கிருபன்

“கூட்டமைப்பின் பெயரை வேறு தரப்புக்கள் பயன்படுத்த முடியாது” - சுமந்திரன் தமிழ்த் தேசியக் கூட்டமைப்பின் பெயரை வேறு தரப்புக்கள் பயன்படுத்த முடியாது என பாராளுமன்ற உறுப்பினர் எம்.ஏ.சுமந்திரன் தெரிவித்துள்ளார். புதிய கூட்டணியானது, ஜனநாயக தமிழ்த் தேசியக் கூட்டமைப்பு என்று கூட்டமைப்பின் பெயரை தமது பாதாகையில் பயன்படுத்த ஆரம்பித்துள்ள நிலையில் அவர் மேற்கண்டவாறு தெரிவித்துள்ளார். மேலும் அண்மையில் கொழும்பில் இடம்பெற்ற கலந்துரையாடலில் கூட்டமைப்பின் பெயரை பயன்படுத்த கூடாது என்ற இணக்கப்பாடு எட்டப்பட்டதாக சுட்டிக்காட்டியுள்ளார். தற்போது அமைந்துள்ள புதிய கூட்டணியில் கூட்டமைப்பின் பெயர் பயன்படுத்தப்பட்டமை குறித்து உரிய நடவடிக்கை எடுக்கப்படும் என சுமந்திரன் குறிப்பிட்டுள்ளார். http://www.samakalam.com/கூட்டமைப்பின்-பெயரை-வேற/

மீன் கரைஞ்சாலும் சட்டிக்குள் இல்லை? - நிலாந்தன் தேசம் என்பது ஒரு பெரிய மக்கள் திரள். தேசியம் என்பது ஒரு மக்கள் கூட்டத்தைத் திரளாகக் கூட்டிக்கட்டுவது. தேசிய அரசியல் என்பது ஒரு மக்கள் கூட்டத்தைத் திரளாகக் கூட்டிக்கட்டும் அரசியற் செய்முறைதான். இந்த அடிப்படையில் சிந்தித்தால் கடந்த சில நாட்களாக நடந்து வருபவை நிச்சயமாக தேசத்தைத் திரட்டும் அரசியல் அல்ல. தமிழரசு கட்சி தனித்துப் போட்டியிடுவது என்று முடிவெடுத்ததன் உள்நோக்கம் பங்காளிக் கட்சிகளை வெளியே தள்ளுவதுதான். வீட்டுச் சின்னத்தைக் கைவிட்டால் பங்காளிக் கட்சிகள் வெல்ல முடியாது என்று தமிழரசு கட்சி நம்புகின்றது. கடந்த பொதுத் தேர்தல் அந்த நம்பிக்கையைத் தோற்கடித்து விட்டது. எனினும் தமிழரசு கட்சி அப்படி நம்புகிறது. எனவே பங்காளிக் கட்சிகளை வெளியே தள்ளியதன் மூலம்,தமிழரசுக் கட்சி அக்கட்சிகளுக்கு ஒரு சவாலை முன்வைக்கின்றது. வீட்டு சின்னம் இல்லாமல் வென்று காட்டுங்கள் என்பதே அந்தச்சவால். ஆனால் அந்தச் சவாலை அவர்கள் வெளிப்படையாகச் சொல்லாமல், தந்திரமாக ஒரு கணிதபூர்வமான காரணத்தை முன்வைக்கிறார்கள். உள்ளூராட்சி மன்றங்களில் கலப்புத் தேர்தல் முறைமை காரணமாக வெற்றி வாய்ப்புகள் குறைவதை தடுப்பதற்காக இவ்வாறு பங்காளி கட்சிகளை தனியே போட்டியிடுமாறு கேட்டதாக அவர்கள் காரணம் கூறுகிறார்கள். அதன்படி பிரிந்து நின்று வாக்கு கேட்டு, அவரவர் தங்கள் தங்கள் பலத்தை நிரூபித்தபின் ஒன்றாகச் சேர்ந்து உள்ளூராட்சி மன்றங்களை நிர்வாகிக்கலாம் என்பதே தமிழரசுக் கட்சி கூறும் விளக்கம். ஆனால்,தமிழரசுக் கட்சி கடந்த 13 ஆண்டுகளாக கூட்டமைப்புக்குள் இருந்த ஆயுதப்போராட்ட மரபில் வந்த கட்சிகளை அகற்றி வருகிறது என்பதே உண்மை. இந்த அடிப்படையில் கடைசிவரை நின்று பிடித்த பங்காளிக் கட்சிகளை வெளியே தள்ளிவிட்டிருக்கிறார்கள். இங்கு வெளித்தள்ளப்பட்டிருப்பது பங்காளிக் கட்சிகள் மட்டுமல்ல ஒரு விதத்தில் மாவையுந்தான். கட்சிக்குள் அவருடைய தலைமை ஸ்தானம் மேலும் பலவீனமடைந்திருக்கிறது என்று தெரிகிறது. கடந்த பல மாதங்களாக பங்காளிக்கட்சிகள் மற்றும் கூட்டமைப்பில் இருந்து ஏற்கனவே விலகிய கட்சிகள் என்று ஐந்துக்கும் குறையாத கட்சிகள் இணைந்து செயல்பட்டு வந்தன. இந்த ஒருங்கிணைப்புக்குள் மாவையும் அவ்வப்போது வந்து போனார். அதனால்தான் விக்னேஸ்வரன் மாவையின் தலைமையின் கீழ் ஐக்கியப்பட்டு உள்ளூராட்சி சபைத் தேர்தலைச் சந்திக்கத் தயார் என்று அறிக்கை விட்டிருந்தார். அதே காலப்பகுதியில் பங்காளிக் கட்சிகள் இணைந்து கூட்டமைப்பின் தலைவருக்கு ஒரு கடிதத்தை எழுதின. பரந்துபட்ட அளவில் கூட்டமைப்பைப் பலப்படுத்த வேண்டும் என்றும் அவர்கள் கோரிக்கை விடுத்திருந்தார்கள். ஆனால் தமிழரசு கட்சி அவ்வாறான பரந்த தளத்திலான ஐக்கியம் ஒன்றைக் கட்டியெழுப்பத் தயாரில்லை என்று தெரிகிறது. எனவே பங்காளிக் கட்சிகள் வெளித்தள்ளப்பட்டிருக்கின்றன. மாவை சேனாதிராஜா, இனி கட்சிக்கு வெளியே சேர்க்கைகளை வைத்துக் கொள்ள முடியாது. இது ஒரு நாள் நடக்கும் என்பது பங்காளி கட்சிகளுக்குத் தெரியும். சம்பந்தருக்குப் பின்னர்தான் அப்படி நடக்கலாம் என்று எதிர்பார்க்கப்பட்டது. ஆனால் சம்பந்தர் உடலாலும்,முடிவெடுக்கும் திறனாலும் தளரத் தொடங்கியிருக்கும் ஒரு பின்னணிக்குள்,இரு தசாப்த காலங்களுக்குமேல் அவர் தலைமை தாங்கிய கூட்டு கலைந்து விட்டது. ஆனால் அதற்குரிய விளக்கத்தை ஒரு தலைவர் என்ற முறையில் அவர் இக்கட்டுரை எழுதப்படும் நாள்வரையிலும் வெளிப்படையாகத் தெரிவித்திருக்கவில்லை. இதுவும் தமிழ் அரசியலின் சீரழிவைக் காட்டுகிறது. கடந்த 13 ஆண்டுகளாக தொடர்ச்சியாக உடைந்து வந்த கூட்டமைப்பு இனி ஒரு கூட்டாக இருக்காது. அதே சமயம் விலகிச் சென்ற தரப்புக்கள் ஒரு புதிய கூட்டை உருவாக்கப் போவதாக அறிவித்திருந்தன. அந்த ஒருங்கிணைப்புக்குள் ஜனநாயக போராளிகள் கட்சி,மணிவண்ணன், ஐங்கரநேசன்,ஆனந்தி சசிதரன், போன்றவர்களை உள்ளீர்த்து ஒரு மிகப்பெரிய கூட்டைக் கட்டியெழுப்பினால் அது தமிழரசுக் கட்சிக்கு தலையிடியாக மாறலாம் என்று எதிர்பார்க்கப்பட்டது. ஆனால் கடந்த வெள்ளிக்கிழமை நடந்த சந்திப்பின்படி அப்படி ஒரு பெரும் கூட்டுக்கான வாய்ப்புக் குறைவு என்றே தெரிகிறது. புதிய கூட்டின் சின்னம் எது என்பதிலும், அதன் செயலாளர் யார் என்பதிலும் விக்னேஸ்வரனோடு ஏனைய கட்சிகளால் உடன்பட முடியவில்லை. விக்னேஸ்வரன் தனது கட்சியின் சின்னமாகிய மான் சின்னத்தை விட்டுக் கொடுக்கத் தயார் இல்லை. அதேசமயம் புளட் இயக்கத்தின் முக்கியஸ்தர் ஒருவர் செயலாளராக இருக்கும் கட்சியின் சின்னத்தை ஏனைய கட்சிகள் வலியுறுத்தியதாக தெரிகிறது. அதை விக்னேஸ்வரனும் மணிவண்ணனும் ஏற்கவில்லை. மணிவண்ணன் விக்னேஸ்வரனின் கட்சியில் சேர்ந்து விட்டார். கடந்த வெள்ளிக்கிழமை நடந்த சந்திப்பில் மணிவண்ணனும் விக்னேஸ்வரனும் ஒரு தரப்பாகவும் ஏனைய கட்சிகள் மற்றொரு தரப்பாகவும் பிரிந்து நின்றதாகத் தெரிகிறது. ஒரு பொது முடிவை எட்டாமல் விக்னேஸ்வரன் இடையிலேயே எழுந்து சென்றதாகவும் கூறப்படுகிறது. சில சமயம் விக்னேஸ்வரன் ஒரு பொது முடிவுக்கு உடன்பட்டிருந்தாலும்கூட புதியகூட்டு தமிழரசுக் கட்சிக்கு சவாலாக மேலெழும் ஒரு புதிய வளர்ச்சிக்குத் தலைமைதாங்கத் தேவையான தலைமைப் பண்பு அவருக்குண்டா? என்ற கேள்வி உண்டு. ஏனென்றால் தன் சொந்தக் கட்சியையே பலப்படுத்தாத ஒரு தலைவர் அவர். அவருடைய கட்சிக்குள் பெருமளவுக்கு அவர் மட்டும்தான் தெரிகிறார். இப்பொழுது மணிவண்ணனையும் இணைத்திருக்கிறார். அவர் கட்சிக்குள் கலந்து பேசி முடிவுகளை எடுப்பதில்லை என்று கட்சி முக்கியஸ்தர்கள் குறைபடுகிறார்கள். கட்சிக்குள் மட்டுமல்ல,கடந்த பல மாதங்களாக ஒருங்கிணைந்து செயற்பட்டு வரும் புதிய கூட்டுக்குள்ளும் அவர் முடிவுகளை கலந்து பேசி எடுப்பதில்லை என்று குற்றம் சாட்டப்படுகிறது. மணிவண்ணனை கட்சிக்குள் இணைக்கும் முடிவும் அவ்வாறு கலந்து பேசி எடுக்கப்படவில்லை என்ற விமர்சனம் உண்டு. கடந்த பொதுத் தேர்தலில் தமிழ்மக்கள் அவருக்கு ஒரு தனிச்சிறப்பான ஆணையை வழங்கினார்கள். வீட்டுச் சின்னத்துக்கு வெளியே வந்தாலும் வெல்ல முடியும் என்ற நம்பிக்கையை ஊட்டும் ஒராணை அது. ஆனால் அந்த மக்கள் ஆணையை ஒரு பெரும் கட்சியாக நிறுவனமயப்படுத்த அவரால் முடியவில்லை. இவ்வாறு தன் சொந்தக் கட்சியையே கட்டியெழுப்ப முடியாத ஒருவர் நீண்ட பாரம்பரியத்தைக் கொண்டதும், உள்ளதில் பலமானதுமாகிய, தமிழரசுக் கட்சிக்கு எதிராக ஒரு புதிய கூட்டை எப்படிக் கட்டியெழுப்புவார் என்ற கேள்விக்கு விடை முக்கியம். மேலும் புதிய கூட்டுக்குள் ஜனநாயக போராளிகள் கட்சியை இணைப்பதற்கும் விக்னேஸ்வரன் இணங்கவில்லை. அதற்கு அவர் கூறிய காரணம்,ஏற்கனவே கட்சிகளின் ஒருங்கிணைப்புக்குள் ஜனநாயகப் போராளிகள் கட்சி உள்ளீர்க்கப்படவில்லை என்பதனால்,முதலில் ஏற்கனவே ஒருங்கிணைந்து செயல்பட்ட கட்சிகள் தங்களுக்கிடையே ஒரு புரிந்துணர்வு உடன்படிக்கைக்கு வந்தபின்,ஜனநாயக போராளிகள் கட்சியையும் இணைப்பது தொடர்பாக சிந்திக்கலாம் என்று காரணம் கூறியுள்ளார். காரணம் எதுவாகவும் இருக்கலாம். ஆனால் கடந்த வெள்ளிக்கிழமை நடந்த சந்திப்புக்குப் பின் யார் யார் ஒன்றுபட்டிருக்கிறார்கள்? யார் யார் பிரிந்து நிற்கிறார்கள்? என்று பார்த்தால், முன்பு ஆயுதப் போராட்டத்தில் ஈடுபட்ட அமைப்புகள் யாவும் ஒன்றாகிவிட்டன. இதில் முன்னாள் விடுதலைப் புலிகள் இயக்கத்தவரின் கட்சியும் அடங்கும். அதே சமயம் ஆயுதப் போராட்ட மரபில் வராத அரசியல்வாதிகள் விலகி நிற்கிறார்கள். இவ்வாறாக தமிழ்த்தேசியப் பரப்பில் இப்பொழுது மொத்தம் நான்கு கூட்டுக்கள் அல்லது நான்கு சேர்க்கைகள் மேலெழுந்திருக்கின்றன. சிலசமயம் எதிர்காலத்தில் இவற்றுட் சில தங்களுக்கிடையே ஒரு புதிய ஒருங்கிணைப்புக்கு போக முடியும். ஆனால் இப்போதுள்ள களநிலவரத்தின்படி ஒரு தேர்தல் நடக்குமாக இருந்தால்,தமிழ் வாக்குகள் கட்சிகளால் சிதறடிக்கப்படும் ஆபத்தே அதிகம் தெரிகிறது. முன்னைய தேர்தல்களின்போது ஒரு பழமொழி கூறப்படுவதுண்டு.“மீன் கரைஞ்சாலும் சட்டிக்குள்தான் இருக்கிறது” என்று. ஆனால் இனி அப்படிக்கூற முடியாது. கடந்த பொதுத் தேர்தல் கற்றுத்தந்த பாடம் அது. கடந்த பொதுத் தேர்தலின்போது கூட்டமைப்பு அதன் ஏகபோகத்தை இழந்தது. வீட்டு சின்னத்துக்கு வெளியே போனால் வெல்ல முடியாது என்ற மாயை உடைக்கப்பட்டது. ஆனால் அதேசமயம் கூட்டமைப்புக்கு எதிரான மாற்று அணி ஒரு பலமான கூட்டாக உருத்திரளவில்லை. அதனால் கூட்டமைப்பு இழந்த ஆசனங்களில் மூன்றை அரச சார்பு கட்சிகள் வென்றன. அதாவது மீன் சட்டிக்கு வெளியே போய்விட்டது. இனிமேலும் அதுதான் நிலைமை என்று தெரிகிறது. தமிழ் மக்கள் தேசமாகத் திரள்வதற்கு பதிலாக கட்சிகளாக சிதறப் போகிறார்களா?அதுவும் இப்படிப்பட்ட உடைவுகள் எப்படிப்பட்ட ஒரு காலகட்டத்தில் நிகழ்ந்திருக்கின்றன? அரசாங்கம் தமிழ்ப் பிரதிநிதிகளை பேச்சுவார்த்தைக்கு அழைத்திருக்கும் ஒரு காலகட்டம் இது. அதே சமயம் கனடாவில் புலம்பெயர்ந்த தமிழ்மக்கள் ஒரு திருப்பகரமான வெற்றியைப் பெற்றிருக்கும் காலகட்டமும் இது பேச்சுவார்த்தைக் காலங்களில் பேரத்தைக் குறையவிடக்கூடாது. பேரம் குறையக்கூடாது என்றால், தமிழ்மக்களைப் பொறுத்தவரை, தேசத் திரட்சியைப் பலப்படுத்த வேண்டும். ஆனால் எந்த ஒரு தமிழ்க் கட்சியிடமும் அந்தத் தரிசனம் இருப்பதாகத் தெரியவில்லை. ஒருபுறம் புலம்பெயர்ந்த தமிழ் மக்கள் நீதிக்கான போராட்டத்தில் மேலும் ஒரு வெற்றியை பெற்றிருக்கும் அதே காலப்பகுதியில் தாயகத்தில் உள்ள கட்சிகளோ தமிழ் மக்களை தேசமாகத் திரட்டுவதற்குப் பதிலாக கட்சிகளாக,வாக்காளர்களாகச் சிதறடித்துக் கொண்டிருக்கிறார்கள். http://www.nillanthan.com/5842/

