கிளிநொச்சி, முல்லைத்தீவை கைப்பற்றும் இறுதிச் சமர் ஆரம்பம்

கிளிநொச்சி, முல்லைத்தீவை கைப்பற்றும் இறுதிச் சமர் ஆரம்பம்

* படைத்தரப்பு தெரிவிப்பு

கிளிநொச்சி மற்றும் முல்லைத்தீவு களமுனைகளில் தங்கள் நிலைகளைப் பலப்படுத்தி வரும் படையினர், இவ்விரு நகர்களையும் கைப்பற்றுவதற்கான இறுதிச் சமர்களை ஆரம்பித்திருப்பதாக தெரிவித்துள்ளனர்.

இதேநேரம், கடந்த சனிக்கிழமை முல்லைத்தீவு நோக்கி இரு முனைகளில் பாரிய முன்நகர்வு முயற்சியை மேற்கொண்ட படையினர் மீது, தாங்கள் நடத்திய தாக்குதலில் 68 படையினர் கொல்லப்பட்டதாக விடுதலைப் புலிகள் தெரிவித்த அதேநேரம், முல்லைத்தீவு சிலாவத்தைப் பகுதியில் சனிக்கிழமை நடைபெற்ற மோதலில் 31 படையினர் கொல்லப்பட்டுள்ளதாக ஓய்வு பெற்ற சிரேஷ்ட இராணுவ அதிகாரிகளின் பாதுகாப்பு இணையத்தளம் தெரிவித்துள்ளது.

சனிக்கிழமை நடைபெற்ற சமரில் கொல்லப்பட்ட படையினரில் புலிகளால் கைப்பற்றப்பட்ட 17 படையினரின் சடலங்கள் நேற்று திங்கட்கிழமை விடுதலைப் புலிகளால் சர்வதேச செஞ்சிலுவைச் சங்கத்திடம் கையளிக்கப்பட்டது.

வன்னிச் சமர் குறித்து பாதுகாப்புத் தரப்பு கூறுகையில்;

கிளிநொச்சி மற்றும் முல்லைத்தீவு நகர்களைக் கைப்பற்றுவதற்கான இறுதிக்கட்டச் சமர்களில் தற்போது படையினர் ஈடுபட்டுள்ளனர்.

தற்போது பரந்தன், கிளிநொச்சி மற்றும் முல்லைத்தீவு புறநகர்ப்பகுதிகளில் கடும் சமர் நடைபெற்று வருகிறது. புலிகள் வசமுள்ள மிகுதிப் பகுதிகளையும் கைப்பற்றுவதற்காகப் படையினர் ஒரே நேரத்தில் பல முனைகளிலும் கடும் தாக்குதல்களைத் தொடுத்து வருகின்றனர்.

விஷேட படையணி ஐ தற்போது பூநகரி பரந்தன் வீதியில் (பி69 வீதி) பெரிய பரந்தனை நோக்கிய முன்நகர்வு முயற்சியில் ஈடுபட்டுள்ளது. தற்போது இந்தப் படையணி பரந்தனுக்கு மேற்கே சுமார் 4 கிலோ மீற்றர் தூரத்தில் நிலைகொண்டுள்ளது.

ஞாயிற்றுக்கிழமை கிளிநொச்சி முனையிலும் கடும் சமர் நடைபெற்றுள்ளது. அடம்பன் பகுதியில் ஞாயிற்றுக்கிழமை விஷேட படையணி ஐ நல்லவன்குளத்தைக் கைப்பற்றியுள்ளன.

இதேநேரம், புளியங்குளம் நெடுங்கேணி வீதியில் நயினாமடுப் பகுதியிலிருந்து முன்னேறிய விஷேட படையணி ஐஐ ஞாயிற்றுக்கிழமை காலை விஷேட படையணி 4 உடன் நெடுங்கேணி நகருக்கு தென்மேற்கே சுமார் 800 மீற்றர் தூரத்தில் இணைந்து கொண்டது. இதன் மூலம் புளியங்குளம் நெடுங்கேணி வீதி முழுமையாக படையினரின் கட்டுப்பாட்டினுள் வந்துள்ளது.

இதேவேளை, முல்லைத்தீவில் நந்திக்கண்டல்வாவிப் பகுதியை புலிகளின் பலத்த எதிர்ப்புக்கு மத்தியிலும் படையினர் நெருங்கியுள்ளனர். தற்போது படையினர் ஒட்டுசுட்டான் முல்லைத்தீவு வீதியூடாகவும் அளம்பில் முல்லைத்தீவு வீதியூடாகவும் பாரிய முன்நகர்வுகளை மேற்கொள்கின்றனர்.

ஏற்கனவே, இந்தப் பகுதியில் 59 ஆவது படையணியினர் முள்ளியவளை, தண்ணீரூற்றுப் பகுதிகளைக் கைப்பற்றியுள்ளதாகவும் படையினர் தெரிவித்துள்ளனர்.

சடலங்கள் கையளிப்பு

இதற்கிடையில், முல்லைத்தீவு நோக்கிய படையினரின் முன்நகர்வுக்கு எதிரான விடுதலைப் புலிகளின் முறியடிப்புத் தாக்குதலின் போது கைப்பற்றப்பட்ட படையினரின் 17 சடலங்களும் நேற்று சர்வதேச செஞ்சிலுவைச் சங்கத்திடம் கையளிக்கப்பட்டுள்ளன.

முல்லைத்தீவு, புதுக்குடியிருப்பில் நேற்றுக் காலை 10 மணியளவில் இக்கையளிப்பு நிகழ்வு நடைபெற்றது.

விடுதலைப் புலிகளின் சர்வதேச அரச சார்பற்ற நிறுவனங்களுக்கான செயலகப் பணிப்பாளர் மு.பாவரசனினால் செஞ்சிலுவைச் சங்கத்தின் வன்னிக்கான வதிவிடப் பிரதிநிதி யூலியனிடம் படையினரின் 17 சடலங்களும் கையளிக்கப்பட்டன.

முல்லைத்தீவு நோக்கி கடந்த சனிக்கிழமை படையினர் மேற்கொண்ட இரு முனை முன்நகர்வுகள் விடுதலைப் புலிகளால் முறியடிக்கப்பட்டன. இதில் 68 படையினர் கொல்லப்பட்டுள்ளதுடன், 75 க்கும் அதிகமானோர் காயமடைந்துள்ளதுடன், படையினரின் 17 சடலங்களும் இராணுவப் பொருட்களும் கைப்பற்றப்பட்டதாக புலிகள் தெரிவித்தனர்.

இதேநேரம், கடந்த சனிக்கிழமை முல்லைத்தீவு, சிலாவத்தைப் பகுதியில் இடம்பெற்ற கடும் சமரில் 31 படையினர் கொல்லப்பட்டதுடன், அதில் 22 படையினரின் சடலங்கள் காணாமல் போனதாகவும் 9 சடலங்களை படையினர் கைப்பற்றியதாகவும் ஓய்வு பெற்ற படை அதிகாரிகளின் பாதுகாப்பு இணையத்தளம் கூறியுள்ளது.

http://www.thinakkural.com/

Edited December 30, 200817 yr by Iraivan