போர் இடம்பெற்ற பகுதிகளின் பாதுகாப்பை உறுதிப்படுத்தும் வரை மீள்குடியேற்றம் இல்லை: சிறிலங்கா திட்டவட்டமாக தெரிவிப்பு

வடபகுதியில் உள்ள முகாம்களில் தடுத்துவைக்கப்பட்டடுள்ள இடம்பெயர்ந்த மக்களை மீளக்குடியமர்த்துவது தொடர்பாக மேற்குலக நாடுகள் எந்தளவுக்குத்தான் அழுத்தங்களைக் கொடுத்தாலும், போர் இடம்பெற்ற பகுதிகளில் முழுமையான பாதுகாப்பை உறுதிப்படுத்தும் வரையில் அவர்களை மீள குடியமர்த்தப்போவதில்லை என சிறிலங்கா அரசு திட்டவட்டமாக அறிவித்துள்ளது.

இடம்பெயர்ந்த மக்களை மீள்குடியேற்றம் செய்வதில் சிறிலங்கா அரசு காலம் கடத்துவதாக மேற்குலக நாடுகள் தெரிவித்துவரும் குற்றச்சாட்டுக்கள் தொடர்பாகக் கேட்டபோதே சிறிலங்காவின் மூத்த அதிகாரி ஒருவர் இதனைத் தெரிவித்தார்.

"போர் இடம்பெற்ற பகுதிகளில் மீள்குடியேற்ற நடவடிக்கைகளை அவசரமாக மேற்கொள்ள முடியாது. அந்தப் பகுதியில் குடிமக்கள் வசிக்க முடியும் என ஐக்கிய நாடுகள் சபையிடம் இருந்து நாம் பாதுகாப்புச் சான்றிதழ் ஒன்றைப் பெற்றுக்கொள்ள வேண்டும். முக்கியமாக அந்தப் பகுதியில் இருந்து கண்ணிவெடிகள் முழுமையாக அகற்றப்பட்டுவிட்டன என்பதை உறுதிப்படுத்த வேண்டும்" எனவும அவர் சுட்டிக்காட்டினார்.

கண்ணிவெடிகளை அகற்றும் நடவடிக்கைகளை இரண்டு வகையாகப் பிரிக்கலாம். ஒன்று - படைத்துறை ரீதியானது. இரண்டாவது மனிதார்ந்த ரீதியானது. முதலாவது வகை - பிரதான பாதைகளில் கண்ணிவெடிகளை அகற்றுவது. இது தரைப்படையினரால் ஏற்கனவே மேற்கொள்ளப்பட்டுள்ளது.

படை நடவடிக்கைகள் மேற்கொள்ளப்பட்டபோதே பிரதான பாதைகளில் கண்ணிவெடிகள் அகற்றப்பட்டுவிட்டன. இப்போது மனிதார்ந்த கண்ணிவெடிகளை அகற்றும் பணிகளே மேற்கொள்ளப்படுகின்றன எனவும் அவர் தெரிவித்தார்.

இந்த இரண்டாவது கட்டத்தில்தான் பாடசாலைக் கட்டடங்கள், மருத்துவமனைக் கட்டடங்கள், கிராமியக் குளங்கள் போன்ற இடங்களில் புதைத்துவைக்கப்பட்டுள்ள கண்ணிவெடிகள் அகற்றப்படுகின்றன.

மடு திருவிழாவை முன்னிட்டு அந்தப் பகுதியில் உள்ள கண்ணிவெடிகளை அகற்றினோம். தற்போது இரணைமடுப் பகுதியில் நாம் கண்ணிவெடிகளை அகற்றிவருகின்றோம் எனவும் சிறிலங்கா அதிகாரி குறிப்பிட்டார்.

புதினம்