இங்கிலாந்தில் ஒருமுறை மட்டுமே பயன்படுத்தும் பிளாஸ்டிக் பொருட்களுக்கு தடை! இங்கிலாந்தில் ஒக்டோபர் மாதம் முதல் ஒருமுறை மட்டுமே பயன்படுத்தும் பிளாஸ்டிக் பொருட்களுக்கு தடை விதிக்கப்படும் என அந்நாட்டு அரசாங்கம் அறிவித்துள்ளது. வளர்ந்து வரும் பிளாஸ்டிக் பிரச்சினையை சமாளிக்க, எடுத்துச்செல்லும் இடங்கள், உணவகங்கள் மற்றும் அருந்தகங்கள் ஒருமுறை பயன்படுத்தும் பிளாஸ்டிக் கட்லரிகள், தட்டுகள் மற்றும் கிண்ணங்களைப் பயன்படுத்துவதை நிறுத்த வேண்டும். பசுமைக் குழுக்கள் இந்த நடவடிக்கையை வரவேற்றன. ஆனால் அதைச் செயல்படுத்த வணிகங்களுக்கு கூடுதல் ஆதரவு தேவை என்று பிரிட்டிஷ் டேக்அவே தெரிவித்தது. எடுத்துச்செல்லும் பொருட்கள் விலை உயர்ந்ததாக மாறும், ஏனெனில் சிறிய நிறுவனங்கள் அதிக பொதியிடல் செலவுகளை நுகர்வோருக்கு அனுப்ப வேண்டிய கட்டாயத்தில் இருக்கும் என லங்காஷயரில் ஃபிஷ் அண்ட் சிப்ஸ் உணவகத்தை நடத்திவரும் மற்றும் பிரிட்டிஷ் டேக்அவே பிரச்சாரத்தின் துணைத் தலைவரான ஆண்ட்ரூ க்ரூக் கூறுகிறார். சுற்றுச்சூழல் மற்றும் கிராமப்புற விவகாரங்களுக்கான திணைக்களத்தின் மதிப்பீட்டின்படி இங்கிலாந்து ஒரு வருடத்திற்கு 2.7 பில்லியன் கட்லரிகள், பெரும்பாலும் பிளாஸ்டிக், மற்றும் 721 மில்லியன் ஒற்றை உபயோகத் தட்டுகளைப் பயன்படுத்துகிறது. https://athavannews.com/2023/1320151

யாழ்.பலாலி சர்வதேச விமான நிலையத்தினை வந்தடைந்தார் ஜனாதிபதி! யாழ்ப்பாணத்தில் இடம்பெறும் பல்வேறு நிகழ்வுகளில் கலந்து கொள்வதற்காக இன்று (ஞாயிற்றுக்கிழமை) ஜனாதிபதி யாழ்ப்பாணத்திற்காக விஜயம் மேற்கொண்டுள்ளார். அதற்கமைய ஜனாதிபதி ரணில் விக்கிரமசிங்க விசேட விமானத்தின் மூலம் பலாலி சர்வதேச விமான நிலையத்தை வந்தடைந்துள்ளார். இதன்போது ஜனாதிபதியினை முன்னாள் கல்வி இராஜாங்க அமைச்சர்,வடக்கு மாகாண ஆளுநர், கடற்தொழில் அமைச்சர் ஆகியோர் வரவேற்றிருந்தனர். https://athavannews.com/2023/1320215

ஜனாதிபதிக்கு எதிர்ப்பு தெரிவித்து போராட்டம் நடத்த சென்ற உறவுகளை பேருந்தில் தடுத்து நிறுத்திய இராணுவம்! காணாமல் ஆக்கப்பட்டவர்களின் குடும்பங்களை யாழ்ப்பாணம் நோக்கி அழைத்துச் செல்லும் பேருந்தை இலங்கை பாதுகாப்புப் படையினர் தடுத்து நிறுத்தியுள்ளனர். ஜனாதிபதி ரணில் விக்கிரமசிங்க யாழ்ப்பாணத்திற்கு விஜயம் செய்துள்ள நிலையில் அதற்கு எதிர்ப்பு தெரிவித்து ஆர்ப்பாட்டத்தை நடத்த தீர்மானிக்கப்பட்டது. இந்நிலையில் வட்டுவாகலில் பேருந்தை நிறுத்தி, பேருந்தின் சாரதி மற்றும் அதில் சென்றவர்களின் விபரங்களை பொலிஸார் பதிவு செய்தனர். கிளிநொச்சி மற்றும் வவுனியாவில் இருந்து காணாமல் ஆக்கப்பட்டவர்களின் குடும்பங்களை ஏற்றிச் சென்ற பேருந்துகளும் படையினரால் தடுத்து நிறுத்தப்பட்டன. https://athavannews.com/2023/1320238

கனேடிய பிரதமர் அலுவலகத்தின் வற்புறுத்தலின் பேரில் ராஜபக்ஷக்களுக்கு தடை கனேடிய பிரதமர் அலுவலகத்தின் வற்புறுத்தலின் பேரில் இரண்டு முன்னாள் ஜனாதிபதிகளின் பெயர்கள் தடைபட்டியலில் சேர்க்கப்பட்டுள்ளதாக இராஜதந்திர வட்டாரங்கள் தெரிவிக்கின்றன. மனித உரிமை மீறல்களில் சம்பந்தப்பட்டவர்கள் மட்டுமல்ல, அதற்கு தலைமை வகித்தவர்களும் இணைக்கப்பட வேண்டும் என கனேடிய பிரதமர் அலுவலகம் கருதுகின்றது. போரின் போது மேற்கொள்ளப்பட்ட மனித உரிமை மீறல்களுக்காக இலங்கையின் முன்னாள் ஜனாதிபதிகள் மஹிந்த மற்றும் கோட்டாபய ராஜபக்சவுக்கு கனடா பயணத் தடை விதித்திருந்தது. இதேவேளை கனடாவில் உள்ள புலம்பெயர் தமிழர்களின் அழுத்தம் காரணமாக பொருளாதாரத் தடைகள் விதிக்கப்பட்டுள்ளன என உயர்ஸ்தானிகர் ஹர்ஷ நவரத்ன குற்றம் சாட்டியுள்ளார். ஐ.நா மனித உரிமைகள் பேரவையின் கோரிக்கையை அவர் பின்பற்றவில்லை என்பதனாலேயே இந்த நிலைமைக்கு வழிவகுத்தது என்றும் கூறியுள்ளார். https://athavannews.com/2023/1320226

