காங்கிரசுகட்சியைக் காப்பாற்ற முயலும் முதல்வர்

இலங்கைத்தமிழர் பிரச்சினையை காங்கிரஸை எதிர்க்கும் பிரச்சினையாக்கிவிட வேண்டாம் - திருமாவளவனுக்கு கருணாநிதி கண்டனம்

இலங்கைத் தமிழர் பிரச்சினையை காங்கிரஸ் கட்சியை எதிர்க்கும் பிரச்சினையாக திசை திருப்பி விடும் வகையில் நடந்துகொள்ளக்கூடாது என்று, விடுதலைச் சிறுத்தைகள் கட்சி தலைவர் தொல்.திருமாவளவனுக்கு முதலமைச்சர் கருணாநிதி கண்டனம் தெரிவித்துள்ளார்.

இலங்கையில் போராளிகளுக்கு இடையே நடைபெற்ற சகோதர யுத்தம் எப்படி அவர்களை பலவீனப் படுத்தியதோ அதைப்போல இலங்கை தமிழர்களுக்காக வாதாடும் நமக்குள்ளே ஏற்படும் சகோதர யுத்தங்களும் மொத்த பிரச்சினையையும் சிதைத்து விடுகின்றன என்றும் கருணாநிதி கூறியுள்ளார்.

இலங்கை தமிழர் பிரச்சனை தொடர்பாக கட்சித் தொண்டர்களுக்கு இன்று அவர் எழுதியுள்ள கடிதத்தில் மேலும்தெரிவித்துள்ளதாவது;

இலங்கைக்கு வெளியுறவுத்துறை அமைச்சர் பிரணாப் முகர்ஜி பயணம் மேற்கொள்ள முடியாததற்கான காரணங்களை முழுமையாக அறிந்து கொள்ளாமல் தமிழ்நாட்டில் உள்ள சில கட்சிகளின் நடவடிக்கைகள் இலங்கை தமிழரை பாதுகாக்கும் பிரச்சினை என்று இல்லாமல் காங்கிரஸ் கட்சியை எதிர்க்கும் பிரச்சினை என்ற கோணத்தில் திருப்பி விடப்பட்டுள்ளது.

இலங்கை தமிழர் பிரச்சினைக்காக மீண்டும் ஏதாவது செய்ய வேண்டும் என்று கடந்த 12 ஆம் திகதி என்னை பா.ம.க. தலைவர் ராமதாஸ் திராவிடர் கழகத் தலைவர் வீரமணி மற்றும் திருமாவளவன் ஆகியோர் சந்தித்தனர்.

ஆனால் திடீரென என்னை கலந்து பேசாமல் திருமாவளவன் தன்னிச்சையாக உண்ணாவிரதம் அறிவித்தார். உண்ணாவிரத பந்தலில் இலங்கை அரசைவிட இங்குள்ள காங்கிரஸ் கட்சியுடன் தான் தமக்கு போராட்டம் என்பதுபோல திருமாவளவன் பேசியுள்ளார்.

"எப்படியோ மூவர் கூடி முதல்வருடன் பேசினோமே அடுத்த நாளே உண்ணா நோன்பு அறிவிக்கிறோமே என்று கூட எண்ணாது அரசு பேருந்துகள் பல எரிக்கப்பட்டன. ""இலங்கை தேசியக்கொடி எரிப்பு'' என்று திருமாவளவன் அறிவித்திருப்பது ஏன் என்று நம்மால் புரிந்து கொள்ள முடியவில்லை' என்றும் கருணாநிதி அந்த மடலில் தெரிவித் துள்ளார்.