சிறிலங்காப் படையினரின் சொல் கேட்காததால்தான் இந்தியப் படை புலிகளிடம் தோற்றது: சிறிலங்காவின் முன்னாள் தளபதி

திறமை வாய்ந்த சிறிலங்கா படையினரின் உதவியை பெற்றுக்கொள்ள மறுத்ததால்தான், இந்திய அமைதி காக்கும் படையினரால் தமிழீழ விடுதலைப் புலிகளை வெல்ல முடியாமல் போனது என்று இந்தியப் படையினர் தமிழர் தாயகப் பகுதிகளை ஆக்கிரமித்து இருந்த காலப்பகுதியில் சிறிலங்கா கூட்டுப்படை தலைமையகத்தின் பிரதானியாகவும் பாதுகாப்புச் செயலராகவும் பதவி வகித்த ஜெனரல் சிறில் ரணதுங்க கூறியுள்ளார்.

'சமாதானத்தில் இருந்து சண்டைக்கு: பிரிவினைவாதத்தில் இருந்து பயங்கரவாதத்துக்கு' எனும் தலைப்பில் தனது பதவிக்கால நினைவுகளை தொகுத்து நூலாக சிறில் ரணதுங்க வெளியிட்டுள்ளார்.

இந்த நூலில் இந்திய அமைதி காக்கும் படை தொடர்பாக அவர் மேலும் குறிப்பிட்டுள்ளதாவது:

இந்தியப் படையினர் இலங்கையில் நிலைகொண்டிருந்த காலப்பகுதியில் தமக்கு எல்லாமே தெரியும் என்ற மனநிலையில் செயற்பட்டனர். திறமை வாய்ந்த சிறிலங்காப் படையினரினதோ, புலனாய்வுத்துறையினரினதோ ஆலோசனைகளையோ உதவிகளையோ அவர்கள் செவிமடுக்கவில்லை.

அவர்களிடம் புலிகளின் கட்டுப்பாட்டு பிரதேசங்கள் தொடர்பான புதிய வரைபடங்கள் கூட இருக்கவில்லை. பழைய வரைபடங்களை வைத்து படை நடவடிக்கை மேற்கொண்டனர். விடுதலைப் புலிகளோ சில வீதிகளின் பெயர்ப் பலகைகளை மாற்றிவிட்டு தப்பிவிட்டார்கள். இவர்கள் சேர தேவையற்ற இடத்துக்கு போய் சேர்ந்துகொண்டார்கள்.

இதனால்தான், இந்தியப் படையினர் வந்த வேலையை முடிக்காமலேயே சிறிலங்காவை விட்டு வெளியே வேண்டிய நிலை ஏற்பட்டது என்று அவர் எழுதியுள்ளார்.

இந்திய - சிறிலங்கா ஒப்பந்தம் கைச்சாத்திடப்பட்ட பின்னர் இந்தியப் பிரதமர் ராஜீவ் காந்தியை கொழும்பில் அணிவகுப்பு மரியாதை செய்த கடற்படைத் தரப்பைச் சேர்ந்தவர் தாக்கிய சம்பவம் தொடர்பாக அவர் குறிப்பிடுகையில்,

குறிப்பிட்ட கடற்படைத் தரப்பைச் சேர்ந்தவரின் முக்கிய நோக்கம் அப்போதைய சிறிலங்கா அரச தலைவர் ஜே.ஆர்.ஜெயவர்த்தனவை அன்றைய நாள் தாக்குவதாகவே இருந்தது என்று கூறியுள்ளார்.

புதினம்