கனடா விதித்திருக்கும் தடை -நிலாந்தன். தாயகத்தில் கூட்டமைப்பு உள்ளூராட்சி மன்றத் தேர்தலையொட்டிக் குலைந்து போய் நிற்கும் ஒரு காலகட்டத்தில் புலம்பெயர்ந்த தமிழ்ப் பரப்பில் கனடாவில் வாழும் தமிழர்கள் ஒரு திருப்பகரமான வெற்றியை பெற்றிருக்கிறார்கள். இலங்கைத் தீவின் இரண்டு முன்னாள் ஜனாதிபதிகளுக்கு எதிராக கனடா தடை விதித்திருக்கிறது. ஏற்கனவே அமெரிக்கா நாட்டின் தளபதிக்கு எதிராக தடை விதித்திருக்கிறது. அமெரிக்காவின் தடையோடு ஒப்பிடுகையில் கனடாவின் தடை பலமானது. அமெரிக்கா பயணத்தடை மட்டும்தான் விதித்திருக்கிறது. ஆனால் கனடா பயணத் தடையோடு சேர்த்து தடை விதிக்கப்பட்டவர்கள் கனடாவில் சொத்துக்களை வைத்திருப்பதை, முதலீடுகள் செய்வதை அல்லது கனடாவில் உள்ள முதலீட்டாளர்கள் மேற்படி முன்னாள் ஜனாதிபதிகளோடு தொடர்பு கொள்வதை தடை செய்கின்றது. கனடா ஏற்கனவே குறிப்பிட்டுச் செல்லக்கூடிய இரண்டு தீர்மானங்களை நிறைவேற்றியது. தமிழர்கள் செறிவாக வாழும் ஒன்றாரியோ மாநில சட்டமன்றமும் கனேடிய மத்திய நாடாளுமன்றமும் இலங்கையில் இடம்பெற்ற இனப்படுகொலை தொடர்பாக இரு வேறு தீர்மானங்களை நிறைவேற்றின. அத்தீர்மானங்களின் அடுத்த கட்டமாக இரண்டு முன்னாள் ஜனாதிபதிகளுக்கு எதிராக தடை விதிக்கப்பட்டிருக்கிறது. நீதியைக் கோரும் ஒரு மக்கள் கூட்டத்தை பொறுத்தவரை இது ஒரு திருப்பகரமான முன்னேற்றம். அமெரிக்க கண்டத்தைச் சேர்ந்த இரண்டு பலமான நாடுகள் ஈழத் தமிழர்களின் நீதிக்கான போராட்டத்துக்கு உற்சாகமூட்டும் சமிக்கைகளைக் காட்டியிருக்கின்றன. மூத்த ராஜபக்ச சகோதரர்கள் இருவரும் இப்பொழுது பதவியில் இல்லை. ஆனாலும் அவர்களால் கட்டுப்படுத்தப்படும் ஒரு நாடாளுமன்றம்தான் நாட்டை இப்பொழுதும் நிர்வகிக்கின்றது. இந்த இரண்டு சகோதரர்களும் ஒற்றை யானையாக நாடாளுமன்றத்தில் நிற்கும் ஜனாதிபதி ரணில் விக்கிரமசிங்கவின் மறைவில் மீண்டும் பதவிகளுக்கு வராமல் தடுப்பதும் இத்தகைய தடைகளின் நோக்கங்களில் ஒன்று எனலாம். ரணில் விக்ரமசிங்க தன்னுடைய பதவியை பாதுகாப்பதற்காக இரண்டு ராஜபக்சக்களையும் மீண்டும் ஏதும் பொறுப்புகளில் அமர்த்தக்கூடாது என்ற முன்னெச்சரிக்கை தடையில் உண்டு. மேலும் கோட்டாபய ராஜபக்சவின் குடும்பம் அமெரிக்காவில் உள்ளது. இந்நிலையில் கனடாவை பின்பற்றி அமெரிக்காவும் முடிவெடுத்தால் அவர் தனது குடும்பத்தை அமெரிக்காவில் சென்று சந்திப்பதும் தடுக்கப்பட்டு விடும் ஏற்கனவே குறிப்பிட்ட சில தளபதிகளுக்கு அவ்வாறு தடை உண்டு. அவர்கள் வெளிநாடுகளில் படிக்கும் தங்கள் பிள்ளைகளைச் சென்று சந்திக்க முடியாமல் இருக்கிறது என்று சுட்டிக்காட்டப்படுகிறது. மேற்படி தடைகள் மட்டும் ஈழத் தமிழர்களுக்கு மீட்சியைப் பெற்று தராது. ஆனால் இத்தடைகள் நீதிக்கான ஈழத் தமிழர்களின் போராட்டத்திற்கு உற்சாகமூட்டக் கூடியவை. கனடாவின் தடை விதிக்கப்பட்ட நால்வரில் இருவர் முன்னாள் ஜனாதிபதிகள். ஒரே குடும்பத்தை சேர்ந்தவர்கள். ஏனைய இருவரும் படைத்தரப்பைச் சேர்ந்தவர்கள். ஒருவர் மிருசுவில் கொலை வழக்கில் நீதிமன்றத்தால் குற்றவாளியாக தீர்க்கப்பட்டவர். மற்றவர் ரவிராஜின் கொலை வழக்கு,கொழும்பில் மாணவர்கள் காணாமல் போனமை போன்ற வழக்குகளோடு சம்பந்தப்பட்டவர். இதில் மிருசுவில் படுகொலையில் குற்றவாளியாக காணப்பட்ட சுனில் ரட்னாயக்காவை முன்னாள் ஜனாதிபதி கோத்தபாய தனது பதவிக்காலத்தில் பொது மன்னிப்பு வழங்கி விடுதலை செய்தார். அதாவது இலங்கையின் அரசுத் தலைவர் ஒருவரால் பொது மன்னிப்பு வழங்கப்பட்ட ஒருவரை கனடா குற்றவாளி என்று கூறி தன் நாட்டுக்குள் வருவதற்கும் முதலீடு செய்வதற்கும் சொத்துக்களை வைத்திருப்பதற்கும் தடை விதித்திருக்கிறது. இதன் மூலம் நாட்டின் மிக உயர் நிறைவேற்று அதிகாரத்தை கொண்ட ஒருவர் வழங்கிய பொது மன்னிப்பை கனடா நிராகரித்து இருக்கிறது. மேலும் இத்தடை குறித்த அறிவிப்பில் 1983 இல் இருந்து 2009 வரையிலுமான காலப்பகுதியில் இழைக்கப்பட்ட குற்றங்கள் என்று கூறப்பட்டிருக்கிறது. இதன் மூலம் குறிப்பிட்ட காலப்பகுதிக்குள் குற்றங்கள் புரிந்த எல்லாத் தரப்புக்களும் பொறுப்பு கூற வேண்டிய ஒரு நிர்ப்பந்தத்தை கனடா ஏற்படுத்தியிருக்கிறது. இத்தடைகளுக்காக பல ஆண்டுகள் உழைத்ததாக கனேடிய நாடாளுமன்ற உறுப்பினரும் ஈழத்தமிழருமான ஹரி ஆனந்தசங்கரி கூறியிருக்கிறார். அமெரிக்கா,கனடா ஆகிய நாடுகளைப் பின்பற்றி ஐரோப்பிய சமூகத்தைச் சேர்ந்த நாடுகளும் தடைகளை விதிக்குமாறு கேட்க வேண்டும் என்றும் அவர் கூறியிருக்கிறார். கனடாவில் 3 லட்சத்துக்கும் குறையாத ஈழத் தமிழர்கள் புலம்பெயர்ந்து வாழுகிறார்கள். இந்தத் தொகை 5 லட்சம் வரை வரும் என்று உத்தியோகப்பற்றற்ற புள்ளிவிவரங்கள் தெரிவிக்கின்றன. தமிழ் மக்கள் புலம்பெயர்ந்து வாழும் நாடுகளில் அதிக தொகை மக்கள் வாழும் நாடு கனடா தான். கனேடியத் தமிழ் சமூகம் நாடாளுமன்றத்திற்கு தமது பிரதிநிதிகளை அனுப்பும் அளவுக்குச் செறிவாகக் காணப்படுகிறது. மிகக் குறுகிய காலத்தில் முலோபாய கொள்கைவகுப்பு வட்டாரங்களுக்குள் செல்வாக்கு செலுத்தக்கூடிய ஒரு வளர்ச்சியை படிப்படியாக பெற்று வருகிறது. இவ்வாறு புலம்பெயர்ந்து வாழும் நாடுகளில் உள்ள கொள்கை வகுப்பாளர்களின் மீது செல்வாக்கு செலுத்தக்கூடிய ஒரு வளர்ச்சியை தமிழ் மக்கள் பெறுவார்களாக இருந்தால்,நீண்ட எதிர்காலத்தில் நீதிக்கான போராட்டத்தில் தமிழ் மக்கள் மேலும் முன்னேற இடம் உண்டு. கனடாவின் மேற்படி தடைகள் அமெரிக்காவின் தடைகளோடு ஒப்பிடுகையில் பலமானவை. அதே சமயம் அமெரிக்காவின் தடைகள் இப்பொழுது பதவியில் இருக்கும் ஒரு தளபதிக்கு எதிரானவை. கனடாவின் தடைகள் பதவி இழந்த இரண்டு முன்னாள் ஜனாதிபதிகளுக்கு எதிரானவை. உலகில் போர்க் குற்றம் சாட்டப்பட்ட பல தலைவர்கள் பதவி இழந்த பின்னர்தான் விசாரிக்கப்பட்டிருக்கிறார்கள். கம்பூச்சியாவிலும் ஆபிரிக்க மற்றும் கிழக்கு ஐரோப்பிய நாடுகளிலும் அதற்கு முன்னுதாரணங்கள் உண்டு. நிலை மாறுகால நீதி என்பது பொதுவில் தோற்றவர்களை விசாரிக்கும் ஒரு பொறிமுறைதான். 2015ல் நிலைமாறு கால நீதிக்கான தீர்மானம் நிறைவேற்றப்பட்டபோது ராஜபக்சக்கள் தேர்தலில் தோற்கடிக்கப்பட்டிருந்தார்கள். எனினும் ராஜபக்சக்களைத் தோற்கடித்து வெற்றி பெற்ற நல்லாட்சி என்று அழைக்கப்படுகின்ற ரணில்+மைத்திரி அரசாங்கம் மறைமுகமாக போர் வெற்றியையும், வெற்றி நாயகர்களையும் பாதுகாத்தது. இப்பொழுதும் நிலைமை அப்படித்தான். ராஜபக்சக்கள் தங்கள் சொந்த மக்களால் தோற்கடிக்கப்பட்டிருக்கும் ஒரு நிலையில் அவர்களைப் பாதுகாக்க ஒற்றை யானையாகிய ரணில் இருக்கிறார். அவர் ராஜபக்சக்களையும் பாதுகாப்பார் அதோடு கனடாவின் தடையை வைத்து ராஜபக்சக்களின் மீதான தனது பிடியை மேலும் இறுக்கிக் கொள்வார். அதாவது மேற்படி தடைகள் அவற்றின் தர்கபூர்வ விளைவுகளை பொறுத்தவரை ரணிலுக்குச் சாதகமானவை. அதே சமயம் இதில் ராஜபக்சங்களுக்கும் ஒரு நன்மை உண்டு. உள்ளூர் தேர்தல்களில் அவர்களின் வாக்கு வங்கியை இது பாதுகாக்கும், பலப்படுத்தும். நாட்டுக்காக வீரமாகப் போராடிய சகோதரர்களை தமிழர்கள் வெள்ளைக்காரர்களோடு சேர்ந்து தண்டிக்கப் பார்க்கிறார்கள் என்று நம்பும் சிங்களப் பொதுசனம் ராஜபக்சங்களுக்கு மீண்டும் வாக்குகளை அள்ளிக் கொடுக்க முடியும். அதாவது இத்தடை ஒருபுறம் ராஜபக்ச குடும்பத்தை அனைத்துலக அளவில் அவமதிப்பது. அவர்களுடைய அந்தஸ்தை குறைப்பது. அவர்களுடைய போக்குவரத்து நடமாட்டங்களை கட்டுப்படுத்துவது. அவர்களுடைய முதலீட்டு வாய்ப்புகளை குறைப்பது. அதேசமயம் இன்னொரு பக்கம் உள்ளூரில் அவர்களை,அவர்களுடைய வாக்கு வங்கியை அது பாதுகாக்கும். நாட்டில் உள்ளூராட்சி மன்ற தேர்தல் நடக்கலாம் என்று எதிர்பார்க்கப்படுகிறது. உண்மையில் ஒரு தேர்தலை வைத்தால் அது ரணில் விக்கிரமசிங்கவைப் பொறுத்தவரை விசப்பரீட்சையாகவும் அமையலாம். ஒரு தேர்தலில் அரசாங்கத்துக்கு மக்கள் ஆணை இல்லை என்பது வெளித்தெரியவந்தால் அரசாங்கம் மேலும் பலவீனமடைந்து விடும். எனவே அப்படி ஒரு அமில பரிசோதனையில் இறங்க ஜனாதிபதி தயாரா என்றும் பார்க்க வேண்டும். சில சமயம் தேர்தல் நடந்தால், அதில் ராஜபக்ச குடும்பத்தின் வாக்கு வங்கியை பாதுகாப்பதற்கு கனடாவின் மேற்படி தடைகளும் ஒரு காரணமாக அமையும். இலங்கைத் தீவின் துயரம் அதுதான். தமிழ் மக்களுக்கு நீதியைப் பெற்று தரக்கூடிய எந்த ஒரு நடவடிக்கையும் சிங்கள மக்கள் மத்தியில் யுத்த வெற்றி நாயகர்களைப் பலப்படுத்தும் என்பது. https://athavannews.com/2023/1320181

சீறிப்பாயும் காளைகள் : அவனியாபுரம் ஜல்லிக்கட்டு தொடங்கியது! KaviJan 15, 2023 08:47AM தமிழகமே எதிர்பார்த்த அவனியாபுரம் ஜல்லிக்கட்டு போட்டி இன்று (ஜனவரி 15) தொடங்கி நடைபெற்று வருகிறது. போட்டியை அமைச்சர்கள் பழனிவேல் தியாகராஜன், மூர்த்தி ஆகியோர் கொடியசைத்துத் தொடங்கி வைத்தனர். வாடிவாசலிலிருந்து முதலில் அவிழ்த்துவிடப்பட்ட மாட்டை அடக்கிய இளைஞருக்கு அமைச்சர் மூர்த்தி ஒரு தங்கக் காசை பரிசாக வழங்கினார். அடுத்தடுத்து காளைகள் அவிழ்த்துவிடப்படும் நிலையில், மாடுபிடி வீரர்கள் உற்சாகமாக விளையாடி வருகின்றனர். 800காளைகள், 300 வீரர்கள், இந்த போட்டியில் பங்கேற்றுள்ளன. இதில் வெற்றி பெறுபவர்களுக்கு முதல் பரிசாக முதல்வர் சார்பில் காரும், அமைச்சர் உதயநிதி ஸ்டாலின் சார்பில் இரு பைக்குகளும் வழங்கப்படவுள்ளது. இதுதவிர சைக்கிள், தங்கக் காசு, பீரோ, கட்டில் உள்ளிட்ட பரிசுகளும் வழங்கப்படுகின்றன. 3 பேருக்குக் காயம் இன்று காலை போட்டி தொடங்குவதற்கு முன்னதாக காளைகள் அழைத்து வரும் போதே மாடுகள் முட்டி 3 பேர் காயமடைந்து மருத்துவமனையில் அனுமதிக்கப்பட்டுள்ளனர். அதுபோன்று போட்டி நடைபெறும் இடத்தில் 30 மருத்துவர்கள், 54 செவிலியர்கள் அடங்கிய 3 மருத்துவர் குழு சிகிச்சை அளிக்க தயாராக உள்ளன. பாதுகாப்புப் பணியில் ஆயிரத்துக்கும் மேற்பட்ட போலீசார் பங்கேற்றுள்ளனர். https://minnambalam.com/tamil-nadu/avaniyapuram-jallikattu-has-started/

