கிழக்கில் முஸ்லிம் அமைச்சர் ஒருவரின் உதவியுடன் இயங்கும் ஆயுதக் குழுவொன்று ஸ்ரீலங்கா முஸ்லிம் காங்கிரஸ் உறுப்பினர்கள் மீது தாக்குதல் மேற்கொள்வதாகத் தெரிவிக்கப்படுகிறது.

மனித உரிமைகளுக்கான பல்கலைக்கழக பேராசிரியர்கள் தெரிவித்துள்ளனர்.

கிழக்கில் தற்போது மேற்கொள்ளப்பட்டுவரும் பல்வேறு வன்முறைச் சம்பவங்களுடன் தொடர்புடைய முஸ்லிம் ஆயுதக்குழுவை அரசியல் சக்தியொன்று இயக்கி வருவதாக அந்த அமைப்பு அறிக்கையொன்றின் மூலம் தெரிவித்துள்ளது.

இவ்வாறு வன்முறைச் செயல்களில் ஈடுபடும் சிலருக்கு எதிராக மாத்திரம் பொலிஸார் நடவடிக்கைகள் மேற்கொண்டுள்ளதாக் தெரிவிக்கப்படுகிறது.

குறிப்பிட்ட இந்த அரசாங்க அமைச்சர், ஆயுததாரிகளைக் கொண்டு ஸ்ரீலங்கா முஸ்லிம் காங்கிரஸ் கட்சியினருக்கு பல்வேறு இடையூறுகளை ஏற்படுத்தி வருவதாகவும், தமிழர்களுடன் சர்ச்சையை ஏற்பட்ட குருவக்கேனி பிரதேசத்தில் முஸ்லிம்களை மீண்டும் குடியமர்த்த நடவடிக்கைகளை மேற்கொண்டுள்ளதாகவும் தெரிவிக்கப்படுகிறது.

இந்த ஆயுதந்தரித்த கும்பலில் ஆட்டோ கலீல் என்பவர் மிக முக்கியமான நபர் என அடையாளங் காணப்பட்டுள்ளது.

இதற்கு முன்னர் தமிழீழ விடுதலைப் புலிகளின் புலனாய்வுத் துறையில் இவர் கடமையாற்றியுள்ளதாகவும், 1990ம் ஆண்டு இராணுவத்தில் சரணடைந்துள்ளதாகவும் தெரியவருகிறது.

2006ம் ஆண்டு கிழக்கை மீட்பதற்கு கருணா அணியின் மங்களம் மாஸ்டரிடம் ஆயுதப் பயிற்சியை தொடரும் பொருட்டு முஸ்லிம்களை இணைத்துக் கொள்ள இராணுவத்தினர் குறிப்பிட்ட நபரையே பயன்படுத்தியதாகத் தெரியவருகிறது.

ஹிதாயா என்ற 15 வயது சிறுமியின் மீது பாலியல் வல்லுறவு மேற்கொள்ளப்பட்டு பின்னர் மத நம்பிக்கையின்படி கொலை செய்யப்பட்ட சம்பவத்தின் பிரதான சந்தேக நபரும் இந்த கலீல் எனப்படுபவரே எனத் தெரியவருகிறது.

இதேவேளை, தமிழ் மக்கள் விடுதலைப் புலிகள் அமைப்பினால் பலவந்தமாக கிழக்குத் தேர்தல்களுக்கு பலர் நிறுத்தப்பட்டுள்ளதாகவும், இதனால் பலர் தங்களது இருப்பிடங்களை மாற்றிக் கொண்டுள்ளதாகவும் தெரிவிக்கப்படுகிறது.

மேலும், கருணா மற்றும் பிள்ளையான் குழுக்கள் தொடர்ந்தும் சிறுவர்களை தமது படையில் சேர்த்துக் கொள்வதாகவும் இதற்கு அரசாங்கமும் உடந்தையாக இருப்பதாகவும் தெரிவிக்கப்படுகிறது.

இவ்வாறான சம்பவங்கள் பெரும்பாலும் மிகவும் வறிய கிராமங்களில் இடம்பெறுவதால் இந்தத் தகவல்களை வெளிப்படுத்த எவரும் முன்வருவதில்லை எனவும், பொதுமக்களுக்கு இந்தத் தகவல்கள் அனேகமாக தெரியவருவதில்லை எனவும் கூறப்படுகிறது.

எனவே, சிறுவர்களை படைகளில் சேர்த்தல் தொடர்பாக மிக சொற்பளவான தகவல்களே வெளி உலகிற்கு தெரிய வருவதாக தெரிவிக்கப்படுகிறது.

நன்றி :www.lankadissent.com/

கருணாவை தப்ப வைக்க உதவியவராக அனேகமாக இருக்கலாம்.கருணாவின் சகலனும் கூட.