வணக்கம்,

பேரணிகளிற்கு பெயர்சூட்டும் பெரியோர்களிடம் ஓர் தாழ்மையான வேண்டுகோள்:

நீங்கள் செய்கின்ற தன்னலமற்ற சேவைகளிற்கு முதலில் கோடி நன்றிகள் கூறி.. பேரணிகளில் கலந்துகொள்பவன் எனும் முறையில் ஓர் விடயத்தை கூறலாம் என்று நினைக்கின்றேன்.

தயவுசெய்து உங்கள் விருப்பப்படி மாபெரும்... பாரிய எழுச்சி.. பேரணி எனும் சொற்பதங்களை வைத்துவிட்டு பின்னர் அங்கு லட்சக்கணக்கான மக்கள் வந்து ஆதரவு தரவில்லை என்று திட்டித் தீர்க்காதீர்கள்.

எத்தனை பேர் வருகின்றார்கள் என்பதைவிட எப்படி பேரணி செய்யப்படுகின்றது. அங்கு எப்படி செய்தி வெளியே கொண்டு வரப்படுகின்றது என்பதுதான் முக்கியமானது. லட்சக்கணக்கில் ஒன்றுகூடலை எதிர்பார்ப்பதில் தவறு இல்லை. ஆனால்.. அப்படியான பேரணி ஒவ்வொருமாதமும் வைக்கவேண்டும் என்று பிடிவாதமாக நின்று பெரிய கவர்ச்சிகரமான பெயர்களை பேரணிகளிற்கு வைத்துவிட்டு பின்னர் ஐயோ எங்கள் மக்கள் அதிக அளவில் குறிப்பிட்ட பேரணிக்கு வந்துகலந்து ஆதரவு தராமல் ஏமாற்றி விட்டார்களே என்று புலம்பாதீர்கள்.

மக்கள் தொடர்ந்து ஆதரவு தந்துகொண்டுதான் இருக்கின்றார்கள். ஆனால்... தொடர்ச்சியாக அனைவருக்கும் நீங்கள் கூப்பிடும்போதெல்லாம் ஓடியோடி வரமுடியாது என்பதை உணர்ந்து கொள்ளுங்கள்.

தொடர்ச்சியாக பேரணிகளில் கலந்துகொள்ளும் மக்களில் எத்தனைபேர் எத்தனைவிதமான தியாகங்களை செய்து இருப்பார்கள் என்று நாங்கள் எல்லோரும் அறிந்து இருக்கின்றோம்.

• பல மாணவர்களின் கல்வி பாரிய அளவில் பாதிக்கப்பட்டு இருக்கின்றது. சோதனைகளில் படான் புள்ளிகள், படான் பெறுபேறுகள் எடுத்து இருக்கின்றார்கள்.
  
• பல உழைக்கும் மக்கள் வேலைத்தளத்தில் தங்கள் ஆளுமையை இழந்துவிட்டார்கள். பலர் வேலையை இழக்கும் நிலையில் இருக்கின்றார்கள்.
  
• தொடர்ந்து பேரணிகளிற்கு வருவதால் பலரின் உடல், உளநலம் பெரிய அளவில் பாதிக்கப்பட்டு இருக்கின்றது.
  
• தொடர்ந்து பேரணிகளில் கலந்துகொண்டதால் பலர் பொருளாதார ரீதியாகக்கூட பாதிக்கப்பட்டு இருக்கின்றார்கள்.
  
• தொடர்ச்சியாக பேரணிகளில் கலந்துகொள்பவர்கள் உறவுகள் வீடுகளில் குடும்பத்தில் பல பிரச்சனைகள் கூட ஏற்பட்டு இருக்கின்றது.
  

இந்தவகையில்... நீங்கள் கவர்ச்சிகரமான பெயர்களை வைத்து விளம்பரமும் செய்துவிட்டு பின்னர் மக்களை காணவில்லை என்று ஏமாற்றம் அடைவதில் அர்த்தம் இல்லை.

நன்றி!

மிகச்சரியான கருத்து கலைஞன்..

எவ்வளவு பேர் வருகிறார்கள் என்பது ஒரு குறிப்பிட்ட தொகை வரைக்குமே முக்கியம்..! ஒவ்வொரு தடவையும் வரவேண்டும் என்றால் நடைமுறைக்கு சாத்தியம் ஆகாது. ஓரளவு தொகையானாலும் தொடர்ச்சியாக இந்தப் போராட்டம் தக்கவைக்கப் படவேண்டும்.

இதில் இன்னொன்றையும் கவனத்தில் கொள்ளவேண்டும். போராட்டங்களுக்கு மக்களை அழைப்பதில் கொடுக்கும் அதே முக்கியத்துவத்தை ஊடகங்களுக்கும் தந்து செய்திகளை வெளியிட செய்வது அவசியம். குறைந்த அளவில் மக்கள் கலந்துகொண்டாலும் நிறைய ஊடகங்கள் அதை வெளியிட்டால் அதன் தாக்கம் அதிகம்.

வணக்கம் உறவுகளே

கலைஞனின் கருத்துத்தான் அநேகமான மக்களின் கருத்தாகும்.மிகவும் சிரமப்பட்டு ஊர்வலங்களை ஒழுங்குசெய்பவர்கள் ஊர்வலம் முடிந்ததும் தமிழ் ஊடகங்களிற்கும் தமிழ்தொலைக்காட்சிகளிற்கும் செய்திகளைக்கொடுப்பதுடன் திருப்திப்படுகிறார்கள். உண்மையில் அந்தந்தநாட்டு ஊடகங்களில் செய்தியானால்த்தான் அந்தந்த நாட்டுமக்களைச்சென்றடையும். எனவே சிறுபணச்செலவானாலும் பிற ஊடகங்களை வரவைக்கவேண்டும். இங்கே எமது இளையோரின் பங்களிப்பு முக்கியத்துவம் பெறுகிறது. நன்றி.

அரசி