உக்ரைன் தலைநகரில் ரஷியா ஏவுகணை மழை..!! உக்ரைன் தலைநகர் கீவில் ரஷிய படைகள் ஏவுகணை மழை பொழிந்ததில் கட்டிடங்கள் தரைமட்டமாகின. தினத்தந்தி கீவ், அமெரிக்கா தலைமையிலான நேட்டோ ராணுவ கூட்டமைப்பில் இணைந்து பாதுகாப்பு தேட முயன்ற உக்ரைன் மீது கடந்த பிப்ரவரி மாதம் ரஷியா போர் தொடுத்தது. உக்ரைனின் ராணுவ நிலைகள் மட்டுமே இலக்கு என கூறி போரை தொடங்கிய ரஷியா பின்னர் குடியிருப்புகள், பள்ளிக்கூடங்கள், ஆஸ்பத்திரிகள், மின்நிலையங்கள் என தாக்குதல்களை விரிவுப்படுத்தியது. அந்த வகையில் தற்போது ரஷிய படைகள் உக்ரைனின் பொதுஉள்கட்டமைப்புகளை மட்டுமே குறிவைத்து சரமாரியாக தாக்குதல்களை நடத்தி வருகின்றன. கீவ் நகர் மீது மீண்டும் கவனம் போர் தொடங்கிய சமயத்தில் தலைநகர் கீவை கைப்பற்ற ரஷிய படைகள் தீவிரமாக முயன்றன. ஆனால் உக்ரைன் ராணுவத்தின் கடுமையான எதிர்ப்பால் ரஷிய படைகள் அங்கிருந்து பின்வாங்க வேண்டிய நிலை ஏற்பட்டது. அதன்பிறகு உக்ரைனின் கிழக்கு மற்றும் தெற்கு பகுதியில் உள்ள நகரங்கள் மீது கவனத்தை திருப்பிய ரஷிய படைகள் கடுமையான தாக்குதல்கள் மூலம் பல நகரங்களை ஆக்கிரமித்தன. Also Read - பொருளாதார நெருக்கடியில் இருந்து மீள ஒரே வாய்ப்புதான் உள்ளது: இலங்கை அதிபர் ரணில் இந்த நிலையில் கடந்த 2 மாதங்களுக்கு முன்பு ரஷிய படைகள் மீண்டும் கீவ் நகர் மீது கவனத்தை குவித்தன. அங்கு ஏவுகணைகள் மற்றும் டிரோன்களை பயன்படுத்தி சரமாரியாக தாக்குதல்களை நடத்தின. எனினும் புத்தாண்டு (ஜனவரி 1-ந் தேதி) முதல் கீவ் நகரில் தாக்குதல்கள் நடத்தப்படவில்லை. ஏவுகணை மழை இந்த நிலையில் நேற்று அதிகாலை கீவ் நகர் மீது ரஷிய படைகள் அடுத்தடுத்து ஏவுகணைகளை வீசி தாக்கின. ரஷியாவின் ஏவுகணை மழையில் கீவ் நகரம் அதிர்ந்தது. இதில் 18 வீடுகள் உள்பட ஏராளமான கட்டிடங்கள் இடிந்து சேதமடைந்தன. ஏவுகணை தாக்குதலில் பல கட்டிடங்கள் தீப்பற்றி எரிந்தன. எனினும் இந்த தாக்குதலில் உயிரிழப்பு அல்லது காயங்கள் ஏற்பட்டதாக தகவல்கள் இல்லை. முன்னதாக உக்ரைனின் கிழக்கு பகுதியில் உள்ள டொனட்ஸ்க் மாகாணத்தில் உள்ள சோலிடர் நகரை கைப்பற்றி விட்டதாக ரஷியா நேற்று முன்தினம் அறிவித்தது. ஆனால் அதை மறுத்த உக்ரைன் அதிபர் ஜெலன்ஸ்கி, சோலிடர் நகரில் சண்டை தொடர்ந்து வருவதாக தெரிவித்துள்ளார். https://www.dailythanthi.com/News/World/russian-missiles-hit-ukraines-capital-kyiv-kharkiv-and-more-879291

நேபாள விமான விபத்து 32 பேர் பலி ;16 உடல்கள் மீட்பு நேபாளத்தின் பொகாராவில் 68 பயணிகளுடன் சென்ற விமானம் விபத்துக்குள்ளனது. தினத்தந்தி காத்மாண்டு, நேபாளத்தின் பொக்காரா விமான நிலையத்தில் 68 பயணிகள் மற்றும் விமான ஊழியர்கள் 4 பேர் உள்பட 72 பேருடன் வந்த எட்டி ஏர்லைன்ஸ் விமானம் தரையிறங்கும்போது திடீரென தீப்பற்றி விபத்துக்குள்ளானது. இந்த் விவாமன்ம் திரிபுவன் சர்வதேச விமான நிலையத்தில் இருந்து காலை 10:33 மணிக்கு புறப்பட்டது. இந்த விபத்தில் 32 பேர் உயிரிழந்ததாக பல தகவல்கள் தெரிவிக்கின்றன.இதுவரை 16 உடல்கள் மீட்கப்பட்டுள்ளதாக நேபாள ராணுவ செய்தித் தொடர்பாளர் தெரிவித்து உள்ளார். காட்மாண்டுவில் இருந்து விமானம், பொக்காரா சென்றதாக தெரிகிறது. விமானம் ஓடு தளத்தில் இருந்து விலகி சென்றதாக தெரிகிறது. விமானம் ஓடு தளத்தில் இருந்து விலகி சென்றதால் தீ பிடித்து எரிந்ததாக கூறப்படுகிறது.மீட்புப் பணிகள் நடைபெற்று வருகின்றன, தற்போதைக்கு விமான நிலையம் மூடப்பட்டுள்ளது எட்டி ஏர்லைன்ஸ் செய்தித் தொடர்பாளர் சுதர்சன் பர்தாவுலா கூறுகையில், "2 கைக்குழந்தைகள் உட்பட 10 வெளிநாட்டினர் விமானத்தில் இருந்தனர்.மேலும் 53 நேபாளிகள், 5 இந்தியர்கள் 4 ரஷியர்கள் ஒரு அயர்லாந்து நாட்டை சேர்ந்தவர் 2 பேர் கொரியாவை சேர்ந்தவர்கள் (2), அர்ஜென்டினா, பிரான்ஸ் தலா ஒருவர் என மொத்தம் 67 பேர் விமானத்தில் பயணித்ததாக கூறி உள்ளார். இடிபாடுகளில் எரியும் தீ காரணமாக மீட்பு பணிகள் கடினமாக உள்ளது என்று நேபாள பத்திரிகையாளர் திலீப் தாபா தெரிவித்து உள்ளார். விபத்தை தொடர்ந்து நேபாள பிரதமர் புஷ்ப கமல் தஹால் அவசர அமைச்சரவை கூட்டத்திற்கு அழைப்பு விடுத்துள்ளார். https://www.dailythanthi.com/News/India/a-plane-carrying-68-passengers-crashed-in-nepals-pokhara-879324

