யாழ். மாநகரசபைத் தேர்தலில் மோசடி இடம்பெறலாம்: த.தே.கூ. அச்சம்

யாழ்ப்பாண மாநகர சபைக்கு அடுத்த மாதம் நடைபெறவிருக்கும் தேர்தல் பணிகளுக்காக சிறிலங்காவின் தென்பகுதியில் இருந்து 80 சிங்கள தேர்தல் அதிகாரிகளை அனுப்பிவைப்பதற்கு சிறிலங்கா அரசு திட்டமிட்டிருப்பதாகத் தெரிவித்திருக்கும் தமிழ்த் தேசியக் கூட்டமைப்பு, இதன் மூலம் தேர்தலில் மோசடிகள் இடம்பெறக்கூடிய வாய்ப்புக்கள் உருவாகியிருப்பதாகவும் எச்சரித்துள்ளது.

யாழ்ப்பாணத்தில் நேற்று வியாழக்கிழமை தமிழ்த் தேசியக் கூட்டமைப்பின் சார்பில் அதன் யாழ். மாவட்ட நாடாளுமன்ற உறுப்பினர் சுரேஸ் பிரேமச்சந்திரன் நடத்திய ஊடகவியலாளர் மாநாட்டிலேயே இந்தத் தகவல்கள் தெரிவிக்கப்பட்டன.

யாழ். மாநகர சபைக்கான தேர்தல் நடவடிக்கைகளை மேற்கொள்வதற்கு யாழ்ப்பாணத்திலேயே தேவையானளவு தேர்தல் அதிகாரிகள் உள்ளதாகத் தெரிவித்த சுரேஸ் பிரேமச்சந்திரன், இந்த நிலையில் சிறிலங்காவின் தென்பகுதியில் இருந்து சிங்கள அதிகாரிகளைக் கொண்டுவர வேண்டிய அவசியம் எதுவும் இல்லை எனவும் சுட்டிக்காட்டினார்.

இவ்வாறு சிங்கள தேர்தல் அதிகாரிகளைக் கொண்டுவருவதன் மூலம் இந்தத் தேர்தலில் மோசடிகளைச் செய்வதற்கு அரசு திட்டமிட்டுள்ளதா என்று சந்தேகப்பட வேண்டிய தேவை ஏற்பட்டிருப்பதாகவும் அவர் சுட்டிக்காட்டினார். யாழ்ப்பாணத்தில் உள்ள உதவித் தேர்தல் அலுவலகத்தில் தேர்தல் கடமைகளை மேற்கொள்வதற்கு தேவையான பணியாளர்கள் இருப்பதாகவும் அவர் தெரிவித்தார்.

இதேவேளையில் யாழ். மாநகர சபை மற்றும் வவுனியா நகர சபைத் தேர்தல்களைப் பொறுத்தவரையில் இதற்கான நாள் நெருங்கிக்கொண்டு வருகின்ற போதிலும், மக்கள் அதனையிட்டு அக்கறை காட்டாதவர்களாகவே இருப்பதாக பக்கசார்பற்ற தேர்தல் கண்காணிப்பு அமைப்பு ஒன்று நேற்று தெரிவித்திருக்கின்றது.

'பவ்ரல்' எனப்படும் இந்தத் தேர்தல் கண்காணிப்புக் குழு நேற்று வெளியிட்டுள்ள தனது முதலாவது அறிக்கையில், தேர்தல் பிரச்சாரக் கூட்டங்களில் எதிர்பார்க்கப்படும் மக்கள் தொகையைக் காணக்கூடியதாக இருக்கவில்லை எனவும், ஆதலால் இத்தேர்தல் தொடர்பில் மக்கள் அக்கறையற்றவர்களாக இருப்பதைத்தான் இது பிரதிபலிப்பதாகவும் தெரிவித்துள்ளது.

புதினம்