இலங்கை இனப்படுகொலையின் 4ஆம் ஆண்டு நினைவு: சேலம் மாணவர்கள் அனுசரிப்பு

சேலம்: இலங்கை, முள்ளிவாய்க்காலில் நடந்த இனப்படுகொலையின் 4ஆம் ஆண்டை நினைவு கூறும் வகையில் இன்று சேலம் அரசு கலைக்கல்லூரி மற்றும் சட்டக்கல்லூரி மாணவர்கள் அரசு கலைக்கல்லூரி நுழைவாயிலில் நினைவு அஞ்சலி செலுத்தினார்கள்.

 

சேலம் தமிழ் ஈழத்திற்கான மாணவர் போராட்டக்குழுவினர், கடந்த ஒரு மாதத்திற்கு முன்பே இலங்கை, முள்ளிவாய்க்காலில் நடந்த இனப்படுகொலையின் 4ஆம் ஆண்டு நினைவு தினத்தை அனுசரிக்கும் வகையில், சேலம் கலைக்கல்லூரியிலிருந்து, போஸ் மைதானம் வரை ஊர்வலமாக வருவதற்காக சேலம் மாநகர காவல்துறையில் அனுமதி பெற்று அறிவிப்பு வெளியிட்டார்கள். ஆனால், திடீரென்று நேற்று காவல்துறை அனுமதியை ரத்து செய்தது. இதனால் கலைக்கல்லூரி நுழைவாயிலிலேயே இன்று மாலை 4 மணிக்கு முள்ளிவாய்க்கால் படுகொலையை நினைவு கூறும் வகையில் மெழுகுவர்த்தி ஏந்தி நினைவஞ்சலி செலுத்தினர்.

 

இதில் பேசிய மாணவர்கள், 'வருகின்ற நாடாளுமன்ற தேர்தலில் 40 தொகுதிகளிலும் காங்கிரஸை வீழ்த்த வேண்டும். ஈழத்தமிழர்களை கொல்லுவதற்கு ஆயுதங்களை கொடுத்தது இந்தியாதான். இந்தியாவும், குறிப்பாக மன்மோகன்சிங், சோனியா தலைமையிலான காங்கிரஸ் அரசுதான். அதனால், வருகின்ற நாடாளுமன்ற தேர்தலில், 40 தொகுதியியிலும் காங்கிரஸை வீழ்த்த அனைத்து மாணவர்களும் ஒன்று திரண்டு, 40 தொகுதியிலும் பிரச்சாரம் செய்து காங்கிரஸை படுதோல்வி அடையச் செய்ய வேண்டும். இந்த சபதத்தை அனைத்து மாணவர்களும் ஏற்றுக்கொள்ள வேண்டும்' என சூளுரைத்தார்கள்.