‘சூது கவ்வும்’ சேது சமுத்திர திட்டம்! -சாவித்திரி கண்ணன் கைவிடப்பட்ட சேது சமுத்திர திட்டத்தை மீண்டும் செயல்படுத்த வேண்டுமாம்! இத் திட்டத்தை முன்பு அதிமுகவும், பாஜகவும் கைகோர்த்து எதிர்த்துள்ளன! இந்த திட்டம் மன்மோகன் சிங் காலத்தில் ஆரம்பிக்கப்பட்ட நிலையில், எதனால் கைவிடப்பட்டது? என்ன நடந்தது? மீண்டும் இதை செயல்படுத்த வாய்ப்புள்ளதா? பத்தாண்டுகளுக்கு முன்பு “சேது சமுத்திர திட்ட பணிகளை மீண்டும் தொடர்ந்தாக வேண்டும்” என தி.மு.க எம்.பிகள் வலியுறுத்த, அதை எதிர்த்து அ.தி.மு.க, பா.ஜ.க எம்.பிகள் இராமர் பாலத்தை தேசிய சின்னமாக அறிவிக்க கோரி பாராளுமன்றமே ஸ்தம்பித்து, அவையை ஒத்தி வைக்க வேண்டியதாயிற்று என்பதை நாம் மறக்க முடியாது! ஆனால், தற்போது தமிழ் நாடு சட்டமன்றத்தில் சேது சமுத்திர திட்ட நிறைவேற்றலுக்கு ஸ்டாலின் கொண்டு வந்த, தனி நபர் தீர்மானத்தை அதிமுக, பாஜக உள்ளிட்ட எதிர்கட்சிகளும் ஆதரித்துள்ளன! ‘தமிழர்களின் லட்சியக் கனவு திட்டம்’ என்ற உணர்வுடன் சுமார் ஒரு நூற்றாண்டுக்கும் மேலாக இந்த திட்டம் அணுகப்பட்டு வந்துள்ளது. தமிழகத்தின் பல பெரும் தலைவர்களுக்கு இந்த திட்டம் செயல்படுத்தப்பட வேண்டும் என்ற கனவு இருந்தது என்பதை மறுக்க முடியாது. முன்பு, ”ராமர்பாலம் பாதிக்கப்படும்” என்ற காரணம் சொன்ன பாஜகவினர், தற்போது அந்த நிலையில் இருந்து பின்வாங்கியுள்ளனர். ”சேது சமுத்திரப் பகுதியில் பாலம் இருந்ததற்கான ஆதாரமே இல்லை” என மத்திய அமைச்சர் கஜேந்திர சிங் ஷெகாவத் இப்போது சொல்லியிருக்கிறார். ஏற்கனவே, சுப்பிரமணிய சுவாமி, ‘ராமர் பாலத்தை புராதான சின்னமாக அறிவிக்க கோரி’ வருகிறார். அதற்கு ஒன்றிய பாஜக அரசு செவி சாய்க்கவில்லை. அதனால், அவர் ராமர் பாலத்தை புராதானச் சின்னமாக அறிவிக்க கோரி, உச்ச நீதிமன்றத்தில் மனு போட்டார்! அதற்கு பாஜக அரசு உரிய பதிலை சொல்லாமல் எட்டாண்டுகளாக இழுத்தடித்து வருகிறது!. இந்த நிலையில், ‘சேது சமுத்திரப் பகுதியில் பாலம் இருந்ததற்கான அறிகுறியே இல்லை’ என நாடாளுமன்றத்திலேயே பாஜக அமைச்சர் தெரிவித்ததன் பின்னணியில் தான், ஸ்டாலின் இந்த திட்டத்தை மீண்டும் வலியுறுத்த தொடங்கி உள்ளார்! சட்ட மன்றத்தில் ஸ்டாலின் நம்மைப் பொறுத்தவரை அரசியல் கட்சிகளால் உருவாக்கப்பட்டுள்ள உணர்ச்சி நிலைகளைக் கடந்து அறிவுபூர்வமாக நாட்டு மக்கள் நலன்சார்ந்து இப்பிரச்சினையை அணுக வேண்டும் என்பதே நோக்கம். சற்றே வரலாற்றை பின் நோக்கிப் பார்ப்போம். 1860ல் ஆங்கில கடற்படை தளபதி ஏ.டி டெய்லர் என்பவரால் விதைக்கப்பட்ட ‘சேது சமுத்திர திட்டம்’ என்ற விதை நூற்றைம்பது ஆண்டுகளுக்கும் மேலாக தமிழக மண்ணில் விரும்பப்படும் ஒரு விவாதப் பொருளாகி, சுதந்திரம் பெற்ற பிறகு அது விஸ்வரூபமெடுத்து நேரு, இந்திராகாந்தி கால அரசுகளால் கமிட்டிகள் அமைத்து ஆராயப்பட்டு கைவிடப்பட்டன! 1999 முதல் 2004 வரை பாஜகவுடன் மத்திய அரசில் அங்கம் வகித்திருந்தது திமுக! அப்போது சேது சமுத்திர திட்டத்தின் தொடக்க ஆய்வுப் பணிக்காக ஐந்து கோடி ரூபாயை அன்றைய பா.ஜ.க. அரசின் நிதி அமைச்சரான யஷ்வந்த் சின்கா 1999 ஆம் ஆண்டு ஒதுக்கீடு செய்தார். அந்த ஆய்வு அறிக்கை இரண்டு ஆண்டுகளில் தரப்பட்ட நிலையில், 2004 வரை ஆட்சியில் இருந்த வாஜ்பாயின் பாஜக அரசு, ‘சேது சமுத்திர திட்டம் நடைமுறை சாத்தியமற்றது’ என்ற நிலையில், பின் வாங்கி விட்டது 2005 ல் சேது சமுத்திர திட்ட அடிக்கல் நாட்டு விழா பிறகு தி.மு.க வின் தயவில் மத்திய அரசு காங்கிரஸ் அரசு இயங்க வேண்டிய சூழலில் 2005 ஜுலை 2ந்தேதி பிரதமர் மன்மோகன் சிங்கால் இத்திட்டம் ஆரம்பித்து வைக்கப்பட்டது. அப்போது ”இத்திட்டத்தால் தென் தமிழகம் வளம் பெறும், இலங்கையைச் சுற்றிச் செல்லும் கப்பல்கள் இனி, சேது கால்வாய் வழியாக பயணிக்கும் இதனால் பயணநேரம், எரிபொருள் மிச்சம் போன்ற நன்மைகளோடு தூத்துக்குடி துறைமுகம் சர்வதேச முக்கியத்துவம் பெறும்” என்று இத்திட்டம் குறித்து விவரிக்கப்பட்டது. சுமார் 2,500 கோடி செலவில் 3 ஆண்டுகளுக்குள்ளாக இத்திட்டம் முடிக்கப்படும் என்று உறுதி அளிக்கப்பட்டது. ஆனால், வேலை தொடங்கப்பட்ட பிறகு தான் தெரிந்தது. தோண்டப்பட்ட இடத்திலேயே வெகு விரைவில் மீண்டும் மண் வந்து விழுவதானது இந்த திட்டம் இயற்கைக்கு எதிராக உள்ளது என்பதை நெற்றி பொட்டில் அறைந்தாற் போல் உணர்த்தியது. அதே சமயம் இந்த மண் தோண்டுவதற்கான காண்டிராக்டில் பணத்தை எவ்வளவு அள்ள முடியுமோ, அவ்வளவையும் அள்ளிக் கொண்டு இருந்தார் அன்றைய மத்திய அமைச்சராக இருந்த டி.ஆர்.பாலு! மற்றொரு புறம் பக்கம் இத்திட்டத்தை மிக கடுமையாக எதிர்த்து ,தென் தமிழக கடலோரப் பகுதி மீனவர்கள் பல போராட்டங்களை தீவிரமாக முன்னெடுத்தனர். சுற்றுச் சூழல் ஆர்வலர்களும் இந்த திட்டத்தில் உள்ள பாதகமான அம்சங்களைக் எடுத்துக் கூறி, எதிர்ப்பு தெரிவித்து போராடினர். இவற்றோடு இத் திட்டத்தால் இராமர் பாலம் இடிபடுகிறது என்ற இந்துத்துவ இயக்கங்களின் எதிர்ப்பும் சேர்ந்து வலுப்பெற்று, இத்திட்டம் உச்சநீதி மன்றத்தால் செப்டம்பர் 2007 ல் நிறுத்தி வைக்கப்பட்டது. இதன் பிறகு தி.மு.க மற்றும் இடது சாரிகளால் இத் திட்டத்திற்கு மேன்மேலும் அழுத்தம் கொடுக்கப்பட்டு வந்தாலும் கூட, ‘இது மீண்டும் தொடங்கும்’ என்பதற்கான அறிகுறிகள் தென்படாமல் தான் இருந்தது! கப்பல் போக்குவரத்து நிறுவனங்கள் ஏன் விரும்பவில்லை; இதற்கான காரணங்கள் என்ன? என்று பார்க்கும் போது இந்த திட்டம் நடைமுறையில் சாத்தியமற்றது மாத்திரமல்ல, இதை இயற்கைக்கு மாறாக கடும் தொழில் நுட்ப உதவியுடன் நிறைவேற்றினாலுமே கூட, இந்த பாதையை பயன்படுத்திக் கொள்ள, கப்பல் போக்குவரத்து நிறுவனங்கள் ஆர்வம் காட்டவில்லை என தெரிய வந்தது. கப்பல் போக்குவரத்தில் பலன் பெறும் இந்திய நிறுவனங்கள் எதுவுமே இத்திட்டத்தில் ஆர்வம் காட்டவில்லை என்ற நிலையில் அரசியல் ஆதாயத்திற்காக இதை செயல்படுத்த வேண்டுமா என்ற கேள்வி எழுந்தது! “குறுகலானபாதை, குறைந்த ஆழம் என்பதால் பெரிய சரக்கு கப்பல்கள் ஒரு போதும் இந்தப் பாதை வழியே பயணிக்க வாய்ப்பில்லை. சிறிய உள்ளூர் கப்பல்கள் மட்டுமே பயணிக்க முடியும், மிகக் குறைந்த வேகத்திலேயே பயணிக்கமுடியும், இதற்கு எரிபொருள் செலவும் கூடும், இதனால் இலங்கையைச்சுற்றி பயணிப்பதற்கும் இப்பகுதி வழியே செல்வதற்கும் நேரம், செலவு போன்றவற்றில் பெரிய வித்தியாசமில்லை. இந்த கால்வாய் பகுதியில் மீண்டும் மீண்டும் மணல் சேர்ந்து கொண்டேயிருப்பதால் பராமரிப்பு செலவு அதிகமாகும்” என்று தொழில் சார்ந்த நிபுணர்கள் கூறினர். மன்மோகன் சிங் அரசு மறுத்தது ஏன்? சேது சமுத்திர திட்ட கால்வாயின் மொத்த நீளம் 167கி.மீ. இதில் ராமர்பாலம் எனப்படும் ஆதாம்பாலம் பகுதியில் 11 சதவிகிதமும், பாக்ஜலசந்தி பகுதியில் 30 சதவிகிதமும் பணிகள் முடிவடைந்த நிலையில் தான் இத்திட்டம் கைவிடப்பட்டது. இதற்கே ஆயிரம் கோடிக்கு மேல் செலவாகிவிட்டது. இத்திட்டத்தை மேலும் தொடரமுடியாததற்கு தோண்டப்படும் பகுதியில் மீண்டும், மீண்டும் மணல் சேருவது ஒரு பிரச்சினையாகவும், தோண்டிய மணலை எங்கே கொட்டுவது என்ற நடைமுறைசிக்கலும் பிரதான காரணமாக சொல்லப்பட்டது. மேலும், மூன்றாண்டுகளில் இத்திட்டத்தின் மதிப்பீடு அதிகரித்து, 4000 கோடி என்ற நிலையை எட்டியதும் ஒரு முக்கிய காரணமாகும்! ‘இவ்வளவு செலவழிந்தாலும் இத்திட்டத்திற்கு எதிர்பார்த்த பலன்கள் கிடைக்காது’ என நிபுணர்கள் கூறிய விபரங்கள் தான் அன்றைய மன்மோகன்சிங் அரசின் பின்வாங்கலுக்கு பிரதான காரணமாகும். சுழலியல் பாதிப்புகள் என்ன? சேது சமுத்திர பாதையில் இயற்கையாக உள்ள மணல் திட்டும், அபரிமிதமாக உள்ள கடல் வளமும்! ”3,600 வகையான கடற்செடி கொடிகள், கடற் பாசிகள், கடல் வாழ் உயிரினங்கள், 450 வகை அரிய மீன் இனங்கள், நூற்றுக்கும் மேற்பட்ட பவளப் பாறைகள்.. இந்த திட்டத்தால் சர்வ நாசமாகும். இதனால், தென் கடலோர மீனவர்களின் வாழ்வாதாரம் மட்டுமல்ல, கடலின் இயற்கை சூழலே கடும் பாதிப்புக்கு ஆளாகும்” எனக் கூறப்பட்டது. இந்த பகுதியில் உள்ள இயற்கை மணல் திட்டுகள் தென் இந்திய கடற்பகுதியில் சுனாமியின் சீற்றத்தை குறைக்கும் அரணாகத் திகழ்கின்றன” என்ற சூழலியல் விஞ்ஞானிகளின் கூற்று மேலும் வலுப் பெற்று வந்தது! இதைத் தொடர்ந்து இந்த திட்டம் அதிகாரபூர்வமாக கைவிடப்படுவதாக மார்ச்- 2012 ஆம் ஆண்டு அறிவிக்கப்பட்டது! இந்த அறிவிப்பை மீனவர்கள், சுற்றுச்சூழல் ஆர்வலர்கள் இனிப்பு வழங்கி, மகிழ்ச்சி வெளிப்படுத்தினர் என்பதும் நினைவுகூறத்தக்கது. தமிழ் நாடு சட்டமன்றத்தில் இந்த திட்டம் மீண்டும் ஆரம்பிக்க வலியுறுத்தப்பட்டுள்ள நிலையில், சமூக ஆர்வலர் பாடம் நாராயணன் இவ்வாறு பதிவிட்டு உள்ளார். ”காசு பணம் துட்டு மணி மணி — சேது சமுத்திரத் திட்டம் எனும் சூது கவ்வும். திமுகவின், குறிப்பாக, டி ஆர் பாலுவின் தீராத பேராசை. தி.மு.க-பாஜக மறைமுக கூட்டுச்சதி. குஜராத்தி தொழிலதிபர்களுக்கும், இடைத்தரகர்களுக்கும், திராவிட மாடல் கட்சித்தலைவர்களுக்கும் கப்பல் கப்பலாக கப்பல் கப்பலாக கரன்சி , வடமாநிலப் பொறியாளர்களுக்கும், வடமாநில காண்டிராக்டர்களுக்கும், வடமாநிலத் தொழிலாளர்களுக்கும் நல்ல வேலை, வருமானம். தமிழக இளைஞர்களுக்கு பட்டை நாமம். இதுவா விடியல்?”’ எனக் கேட்டுள்ளார் பாடம் நாராயணன். மக்கள் நலன்சார்ந்தும், நடைமுறை சாத்தியப்பாடுகள் சார்ந்தும் இந்த திட்டத்தை நாம் ஆய்வு செய்யும் போது, இந்த திட்டம் நடைமுறையில் சாத்தியப்படாது. ஒரு வேளை சாத்தியப்பட்டாலும், பயன்கள் மிகக் குறைவு. தீமைகளோ அதிகம். செலவும் மிக அதிகம்! இவ்வளவும் தெரிந்த நிலையில், இந்த திட்டத்தை அமல் படுத்த போகிறோம் என்பது, ‘ஆன வரை கூட்டுக் கொள்ளை அடித்து கொள்ளலாம்’ என்பதைத் தவிர வேறென்னவாக இருக்க முடியும்? மேலும் பாஜகவுடன் திமுக அரசியல் ரீதியாக வெளிப்படையாக கைகோர்க்கும் சூழல் உருவாக, இந்த திட்டம் துவக்க புள்ளியாக அமையலாம்! சாவித்திரி கண்ணன் அறம் இணைய இதழ் https://aramonline.in/12017/sethu-canal-peoject-is-possible/

(VIDEO) கொடூரச் சட்டத்தில் சிக்குண்டு 71 வயதில் விடுதலையான செல்வரத்தினம் Selvaraja Rajasegar on January 11, 2023 வெட்ட வெளி, வெயில் சுட்டெரிக்கிறது. மேய்ச்சலுக்காக விடப்பட்டிருந்த மாடுகள் ஆங்காங்கே வளந்திருக்கின்ற மரங்களின் நிழலில் நெருக்கிக்கொண்டு உட்கார்ந்திருக்கின்றன. நான் தேடிவந்த செல்வரத்தினம் ஐயா மாடுகளை அழைத்துக்கொண்டு இந்தப் பக்கமாகத்தான் வந்திருப்பதாக அவரது மனைவி கூறியிருந்தார். கண்ணுக்கெட்டிய தூரம் வரை அவரை காணாததால் நானும் மரமொன்றைத் தேடி உட்கார்ந்தவாறு அங்குமிங்கும் பார்த்துக்கொண்டிருந்தேன். நீண்டநேரத்தின் பின்னர் வயதான ஒரு ஐயாவும் இளைஞனொருவனும் வருவதைக் கண்டேன். நான் தேடி வந்தவர் இவர்தான் என்பதை கண்டுணர்ந்து அவரோடு பேச்சுகொடுக்க ஆரம்பித்தேன். மூச்சிரைத்தபடி எனது அருகில் உட்கார்ந்தார். “இப்போதெல்லாம் முன்ன மாதிரி நடக்க முடியாது தம்பி. கொஞ்சம் நடந்தாலே மூச்சிரைக்குது. நீண்டநேரம் நிற்கவும் முடியாது.” இரண்டு கைகளையும் பின்பக்கமாக தரையில் ஊன்றியவாறு கால்களிரண்டையும் நீட்டி உட்கார்ந்தார். ஏற்கனவே, தொலைபேசி வழியாக செல்வரத்தினம் ஐயாவுடன் பேசியதால் நேரடியாக விசயத்துக்கே வந்தேன். எப்போ ஐயா உங்கள கைதுசெய்தாங்க? எப்ப விட்டாங்க? காய்ந்த நிலத்தையே பார்த்து பேசிக்கொண்டிருந்த அவர் மகனின் முகத்தைத் திரும்பிப் பார்த்தார். “கடைசி காலம் வரைக்கும் இவங்களின்ட தயவுலதான் வாழனும். செத்தாலும் இவங்கதான் தூக்கி அடக்கம் செய்யனும். என்னால தனியா ஒன்டுமே செய்ய முடியுதில்ல. இப்படியே பாரமா இருந்திட்டு செத்திட வேண்டியதுதான்.” பயங்கரவாதத் தடைச்சட்டத்தின் கீழ் கைதாகி வாழ்க்கையைத் தொலைத்த பலருள் செல்வரத்தினமும் ஒருவர். முதுமையான வயதில் குடும்பத்தினரோடு வாழவேண்டிய செல்வரத்தினம் போன்ற பலர் இந்தக் கொடூரச் சட்டத்தால் தங்களுடைய எஞ்சிய காலத்தை சிறையிலோ அல்லது விடுதலையின் பின்னர் இறுதி கொஞ்ச காலத்தை உபாதைகளுடனோ கழிக்கவேண்டியிருக்கிறது. குடலில் ஏற்பட்டிருக்கும் தீவிர புண் காரணமாக தொடர்ச்சியான சிகிச்சைகளுக்கு நகரத்தை நோக்கி செல்வரத்தினத்தால் போகவேண்டியிருக்கிறது. “இன்னும் எத்தனை நாள்தான் வாழப்போறன் தம்பி, அதுவரைக்குமாவது இவங்க யாருக்கும் தொந்தரவில்லாம வாழ்ந்திட்டுப் போயிரனும்.” * பெயர் மாற்றம் செய்யப்பட்டுள்ளது. செல்வரத்தினத்துடனான முழுமையான நேர்க்காணல் கீழே இணைக்கப்பட்டுள்ளது. https://maatram.org/?p=10579

