நாய்கள் நடத்திய கண்டனப் பேரணி கொல்லாதே... கொல்லாதே...!

[akootha]

நாய்கள் நடத்திய கண்டனப் பேரணி கொல்லாதே... கொல்லாதே...!

யாழ்ப்பாணத்தில் அண்மைக்காலமாக நாய்களைச் சுட்டுப்போடும் ஒருவகை முறைமை நடந்தவண்ணம் உள்ளன.

இது தொடர்பில் எல்லா நாய்களும் ஒன்று சேர்ந்து கண்டன ஆர்ப்பாட்டப் பேரணி ஒன்றை நடத்தினால் நிலைமை எப்படியிருக்கும். இப்படி யொரு கற்பனை செய்தோம்.

அடேங்கப்பா! இதோ நாய்களின் கண்டன ஆர்ப்பாட்டம்.

கொல்லாதே... கொல்லாதே... எங்கள் இனத்தைக்கொல்லாதே...

கைது செய்... கைது செய்... குற்றவாளியைக் கைது செய்.

அமுல்படுத்து... அமுல்படுத்து... மகிந்த சிந்தனையை அமுல்படுத்து

இவ்வாறு கோஷ­மிட்டவாறு நாய்களின் மாபெரும் ஆர்ப்பாட்டப் பேரணி நகர்ந்து கொண்டிருக்கின்றது. ஆர்ப்பாட்டப் பேரணியில் வளர்ப்பு நாய்கள், தெரு நாய்கள், வீட்டு நாய்கள், பாதுகாப்புக் காவலரணில் வளரும் நாய்கள், மீன் சந்தைகளில் ஆட்சிபுரியும் நாய்கள் என எல்லா நாய்களும் கலந்து கொண்டன. பேரணி யாழ்ப்பாணம் முற்ற வெளியை அண்மித்தது.

முற்றவெளியில் எல்லா நாய்களும் குந்தியிருக்க, நாய்க்கூட்டத் தலைவன் ஜிம்மி மேடையேறிப்பேசினான்.

என் இனமே நன்றிமறவா நம் இனமே உங்கள் அனைவருக்கும் என் வணக்கம்.

முதலில் நன்றி மறந்த மனிதர்களின் துப்பாக்கிச்சூட்டுக்குப் பலியாகிய எங்கள் சோதர நாய்களுக்காக ஒரு நிமிட அஞ்சலி செலுத்துவோம்... எல்லா நாய்களும் எழுந்து கண்ணீர் சொரிந்து ஊளையிட்டு அஞ்சலி செலுத்துகின்றன. அஞ்சலியை நிறைவு செய்வோம்.

நன்றி என்றால் அது நம் இனத்திற்கே உரியது என்ற பாரம்பரியத்தை இன்று வரை கட்டிக்காக்கும் என் இனமே! யாழ்ப்பாணத்தில் இன்று எங்களுக்கு ஏற்பட்ட கதியை நினைக்கும் போது நெஞ்சம் வெடிக்கும் போல் இருக்கிறது.

எங்களை ஏன்தான் சுட்டுக் கொல்கிறார்கள் என்பது எமக்குத் தெரியவில்லை. எந்தவித காரணகாரியமும் இன்றி எங்களைச் சுட்டுச் சுடலையிலும், வீட்டுக்கிணற்றிலும் வேட்பாளர்களின் வீட்டு வாசல்களிலும் வீசிவிட்டு செல்கிறார்கள்.

அவர்கள் தங்களின் எதிர்ப்பை காட்டுவதற்காக இப்படிச் செய்வதாகக் கூறுகிறார்கள்.

எங்கள் உயிர்பற்றி அவர்கள் இம்மியும் சிந்திப் பதாக இல்லை.

தத்தம் பாதுகாப்பிற்கும், பொதிகளை, வெடிமருந்துகளை சோதிப்பதற்கும் எங்கள் இனம் தேவைப்படும்போது நன்றி மறந்து எங்களைச் சுடுவது எவ்வகையில் நியாயமாகும்.

எனவே உலகில் உள்ள ஜீவகாருண்ய அமைப்புகளே! யாழ்ப்பாணத்தில் எங்கள் மீது நடத்தப்படும் வதையைக் கண்டியுங்கள். நிலைமை மோசமடைந்தால், விமான நிலையங்களிலும் மற்றும் சோதனை நடவடிக்கைகளிலும் மோப்பம் பிடிக்கும் பணிகளைப் பகிஷ்கரியுங்கள்.

அப்போது தான் எங்கள் இனத்தின் சிறப்பை ஆறறிவு படைத்த அறிவிலிகள் உணர்வார்கள்.

இவ்வாறு நாய்க்கூட்டத் தலைவன் உரையாற்றி முடிக்க, நன்றி உரை தொடர்ந்தது.

என் அன்புக்குரிய நாய் இனமே இதுவரை மனித இனத்திற்காக வால் ஆட்டி... வால் ஆட்டி நன்றி தெரிவித்த நாம் எப்போதாவது எங்களுக்காக எங்கள் உறவுகளைக் கண்டபோது நன்றி பகர்ந்தோமோ? வால் ஆட்டினோமோ? இல்லவே இல்லை.

ஆகையால் எல்லோரும் எழுந்து வால் ஆட்டி எங்களுக்கு நாங்களே நன்றி கூறிக்கொள்வோம். கூடவே ஒற்றுமைப்படுவோம் என்று உறுதிமொழி கூறிக்கொள்வோம்.

http://www.valampurii.com/online/viewnews.php?ID=20690