எதனையும் வழங்க முன்வருவதாக இல்லை என்பதை நான் சந்திப்புக்களில் சுட்டிக் காட்டினேன்