உலகளவில் பெரிதும் தேடப்பட்டு வந்த மனித கடத்தல் கும்பல் தலைவன் கைது- இன்டர்போல் January 14, 2023 ஐரோப்பிய புலம்பெயர்வு நெருக்கடியின் போது ஆயிரக்கணக்கான மக்களை கடத்தியதில் குற்றவாளியாக அறியப்பட்ட மனித கடத்தல்காரரான ஜகாரியாஸ் ஹேப்டேமரியம் எனும் எரித்திரிய நாட்டவர் கைது செய்யப்பட்டுள்ளார். ஐக்கிய அரபு அமீரகமும் சர்வதேச காவல்துறையான இன்டர்போலும் இணைந்து மேற்கொண்ட நடவடிக்கையில், கடந்த ஜனவரி 1ம் திகதி சூடானில் இவர் கைது செய்யப்பட்டிருக்கிறார். இவரை கடந்த 2019ம் ஆண்டு முதல் இன்டர்போல் கண்காணித்து வந்ததாகக் கூறப்படுகிறது. ஐக்கிய அரபு அமீரக உள்துறை அமைச்சகத்தின் கூற்றுப்படி, கிழக்கு ஆப்பிரிக்க குடியேறிகளை கடத்தி, தவறாக நடத்தி, அவர்களை மிரட்டி பணிப் பறிக்கும் அமைப்பினை இந்நபர் நடத்தி வந்திருக்கிறார். கடந்த 2020ம் ஆண்டு எத்தியோப்பியாவில் கைது செய்யப்பட்ட ஹேப்டேமரியம் நீதிமன்ற வளாகத்திலிருந்து தப்பிய நிலையில் மீண்டும் கைது செய்யப்பட்டிருக்கிறார். மனித கடத்தலில் ஈடுபட்டதற்காக எத்தியோப்பிய நீதிமன்றம் இவருக்கு கடந்த 2021ம் ஆண்டு ஆயுள் தண்டனை விதித்திருந்தது. லிபியாவில் உள்ள கிடங்குகளில் அகதிகள் மற்றும் குடியேறிகளை சிறைவைத்து அவர்களிடமும் அவர்களது குடும்பத்தினரிடமும் ஆயிரக்கணக்கான டாலர்களை பறித்ததாக ஹேப்டேமரியம் மீது அப்போது குற்றம் சாட்டப்பட்டிருந்தது. “உலகின் மிக மோசமான மற்றும் கொடூரமான மனித கடத்தல்காரர்களில் இவரும் ஒருவர்,” எனக் கூறும் நெதர்லாந்து ‘அந்நபரை தேடப்படுபவர்களின் பட்டியலில்’ வைத்திருக்கிறது. நெதர்லாந்து அதிகாரிகளின் தரவுப்படி, ஹேப்டேமரியம் லிபியாவில் புலம்பெயர்ந்தவர்களுக்கான முகாமை நடத்தி வந்திருக்கிறார். அம்முகாமில் இருந்தவர்களை வலுக்கட்டாயமாக வைத்து, அடித்து, பாலியல் வன்புணர்வுக்கு உள்ளாக்கியதாகக் கூறப்படுகிறது. ஐரோப்பியாவில் தஞ்சமடைய முயன்ற மக்களின் சூழ்நிலையை பயன்படுத்திக் கொண்டு அம்மக்களை மனித கடத்தல்காரரான ஹேப்டேமரியம் சுரண்டியதாக சொல்லப்படுகிறது. இந்த நபர் கைது செய்யப்பட்டதன் மூலம் சூடான், எரித்திரியா, எத்தியோப்பியா, சோமாலியாவிலிருந்து குடியேறிகளை லிபியாவுக்கு அழைத்துச் சென்ற வழி முடக்கப்பட்டுள்ளதாக ஐக்கிய அரபு அமீரகத்தின் போதைப் பொருள் தடுப்பு அதிகாரியான சையத் அப்துல்லா தெரிவித்திருக்கிறார். ஆப்பிரிக்க குடியேறிகள் மத்திய தரைக்கடல் வழியாக ஐரோப்பிய கரைகளில் தஞ்சமடைவதற்கு முக்கிய இணைப்பு நாடாக லிபியா உள்ளமை இங்கு குறிப்பிடத்தக்கது. https://www.ilakku.org/the-leader-of-the-worlds-most-wanted-human-trafficking-gang-was-arrested/

பதவியிலிருந்து ஓய்வு பெறும் புடின் – கருங்கடலில் இரகசிய மாளிகை உக்ரைனுடனான போரை தொடர்ந்து கடுமையான அழுத்தத்தை சந்தித்துவரும் ரஷ்ய அதிபர் புடின், அமைதியான முறையில் ஓய்வு பெறுவது தொடர்பாக பேச்சுவார்த்தை நடத்த முயற்சிப்பார் என அவரது முன்னாள் உதவியாளர் ஒருவர் தெரிவித்துள்ளார். புடின் ஆற்றும் உரைகளை எழுத்துவடிவமாக்கும் பதவியிலுள்ள Abbas Gallyamov என்பவர், புடின் தனது பதவியிலிருந்து ஓய்வு பெறுவார் என தெரிவித்துள்ளார். ஓய்வுக்குப் பின், கருங்கடலில் அமைந்துள்ள, கவர்ச்சி நடனங்களைக் கண்டுகளிக்கும் வசதியுடைய தனது இரகசிய மாளிகையில் தனது கடைசிக்காலத்தை செலவிட புடின் திட்டமிட்டிருப்பதாகவும் Abbas தெரிவித்துள்ளார். 2024ஆம் ஆண்டு நடைபெற உள்ள அதிபர் தேர்தலில் போட்டியிடமாட்டார் என்றும், உக்ரைன் மற்றும் மேற்கத்திய நாடுகளுடனான போரை பேச்சுவார்த்தை மூலம் முடிவுக்குக் கொண்டுவரக்கூடிய ஒருவரை தனது வாரிசாக அறிவித்துவிட்டு ஓய்வு பெறுவார் என்றும் கூறியுள்ளார் Abbas. அடுத்த அதிபராக புடினால் தேர்ந்தெடுக்கலாம் என கருதப்படுவபவர்களில், மாஸ்கோ மேயரான Sergey Sobyanin, பிரதமர் Mikhail Mishustin, மற்றும் புடினுடைய நம்பிக்கைக்குரிய பணியாளர்களின் துணைத்தலைவர் பதவி வகிக்கும் Dmitry Kozak ஆகியோரின் பெயர்கள் கூறப்படுகின்றன. மேலும், தனது இரகசிய மாளிகையில் அமைதியாக, பாதுகாப்பாக வாழ முடிவு செய்ய இருக்கும் புடின், தனது கடைசிக்காலம் வரை ஒரு செனேட்டராகவே இருக்கும் வகையில் சட்டங்கள் அமைக்கப்பட்டுள்ளதும் குறிப்பிடத்தக்கது. https://akkinikkunchu.com/?p=235309

மரணம் வரையிலும் சம்பந்தன் ஐயா போன்றோர் இலங்கை அரசியலை ஊகிக்கவில்லை Vhg ஜனவரி 14, 2023 மரணம் வரையிலும் சம்பந்தன் ஐயா போன்றவர்கள், இலங்கையின் அரசியலை ஊகித்துக் கொள்ளவில்லையென்பது மிகவும் கவலையான விடயம் என இராஜாங்க அமைச்சர் சிவநேசதுரை சந்திரகாந்தன் (பிள்ளையான்) தெரிவித்துள்ளார். மட்டக்களப்பு மாவட்டத்தில் உள்ளூராட்சி மன்றங்களில் போட்டியிடுவதற்கான கட்டுப்பணத்தினை நேற்றைய தினம் (13.01.2023) தமிழ் மக்கள் விடுதலைப்புலிகள் கட்சி செலுத்தியுள்ளது. தமிழ் மக்கள் விடுதலைப்புலிகள் கட்சியின் தலைவரும் இராஜாங்க அமைச்சருமான சிவநேசதுரை சந்திரகாந்தன் தலைமையில் இந்த கட்டுப்பணம் செலுத்தப்பட்டது. மட்டக்களப்பு மாவட்டத்தில் காத்தான்குடி தவிர்ந்த உள்ளூராட்சி மன்றங்களில் போட்டியிடவுள்ளதாக இதன்போது இராஜாங்க அமைச்சர் தெரிவித்தார். போலித் தேசியவாதி இதன்போது மேலும் கருத்து தெரிவித்த அவர்,“பிராந்திய மட்டத்தில் அரசியல் கட்டமைப்புகள் பலப்படுத்தப்பட வேண்டும். அதன் அடிப்படையில் கடந்த காலத்தில் தமிழ் தேசிய கூட்டமைப்பின் சிதைவும் கிழக்கு சார்ந்த ஒரு கூட்டமைப்புக்கான சாத்தியத்தினை அதிகரித்துள்ளது. அதன் அடிப்படையில் கிழக்கு மாகாணத்தினை மையப்படுத்திய அனைவரும் போராட்ட அமைப்புகளிலிருந்து வெளியேறியவர்கள். போராட்டத்தின் வலி தெரிந்த அமைப்புகளோடும் நாங்கள் பேச்சுவார்த்தைகளை நடாத்தியிருக்கின்றோம். இருந்தபோதிலும் அவர்கள் இன்னமும் போலித் தேசியவாதிகளை நம்பியிருக்கின்றார்கள். அது தோல்வியில் தான் முடியும் என நம்புகின்றேன். கிழக்கு மாகாணத்தில் ஒரு கூட்டமைப்பு கிழக்கு மாகாணத்தில் ஒரு கூட்டமைப்பினை உருவாக்குவதற்கு நாங்கள் கலந்து பேசி வருகின்றோம். இந்த நாட்டின் அரசியலில் இவ்வளவு காலமும் சீரழிந்து சின்னாபின்னமாகி பொருளாதார இழப்புகளுக்கு காரணமாகயிருந்தவர்கள் இக் கொள்கையினை வகுத்தவர்கள். தாங்கள் மட்டும் என்ற எண்ணக்கருக்களை உருவாக்கிய யாழ்ப்பாணத்தில் பிறந்த சிலர், தாங்கள் மாத்திரம் தான் என்ற எண்ணக்கருவினைக் கொண்டவர்களைத் தான் மேட்டுக்குடிகள் என்று சொல்கின்றோமே ஒழிய வடபகுதியிலிருக்கும் எல்லோரையும் சொல்லவில்லை. அவர்கள் இப்போதும் தங்களது ஆதிக்கத்தினை நிலைநாட்டுவதற்கு பலமாக போராடிக் கொண்டிருக்கின்றார்கள். அதன் தீர்மானத்தின் ஒரு பகுதியே இன்று தமிழ் தேசிய கூட்டமைப்பு சிதைந்துள்ளதாகும். அந்த மேட்டுக்குடியின் சித்தாந்ததினால் எடுக்கப்பட்ட முடிவுகளே இதற்கு காரணம். சுமந்திரனை நாங்கள் சட்டத்தரணியென்றே நினைத்தோம், ஆனால் கணக்கு வாத்தியார் போல கணக்கு படிப்பிக்கின்றார், தொழில்நுட்பம் தொடர்பாக அவருக்குத்தான் அந்த கணக்கு தெரியும் எனக்கு தெரியாது. வடகிழக்கு இணைப்பு இன்று வடகிழக்கு இணைப்பு மாகாணசபை தொடர்பில் பேசும் தமிழ் தேசிய கூட்டமைப்பின் அன்றைய நிலைப்பாட்டை யாரும் மறந்துவிடக்கூடாது. 2008ஆம் ஆண்டு நாங்கள் தேர்தலில் போட்டியிடமாட்டோம் கொள்கை ரீதியான முரண்பாடு என பல விமர்சனங்களை செய்தார்கள். 2008ஆம் ஆண்டு நான் முதலமைச்சராக வந்த போது என்னை வரவிடாமல் செய்வதற்கு முஸ்லிம் காங்கிரசுக்கு ஆதரவு வழங்கினார்கள். இரண்டாது முறை தவிறவிட்டு அடுத்த தடவை முதலைமைச்சர் பதவியை தமிழ்தேசிய கூட்டமைப்பு எடுக்க வேண்டும் என்று சம்பந்தன் ஐயாவிடம் சென்று கதைத்தோம். கிழக்கில் போராடியவர்கள் பல இழப்புகளை சந்தித்தவர்கள் என்ற அடிப்படையில் கிழக்கில் தமிழ் தேசிய கூட்டமைப்பினை சேர்ந்தவர் முதலமைச்சராக வரவேண்டும் என்பதற்காக எனது முழு ஆதரவினையும் தருகின்றேன் என சம்பந்தன் ஐயாவிடம் கூறியபோது அதனை உதாசீனம் செய்தார். அதனால் அமைச்சர் ஹாபீஸ் சொல்வது உண்மையில்லை.நாங்கள் சாதகமான விடயங்களை ஊகித்துக்கொள்கின்றோம். சம்பந்தன் ஐயா போன்ற தலைவர்கள் மரணம் வரையிலும் இலங்கையின் அரசியலை ஊகித்துக் கொள்ளவில்லையென்ற கவலை எனக்கு இன்னும் இருக்கின்றது.”என தெரிவித்துள்ளார். https://www.battinatham.com/2023/01/blog-post_817.html

