இலங்கை திணறல்

இலங்கை திணறல்

Friday, 15 February, 2008 04:12 PM

.

பெர்த், பிப். 15: பெர்த்தில் நடைபெற்று வரும் முத்தரப்பு ஒரு நாள் தொடரில் இன்று நடைபெறும் ஆட்டத்தில் இலங்கை அணி ஆஸ்திரேலியாவிடம் திணறி வருகிறது.

.

பெர்த்தில் நடைபெற்று வரும் இலங்கை அணிக்கு எதிரான ஆட்டத்தில் டாசில் வெற்றி பெற்ற ஆஸ்திரேலியா முதலில் பேட்டிங் செய்ய முடிவு செய்து களமிறங்கியது.

துவக்க ஆட்டக்காரராக களமிறங்கிய மேத்யூ ஹைடன் 4 ரன்கள் மட்டுமே எடுத்திருந்த நிலையில் மலிங்கா பந்துவீச்சில் ஆட்டமிழந்து பெவிலியன் திரும்பினார்.

ஆனால் மற்றொரு துவக்க ஆட்டக்காரராக களமிறங்கிய கில்கிறிஸ்ட் இலங்கை பந்துவீச்சாளர்களை பந்துகளை அடித்து நொறுக்கி விளையாடி சதமடித்தார். 107 பந்துகளில் அவர் தனது சதத்தை நிறைவு செய்தார். அவரது சதத்தில் 9 பவுண்டரிகள் மற்றும் இரண்டு சிக்சர்கள் அடங்கும்.

ஹைடனைத் தொடர்ந்து களமிறங்கிய பாண்டிங் 25 ரன்கள் எடுத்து வாஸ் பந்துவீச்சில் ஆட்டமிழந்தார். அவரைத் தொடர்ந்து வந்த கிளார்க் கில்கிறிஸ்ட்டுடன் ஜோடி சேர்ந்து ஆஸ்திரேலிய அணிக்கு வலு சேர்க்கும் வகையில் ஆடினார்.

43 ரன்கள் எடுத்த அவர் முத்தையா முரளீதரன் பந்துவீச்சில் ஸ்டம்ப்டு முறையில் ஆட்டமிழந்தார். 3வது விக்கெட்டுக்கு கில்கிறிஸ்ட்டும் கிளார்க்கும் ஜோடி சேர்ந்து 105 ரன்கள் எடுத்தனர்.

அவருக்கு அடுத்தபடியாக வந்த ஆண்ட்ரு சைமண்ட்ஸ்சும் வந்த வேகத்தில் பெவிலியன் திரும்பினார். 4 ரன்கள் எடுத்த அவர் மகரூப் பந்துவீச்சில் ஆட்டமிழந்தார். கில்கிறிஸ்ட் 118 ரன்கள் எடுத்திருந்த நிலையில் மலிங்கா பந்துவீச்சில் ஆட்டமிழந்தார்.

முந்தைய ஓவரில் அவர் அடித்த பந்தை கேட்ச் பிடிக்காமல் நழுவ விட்ட இலங்கை வீரர் கபுகெடேரா இந்த முறை சரியாக பிடித்து கில்கிறிஸ்ட்டின் ஆட்டத்தை முடிவுக்கு கொண்டு வந்தார்.

பின்னர் ஆஸ்திரேலிய வீரர்கள் கிடுகிடுவென ஆட்டமிழந்தனர். 30 ரன்கள் எடுப்பதற்குள் அடுத்த 5 விக்கெட்டுகளை இழந்த ஆஸ்திரேலியா 49.4 ஓவர்களில் அனைத்து விக்கெட்டுகளையும் இழந்து 236 ரன்கள் எடுத்தது.

இதை தொடர்ந்து 237 ரன்கள் எடுத்தால் வெற்றி என்ற இலக்குடன் களமிறங்கிய இலங்கை 23 ஓவர்கள் நிறைவடைந்த நிலையில் 4 விக்கெட் இழப்புக்கு 99 ரன்கள் எடுத்து திணறி வருகிறது.

ஜெயசூர்யா 12 ரன்களுக்கும், தில்ஷான் 11 ரன்களுக்கும், ஜெயவர்த்தனே 21 ரன்களுக்கும், சில்வா ரன் எதுவும் எடுக்காமலும் ஆட்டமிழந்தனர்.

malaisudar.com