மட்டக்களப்பு சிறைச்சாலையில் தடுத்து வைக்கப்பட்டிருக்கும் தமிழ் அரசியல் கைதிகளை இன்று முற்பகல் அங்கிருந்த துணை இராணுவக் குழுவைச் சேர்ந்த கைதிகள் கொடூரமாகத் தாக்கியதில் இருவர் படுகாயமடைந்து உயிராபத்தான நிலையில் மருத்துவமனைக்கு கொண்டு செல்லப்பட்டுள்ளனர். இதனால் அங்கு பெரும் பதற்றம் நிலவுகின்றது.

தொடர்ந்து வாசிக்க

மட்டக்களப்பு சிறைச்சாலையில்

தமிழ்க் கைதிகள் மீது தாக்குதல்

இருவர் படுகாயம்; துணைக்குழு மீது குற்றச்சாட்டு

மட்டக்களப்பு சிறைச்சாலையில் நேற்று தமிழ் அரசியல் கைதிகள் மீது பிறிதொரு கைதிகள் குழு நடத்திய தாக்குதலில் இருவர் படுகாயமடைந்தனர்.

தமிழ் அரசியல் கைதிகளை நாளை வெள்ளிக்கிழமை முற்பகல் 11.15 மணிக்கு வழக்கம்போல கோவிலுக்கு வழிபாட்டுக்குச் செல்வதற்காக சிறைக்கூடங்களில் இருந்து திறந்துவிட்டபோது பிறிதொரு கட்டடத்தொகுதியிலுள்ள சிறைக்கூடங்களில் இருந்து திறந்துவிடப்பட்ட 17 பேரடங்கிய கைதிகள் குழு ஒன்றே இத் தாக்குதலை மேற்கொண்டிருக்கின்றது.

தமிழ் அரசியல் கைதிகள் 15 பேர் கோவிலுக்குச் சென்று கொண்டிருந்தபோது சிறைச்சாலைக்குள் இருக்கும் ஒரு பகுதியில் நின்ற கைதிகள் அவர்களை வழிமறித்துக் கூரிய ஆயுதங்களால் தாக்குதல் நடத்தத் தொடங்கினர் என்று தெரிவிக்கப்பட்டது.

கத்திகள், பொல்லுகள், கோடரிகள், வாள்கள் போன்றவற்றாலேயே இந்தத் தாக்குதல் நடத்தப்பட்டிருக்கின்றது. தாக்குதல் நடத்தியவர்கள் இராணுவத் துணைக்குழு ஒன்றைச் சேர்ந்தவர்கள் என்று தெரிவிக்கப்பட்டது.

அச்சமயம் சிறைக்கூடங்களிலிருந்த ஏனைய தமிழ் அரசியல் கைதிகளும் தகவலறிந்து சம்பவ இடத்திற்குச் செல்ல முற்பட்டபோது அவர்களை சிறைக்கூடங்களிலிருந்து வெளியேற விடாது அதிகாரிகள் தடுத்ததுடன் சிறைக்கூடங்களையும் இழுத்து மூடிவிட்டனர் என்று தெரிவிக்கப்படுகின்றது.

இதனால் துணை இராணுவக் குழுவைச் சேர்ந்த கைதிகள் நீண்டநேரமாக தமிழ் அரசியல் கைதிகளைத் தாக்கிக்கொண்டிருந்தனர் என்றும் அதனை சிறைச்சாலை அதிகாரிகளும் வேடிக்கை பார்த்துக்கொண்டே இருந்தனர் என்றும் பாதிக்கப்பட்ட கைதிகள் தெரிவித்தனர்.

இச்சம்பவத்தில் தமிழ் அரசியல் கைதிகள் இருவர் தலையில் படுகாயமடைந்து உயிராபத்தான நிலைக்குத் தள்ளப்பட்டனர். அவர்களின் தலைப்பகுதி கடுமையாகச் சேதமடைந்திருப்பதாகத் தெரிவிக்கப்படுகின்றது.(த 09)

http://www.sudaroli.com/pages/news/today/08.htm