பிலிப்பைன்ஸில் இறைச்சியைவிட வெங்காயத்தின் விலை அதிகரிப்பு By T. Saranya 14 Jan, 2023 | 10:17 AM பிலிப்பைன்ஸில் ஒரு கிலோ சிவப்பு வெங்காயத்தின் விலை தற்போது ஒரு கிலோ இறைச்சியை விட அதிகமாக விற்பனை செய்யப்படுகிறது. கிலோவுக்கு 600 பிசோஸ் (இலங்கை மதிப்பு ரூ.3998) என்ற விலையில் விற்கப்படுகிறது. இது கோழி இறைச்சியை விட கிட்டத்தட்ட மூன்று மடங்கு விலை அதிகம் ஆகும். பன்றி இறைச்சி அல்லது மாட்டிறைச்சியை விட 25-50 சதவீதம் அதிகம். ஒரு கிலோ வெங்காயம் வாங்கவேண்டுமானால் ஒரு நாள் வேலைக்கான பிலிப்பைன்ஸின் குறைந்தபட்ச ஊதியத்தை விட அதிகம் செலவு செய்ய வேண்டி உள்ளது. உள்நாட்டு உற்பத்தி, விநியோகம் குறைந்து வருவதாலும், அதிகரித்து வரும் செலவுகளைக் கட்டுப்படுத்தவும் மார்ச் மாதத்திற்குள் சுமார் 22,000 தொன் வெங்காயத்தை இறக்குமதி செய்ய வேண்டும் என விவசாய அதிகாரிகள் அறிவித்துள்ளனர். ரஷ்யா - உக்ரேன் போர், விநியோகச் சங்கிலியில் ஏற்பட்ட சிக்கல்கள் மற்றும் தீவிர காலநிலை மாற்றம் உள்ளிட்ட பல காரணங்களால் உலகளாவிய ரீதியில் பணவீக்கம் அதிகரித்து, உலகளவில் உணவுப்பொருட்களின் விலைகள் அதிகரிக்கின்றன. இதன் தாக்கம் பிலிப்பைன்ஸிலும் எதிரொலித்துள்ளதாக கூறப்படுகிறது. https://www.virakesari.lk/article/145758

ஈழமக்கள் ஜனநாயகக் கட்சி யாழ். மாவட்ட உள்ளூராட்சிமன்ற தேர்தலுக்கான கட்டுப்பணத்தை செலுத்தியது By Digital Desk 5 14 Jan, 2023 | 10:27 AM அமைச்சர் டக்ளஸ் தேவானந்தா தலைமையிலான ஈழமக்கள் ஜனநாயகக் கட்சி யாழ்ப்பாண மாவட்ட உள்ளூராட்சிமன்ற தேர்தலுக்கான கட்டுப்பணத்தை நேற்றைய தினம் செலுத்தியது. வெள்ளிக்கிழமை (13) பிற்பகல் 3.30 மணியளவில் யாழ்ப்பாண மாவட்ட செயலகத்திலுள்ள தேர்தல்கள் அலுவலகத்தில் வடக்குமாணசபை முன்னாள் எதிர்க்கட்சித் தலைவர் தவராசா தலைமையிலான குழுவினரால் யாழ். மாவட்டத்தில் உள்ள 17 உள்ளூராட்சி மன்றங்களுக்கான கட்டுப்பணம் செலுத்தப்பட்டது. மேலும் இதுவரை யாழ்மாவட்டத்தில் 3 அரசியல் கட்சிகளும் 4 சுயேட்சைக் குழுக்களும் இதுவரை உள்ளூராட்சித் தேர்தலுக்கான கட்டுப்பணத்தை செலுத்தியுள்ளன. https://www.virakesari.lk/article/145761

யாழில் தேசிய பொங்கல் நிகழ்வில் ஜனாதிபதி கலந்துகொள்வதற்கு எதிர்ப்பு : போராட்டத்துக்கு யாழ். பல்கலைக்கழக மாணவர் ஒன்றியம் அழைப்பு ! By Nanthini 14 Jan, 2023 | 11:16 AM தேசிய பொங்கல் விழாவில் கலந்துகொள்வதற்காக யாழ்ப்பாணத்துக்கு விஜயம் செய்யவுள்ள ஜனாதிபதிக்கு எதிர்ப்பு தெரிவித்து, அமைதிப் போராட்டத்தினை முன்னெடுக்க அனைவரும் ஒன்றிணையுமாறு யாழ். பல்கலைக்கழக மாணவர் ஒன்றியம் கோரிக்கை விடுத்துள்ளது. யாழ். பல்கலைக்கழகத்தில் நேற்று வெள்ளிக்கிழமை (13) இடம்பெற்ற ஊடக சந்திப்பின்போதே மாணவர் ஒன்றிய பிரதிநிதிகள் இதனை கோரியுள்ளனர். இதன்போது யாழ். பல்கலைக்கழக மாணவர் ஒன்றிய தலைவர் அழகராசா விஜயகுமார் தெரிவிக்கையில், எங்களுடைய தமிழ் மக்கள் வட கிழக்கெங்கிலும் பல்வேறு பிரச்சினைகளுக்குள் சிக்குண்டு, தொடர்ச்சியாக எதுவித அரசியல் தீர்வுகளுமின்றி, நாட்களை கழித்துவரும் நிலையில் காணாமலாக்கப்பட்டோர் மற்றும் அரசியல் கைதிகள் தொடர்பான விடயங்கள், காணி விடுவிப்பு, இராணுவ ஆக்கிரமிப்பு, பௌத்தமயமாக்கல் என அரசின் திட்டமிடப்பட்ட இனப்பிரச்சினைகளுக்குள் இருந்து மக்கள் இதுவரை வெளிவராத சூழ்நிலையில், தேசிய பொங்கல் விழாவினை ஜனாதிபதி எவ்வாறான மனநிலையில் யாழ்ப்பாணத்தில் நிகழ்த்த முடியும் ? ஜனாதிபதி பொங்கல் விழாவை மேற்கொள்வதில் எங்களுக்கு எதுவித ஆட்சேபனையும் கிடையாது. தமிழர்களின் பிரச்சினைகளுக்கான தீர்வினை வழங்கிய பின்னர் அவர் குறித்த பொங்கல் நிகழ்வினை முன்னெடுப்பாராயின், தமிழ் மக்களாகிய நாங்களும் இணைந்துகொள்வோம். நாளை ஞாயிற்றுக்கிழமை (ஜன. 15) 3 மணியளவில் ஜனாதிபதி கலந்துகொள்ளும் பொங்கல் நிகழ்வு நல்லூர் சிவன் ஆலயத்தில் இடம்பெற இருக்கின்ற தருணத்தில், ஒரு மணியளவில் யாழ். பல்கலைக்கழக முன்றலில் கவனயீர்ப்பு போராட்டம் ஆரம்பமாகி, தொடர்ச்சியாக பொங்கல் நிகழ்வு இடம்பெறும் இடத்துக்கு செல்வதோடு நிறைவடையும். அதேவேளை மக்கள் பிரதிநிதிகள், கட்சித் தலைமைகள் அரசியல் பேதமின்றி இந்த பொங்கல் நிகழ்வை முற்றாக நிராகரிப்பதோடு, எங்களுடைய இந்த சாத்வீக போராட்டத்தில் பங்குகொள்ள வேண்டும் என அழைப்பு விடுக்கிறோம். அத்தோடு அனைத்து சிவில் அமைப்புக்கள், பொதுமக்கள் என அனைத்து தரப்பினரையும் இந்த போராட்டத்தில் கலந்துகொள்ளுமாறு அழைப்பு விடுக்கிறோம் என மேலும் தெரிவித்தார். https://www.virakesari.lk/article/145762

யாழில் சூடு பிடிக்கும் தைப்பொங்கல் வியாபாரம் 14 Jan, 2023 | 11:45 AM தமிழர் திருநாளாம் தைப்பொங்கல் பண்டிகை நாளை ஞாயிற்றுக்கிழமை (15) கொண்டாடப்படவுள்ள நிலையில் யாழ்ப்பாணம் திருநெல்வேலி சந்தையில் வியாபாரம் சூடு பிடித்துள்ளது. மக்கள் தைப்பொங்கலுக்கு தேவையான பானை, அகப்பை, கரும்பு, பட்டாசு, பழவகை என்பவற்றை வாங்குவதில் ஆர்வம் காட்டி வருகின்றனர். யாழ்ப்பாணத்தில் பல பாகங்களிலும் தைப்பொங்கல் வியாபாரங்கள் இடம்பெறுவதை அவதானிக்க முடிகின்றது. https://www.virakesari.lk/article/145774

தியாகத்தில் உருவான தமிழ்த் தேசியக் கூட்டமைப்பை சீரழிக்கும் சக்திகளுக்கு மக்கள் பாடம் புகட்டுவர் - சபா குகதாஸ் By Nanthini 14 Jan, 2023 | 11:41 AM தமிழின விடுதலைக்கான தியாகத்தில் உருவான தமிழ் தேசிய கூட்டமைப்பை சீரழிக்கும் எந்த சக்தியாக இருந்தாலும், எதிர்காலத்தில் அவர்களுக்கு மக்கள் தக்க பாடம் புகட்டுவர் என வடக்கு மாகாண சபை முன்னாள் உறுப்பினர் சபா குகதாஸ் இவ்வாறு கருத்து வெளியிட்டுள்ளார். வடக்கு மாகாண சபை முன்னாள் உறுப்பினர் சபா குகதாஸ் ஊடகங்களுக்கு விடுத்திருக்கும் செய்தியில் மேலும் தெரிவித்திருப்பதாவது, தமிழின விடுதலைக்கான தியாகத்தில் உருவான கூட்டமைப்பை சீரழிக்கும் எந்த சக்திக்கும் அரசியல் கட்சிகளுக்கும் எதிர்காலத்தில் மக்கள் தக்க பாடம் புகட்டுவர். கடந்த காலத்தில் பலர் விட்ட தவறுக்கு நேர்ந்தவற்றை மறந்து ஒற்றுமையாக இருக்க வேண்டிய தருணத்தில், எதிரிக்கு சாதகமாக பிளவினை ஏற்படுத்துவது மக்களுக்கு பாரிய ஏமாற்றத்தையும் அதிர்ச்சியினையும் கொடுத்துள்ளது. கூட்டமைப்பு என்பது ஆயிரக்கணக்கான மாவீரர்களின் உயிர்த் தியாகத்தாலும் தன்னிகர் அற்ற தலைவனின் வழிகாட்டலினாலும் உருவாக்கப்பட்டது. இத்தகைய தியாகத்தை பயன்படுத்தி பதவிகளை பெற்ற சிலர் சிங்கள பேரினவாதத்தின் நிகழ்ச்சி நிரலை நிறைவேற்ற ஒற்றுமையை சீர்குலைப்பதை தமிழ் மக்கள் இனியும் அனுமதிக்க மாட்டார்கள். சிங்கள ஆட்சியாளர்கள் 'ஒற்றுமையாக வாருங்கள்' என தமிழர் தரப்பை பார்த்து, கேலி செய்யும்போது தொடர்ந்து தமிழ் மக்களை பலவீனப்படுத்தும் வகையில் தமிழர் தரப்பே செயற்படுவது மிக வேதனையாக உள்ளது. இதற்கான பதிலடி எதிர்காலத்தில் கிடைக்கும் என்றார். https://www.virakesari.lk/article/145768

