ஜானக பெரேரா கொலைச் சந்தேக நபர் இராணுவ அடையாள அட்டையைப் பயன்படுத்தியே அநுராதபுரத்துக்குள் நுழைந்தார்: சிறிலங்கா புலனாய்வுத்துறை தகவல்

சிறிலங்காவின் முன்னாள் இராணுவ அதிகாரியான மேஜர் ஜெனரல் ஜானக பெரேரா கொலை வழக்கின் பிரதான சந்தேக நபர் இராணுவ அடையாள அட்டையைப் பயன்படுத்தியே அநுராதபுரம் நகருக்குள் நுழைந்தார் என சிறிலங்காவின் குற்றப் புலனாய்வுத் திணைக்களத்தினர் இன்று நீதிமன்றத்தில் தெரிவித்தார்கள்.

சிறிலங்காவின் சர்ச்சைக்குரிய இராணுவ அதிகாரியான ஜானக பெரேரா பிரதான எதிர்க்கட்சியான ஐக்கிய தேசியக் கட்சியில் இணைந்து கடந்த வட மத்திய மாகாண சபைக்கான பிரதான போட்டியிட்டு மாகாண சபையின் எதிர்க்கட்சித் தலைவராகத் தெரிவு செய்யப்பட்டிருந்தார். அத்துடன் கட்சியின் வட மத்திய மாகாண அமைப்பாளராகவும் அவர் நியமிக்கப்பட்டிருந்தார்.

இந்த நிலையில் 2008 அக்டோபர் மாதம் அநுராதபுரம் நகரில் கட்சி அலுவலகத்தில் நடைபெற்ற கட்சியின் கூட்டம் ஒன்றில் கலந்துகொண்டிருந்தபோது தற்கொலைத் தாக்குதல் ஒன்றின் மூலம் அவர் கொல்லப்பட்டார். இதில் ஜானக பெரேராவின் மனைவி உட்பட 27 பேர் பலியான அதேவேளையில் 100 பேர் வரையில் படுகாயமடைந்தனர்.

இது தொடர்பான வழங்கு இன்று திங்கட்கிழமை காலை அநுராதபுரம் நீதிமன்றத்தில் நீதவான் தர்ஷிகா விமலசிறி முன்னிலையில் விசாரணைக்கு எடுத்துக்கொள்ளப்பட்ட போது, சிறிலங்காவின் குற்றப் புலனாய்வுத் திணைக்களத்தினர் இந்தத் தற்கொலைத் தாக்குதல் தொடர்பான மேலதிக தகவல்களை வெளியிட்டார்கள்.

யக்கலமுல்லைப் பகுதியைச் சேர்ந்த தரைப் படையைச் சேர்ந்த ஒருவருடைய அடையாள அட்டையைப் பயன்படுத்தியே இந்தக் கொலையின் பிரதான சந்தேக நபர் அநுராதபுரம் நகருக்குள் பிரவேசித்ததாக குற்றப்புலனாய்வுத் திணைக்கள அதிகாரிகள் தெரிவித்தனர்.

இது தொடர்பாக குற்றப் புலனாய்வுத் திணைக்களத்தினர் கொடுத்த தகவல்களைக் கவனமாக ஆராய்ந்த நீதவான், காவல்துறையின் பாதுகாப்பில் வைக்கப்பட்டுள்ள பிரதான சந்தேக நபரிடம் மேலதிக விசாரணைகளை நடத்துவதற்கு குற்றப் புனாய்வுத் திணைக்களத்துக்கு அனுமதி வழங்கினார்.

இதேவேளையில் இந்தத் தற்கொலைத் தாக்குதல் சம்பவம் தொடர்பாகக் கைது செய்யப்பட்டு தடுப்புக் காவலில் வைக்கப்பட்டுள்ள சந்தேக நபர்கள் ஆறு பேரையும் இம்மாதம் 31 ஆம் திகதி வரையில் தடுப்புக் காவலில் வைத்திருப்பதற்கான உத்தரவையும் நீதவான் வழங்கினார்.

புதினம்