தேசிய பொங்கல் நிகழ்வெனக் கூறி தமிழர் தாயகத்தில் ஜனாதிபதி காலடி வைப்பதை அங்கீகரிக்க முடியாது - அருட்தந்தை மா. சத்திவேல் By Nanthini 14 Jan, 2023 | 12:33 PM தேசிய பொங்கல் நிகழ்வெனக் கூறி ஜனாதிபதி தமிழர் தாயகத்தில் காலடி வைப்பதை அங்கீகரிக்க முடியாது என அரசியல் கைதிகளை விடுதலை செய்வதற்கான தேசிய அமைப்பின் இணைப்பாளர் அருட்தந்தை மா.சத்திவேல் தெரிவித்துள்ளார். இன்று சனிக்கிழமை (ஜன. 14) வெளியிட்டுள்ள ஊடக அறிக்கையில் இவ்வாறு தெரிவித்திருக்கும் அவர் மேலும் குறிப்பிட்டுள்ளதாவது: தைப்பொங்கல் என்பது பானையும் அரிசியும் அடுப்பும் சம்பந்தப்பட்ட விடயம் மட்டுமல்ல, உழைப்பாளர்களின் வியர்வை, அதனால் விளைந்த விளைச்சல், உழைப்பு, உழைப்புக்கு அடிப்படை காரணமான மண், அதனுடைய உரிமை கலந்த விடயமாகும். இதற்குள்ளே தான் வாழ்வும் வளமும் தங்கியிருக்கிறது. கலாசார சிறப்போடு தேச உணர்வும் அதன் பாதுகாப்பும் அதற்கான உறுதியும் மேலோங்கி இருக்கின்றது. இவற்றையெல்லாம் சிதைத்தழித்து தொடர் அழிவுகளுக்கும் திட்டமிட்டுக்கொண்டு, தேசிய பொங்கல் என்று ஜனாதிபதி தமிழர் தாயகத்தில் காலடி வைப்பதையோ, அவரின் வருகையை வரவேற்பதையோ நாம் எந்த வகையிலும் அங்கீகரிக்க முடியாது. வியர்வை விதைத்த நிலம், உழுது விளைந்த நிலம், பொங்கலிட்டு மகிழ்ச்சியோடு உறவுகளோடு கூடி பகிர்ந்து உண்ட நிலம் இன்று இராணுவத்திடம் சிக்கியுள்ளது. அரச திணைக்களங்கள் பேரினவாத சிந்தனையோடு தமிழர்களின் நிலத்தையும் வாழ்வையும் தொடர்ந்து சூறையாடிவரும் காலமிது. இவற்றுக்கு மத்தியில் தேசிய தைப்பொங்கல் என்ற அரசியல் நாடகம். இதனை ஏற்க தமிழர்கள் ஏமாளிகள் அல்லர் என்பதை போலி தேசியவாதிகள் உணர வேண்டும். தமிழர்களின் கலாசாரத்தை முற்றாக அழிப்பதற்கு போதைப்பொருட்களின் பாவனையும் எங்கும் வியாபித்துள்ளது. இதற்குப் பின்னணியில் அரச படைகள் இருப்பதாகவும் மக்கள் சந்தேகிக்கின்றனர். நாட்டில் வேறெந்த பிரதேசத்திலும் இல்லாத அளவுக்கு முப்படையினரும், பொலிஸாரும், அவர்களுக்கு உதவியாக இரகசிய பொலிஸாரும், அவர்களின் புலனாய்வாளர்களும், அவர்களோடு சேர்ந்து இயங்கும் ஒட்டுக் குழுக்களும் பலமாக இருக்கும்போது போதைப்பொருட்கள் வட கிழக்கில் அதிகரித்துள்ளதென்றால், அதற்கு பொறுப்பேற்க வேண்டியது, பாதுகாப்பு அமைச்சும் பாதுகாப்புக்கு பொறுப்பான ஜனாதிபதியுமே. இத்தகைய கலாசார அழிவை தமிழர் தாயகத்தில் விதைத்து, அதன் அறுவடையில் மகிழ்ந்துதானா ஜனாதிபதி தேசிய தைப்பொங்கல் என தமிழர் தாயகத்தில் காலடி வைக்கிறார் என்றே கேட்கிறோம். தமிழர்களின் தேசிய பாதுகாப்புக்காக போராடி உயிர்த்தியாகம் செய்தோரை சொந்த மண்ணிலே நினைவுகூர முடியாது. இறுதி யுத்தத்தில் வான் தாக்குதலாலும், நச்சு குண்டுகளாலும் படுகொலை செய்யப்பட்டோரை கூட்டாக நினைவுகூருவதற்கு முடியாதுள்ளது. வலிந்து காணாமலாக்கப்பட்டோருக்கு நீதி இல்லை. தமிழர் தேசியத்தின் உயிர்த்துடிப்போடு இயங்கியவர்கள் அரசியல் கைதிகளாகி விடுதலையின்றி வாடுகின்றனர். இவற்றுக்கெல்லாம் அடிப்படை காரணகர்த்தாவான தற்போதைய ஜனாதிபதி, தேசிய தைப்பொங்கல் என தமிழர்கள் மத்தியில் வந்து, உழைப்பின் விழாவை, பாரம்பரிய தேசிய நிகழ்வை அசிங்கப்படுத்துவதற்கு இடமளிக்கக் கூடாது. அத்தோடு தேசிய தைப்பொங்கல் என தமிழர்களை கூட்டிச் சேர்க்கும் செயற்பாட்டிலும் பல அரசியல் கைக்கூலிகள் நம் மத்தியில் தோன்றி இயங்கத் தொடங்கியுள்ளனர். இது இவர்களின் அரசியலாகும். இவர்கள் காலகாலமாக எமக்கு எதிராகவே செயற்பட்டு வந்துள்ளனர். இத்தகைய புல்லுருவிகளை அகற்றி, தமிழர் தாயக அரசியலை காப்பதற்கு உறுதிகொண்டு, நிலம் காக்கும் பொங்கல் எம் மண்ணிலே பொங்க சக்திகொள்வோம் என தெரிவித்துள்ளார். https://www.virakesari.lk/article/145773

கைலாசாவுடன் அமெரிக்கா, இந்தோனேசியா ஒப்பந்தம்! monishaJan 13, 2023 15:52PM ஷேர் செய்ய : அமெரிக்கா மற்றும் இந்தோனேசியா உடன் நித்யானந்தாவின் ஐக்கிய கைலாசா இருதரப்பு ஒப்பந்தம் செய்து கொண்டுள்ளது. ஐக்கிய கைலாசா மற்றும் ஐக்கிய அமெரிக்காவின் நியூ ஜெர்சி மாகாணத்திலுள்ள நெவார்க் சிட்டியும் “இருதரப்பு நெறிமுறை ஒப்பந்தத்தில்” கையெழுத்திடும் விழா நெவார்க் நகர அரங்கில் நடைபெற்றது. இந்த விழாவில் ஐ.நா.வுக்கான கைலாசாவின் நிரந்தர தூதர் விஜயப்ரியா நித்யானந்தா, மேயர் பராகா, துணை மேயர் டிஃப்ரீடாஸ் உள்ளிட்டோர் கலந்துகொண்டனர். மேலும், நியூ ஜெர்சியிலிருந்து கைலாசாவின் பிரதிநிதிகளும் கலந்து கொண்டனர். இந்த விழாவின் போது கைலாசாவின் கொடி ஏற்றப்பட்டு கைலாசாவின் தேசிய கீதம் பாடப்பட்டது. இந்த ஒப்பந்தத்தின்படி கைலாசாவில், தொற்றுநோய், சிக்கலான மனநலப் பிரச்சனைகள், வன்முறை, வறுமை, கல்வியறிவின்மை மற்றும் காலநிலை மாற்றம் போன்றவற்றின், பரஸ்பர முயற்சிகளை எதிர்கொள்வதற்கான பரஸ்பர முயற்சிகளில் இந்த ஒப்பந்தம் ஒரு குறிப்பிடத்தக்க முன்னோக்கிச் செல்ல உதவும்.” என்று தெரிவிக்கப்பட்டுள்ளது. இது குறித்து நேற்று (ஜனவரி 12) வெளியான செய்திக் குறிப்பில், “இந்த ஒப்பந்தமானது, உலக அமைதிக்கான ஒரு சிறந்த பார்வைக்கான பரந்த இருதரப்பு நிகழ்ச்சி நிரலை மேலும் முன்னெடுப்பதற்காக, கைலாசா ஐக்கிய மாகாணங்களுக்கும், நெவார்க் நகரத்திற்கும் இடையிலான ஒத்துழைப்பின் முக்கிய தொடக்கத்தை இன்று குறிக்கிறது. இந்த நெறிமுறை இருதரப்பு உறவுகளுடன் கைலாசா தனது மனிதாபிமான சேவைகளை நெவார்க் நகரத்திற்குக் கொண்டு வந்து அதன் சமூகத்திற்குச் சேவை செய்ய எதிர்பார்த்துள்ளது. கைலாசா ஐக்கிய மாகாணங்கள் அதன் சொந்த இறையாண்மை நிலப்பரப்புடன் பண்டைய அறிவொளி பெற்ற இந்து நாகரிக தேசத்தின் மறுமலர்ச்சியாகும். உலகெங்கிலும் உள்ள 2 பில்லியன் இந்து புலம்பெயர்ந்தோருக்கு இது முதல் இறையாண்மை தேசமாகும்” என்று குறிப்பிடப்பட்டுள்ளது. தொடர்ந்து, இந்தோனேசியா உடனும் ஐக்கிய கைலாசா ஒப்பந்தம் செய்துள்ளது. அமெரிக்காவின் நெவார்க் நகரத்தோடு கைலாசா ஒப்பந்தம் செய்து கொண்டுள்ளது குறித்து நித்யானந்தாவின் முகநூல் பக்கத்தில் புகைப்படங்களும் தகவல்களும் இடம்பெற்றுள்ளன. https://minnambalam.com/india-news/kailasa-signs-bilateral-agreement-with-america-indonesia/

கிழக்கு உக்ரைனின் சோலேடர் நகரைக் கைப்பற்றியதாக ரஷ்யா அறிவிப்பு! கிழக்கு உக்ரைனில் உள்ள உப்புச் சுரங்க நகரமான சோலேடரைக் நீண்ட போருக்குப் பிறகு தங்கள் படைகள் கைப்பற்றியுள்ளதாக ரஷ்யா அறிவித்துள்ளது. டிசம்பரில் கெர்சன் நகரை இழந்த பின்னர் சமீபத்திய மாதங்களில் நல்ல போர்க்கள உத்திகளுடன் களமிறங்கிய ரஷ்யாவுக்கு சோலிடர் ஒரு நல்ல பரிசாக அமைந்துள்ளது. இந்த முன்னேற்றம், உக்ரைனிய கட்டுப்பாட்டின் கீழ் இருக்கும் கிழக்கு டொனெட்ஸ்க் மாகாணத்தின் மற்ற பகுதிகளை, குறிப்பாக அருகிலுள்ள மூலோபாய நகரமான பாக்முட்டை கைப்பற்ற ரஷ்ய துருப்புகளுக்கு ஊக்கமளிக்கும். ஆனால், இதை மறுத்துள்ள உக்ரைனிய அதிகாரிகள், சோலேடருக்கான சண்டை இன்னும் நடந்து வருவதாகக் கூறுகின்றனர். இந்த நகரம் ஒப்பீட்டளவில் சிறியது, போருக்கு முந்தைய மக்கள் தொகை வெறும் 10,000, மற்றும் அதன் மூலோபாய முக்கியத்துவம் விவாதத்திற்குரியது. ஆனால் ரஷ்யப் படைகள் அதைக் கைப்பற்றியது உறுதியானால், இது ரஷ்யாவுக்கு மிகப்பெரிய வெற்றியாக இருக்கும். வியாழனன்று 15 குழந்தைகள் உட்பட 559 பொதுமக்கள் சோலேடர் நகரில் தங்கியிருப்பதாகவும், அவர்களை வெளியேற்ற முடியவில்லை என்றும் பிராந்திய ஆளுநர் பாவ்லோ கைரிலென்கோ தெரிவித்தார். https://athavannews.com/2023/1320099

புதிய கூட்டணி குத்துவிளக்கு சின்னத்தில் போட்டி ! ரெலோ, புளொட், ஈ.பி.ஆர்.எல்.எவ், தமிழ் தேசிய கட்சி, மற்றும் ஜனநாயக போராளிகள் கட்சி ஆகியன இணைந்து புதிய கூட்டணிக்கான ஒப்பந்தத்தில் கைச்சாத்திட்டுள்ளன. யாழ்ப்பாணத்திலுள்ள தனியார் விடுதியில் நேற்று வெள்ளிக்கிழமை இடம்பெற்ற கட்சிகளின் தலைவர்களால் எட்டப்பட்ட முடிவுக்கமைய ஒப்பந்தம் கைச்சாத்தானது. அதன்படி எதிர்வரும் தேர்தலில் ஜனநாயக தமிழ் தேசிய கூட்டணி எனும் பெயரில் குத்துவிளக்கு சின்னத்தில் போட்டியிட தீர்மானிக்கப்பட்டுள்ளது. ஒப்பந்தத்தில் புளொட் சார்பாக த.சித்தார்த்தனும் ரெலோ சார்பாக செல்வம் அடைக்கலநாதனும் ஈ.பி.ஆர்.எல்.எவ் சார்பாக சுரேஷ் பிரேமச்சந்திரனும் தமிழ் தேசிய கட்சி சார்பாக என்.ஸ்ரீகாந்தாவும் ஜனநாயக போராளிகள் கட்சி சார்பாக வேந்தனும் கையெழுத்திட்டனர். சின்னம் தொடர்பாக ஏற்பட்ட இழுபறி காரணமாக விக்னேஷ்வரன் தலைமையிலான தமிழ் மக்கள் கூட்டணி மற்றும் மணிவண்ணன் அணியினர் இடை நடுவில் நேற்றைய கூட்டத்திலிருந்து வெளியேறியிருந்தமை குறிப்பிடத்தக்கது. https://athavannews.com/2023/1320153

ரீயூனியன் தீவில் இருந்து 46 இலங்கையர்கள் நாடு கடத்தப்பட்டனர் ! கடல் மார்க்கமாக ரீயூனியன் தீவிற்குள் சட்டவிரோதமாக பிரவேசிக்க முயற்சித்த 46 இலங்கை பிரஜைகளை அந்நாட்டு அதிகாரிகள் விமானம் மூலம் திருப்பி அனுப்பியுள்ளனர். 2022 ஆம் ஆண்டு டிசம்பர் மாதம் 2 ஆம் திகதி நீர்கொழும்பில் இருந்து பல நாள் மீன்பிடி இழுவை படகில் குறித்த நபர்கள் புறப்பட்டதாக கடற்படை தெரிவித்துள்ளது. தனிநபர்கள் குழுவில் பல நாள் மீன்பிடி கப்பலின் பணியாளர்கள், இரண்டு பெண்கள் மற்றும் ஒரு குழந்தை உட்பட 43 ஆண்கள் உள்ளனர். 2022 ஆம் ஆண்டு டிசம்பர் மாதம் 24 ஆம் திகதி பிரான்சின் ரீயூனியன் தீவிற்குள் சட்டவிரோதமாக நுழைய முற்பட்ட போது அவர்கள் கைது செய்யப்பட்டனர். இவர்கள் யாழ்ப்பாணம், கிளிநொச்சி, முல்லைத்தீவு, மன்னார், மட்டக்களப்பு, சிலாபம் மற்றும் நீர்கொழும்பு ஆகிய பகுதிகளில் வசிப்பவர்கள் என அடையாளம் காணப்பட்டுள்ளனர். இதேவேளை, இவர்கள் அனைவரும் மேலதிக சட்ட நடவடிக்கைகளுக்காக குற்றப் புலனாய்வு திணைக்களத்திடம் ஒப்படைக்கப்படவுள்ளனர். https://athavannews.com/2023/1320142