ஈழத்தமிழர் பிரச்சினை, மீனவர் பிரச்சினையில் மாற்றாந்தாய் மனப்பான்மை: மத்திய அரசுக்கு அதிமுக கண்டனம்!

கூட்டாட்சி தத்துவத்திற்கு எதிராக செயல்பட்டு, தமிழக அரசை ``மாற்றாந்தாய்'' மனப்பான்மையுடன் நடத்தும் மத்திய காங்கிரஸ் அரசுக்கு கடும் கண்டனம் தெரிவித்து அ.தி.மு.க. செயற்குழு தீர்மானம் நிறைவேற்றியுள்ளது.இது குறித்து செயற்குழு நிறைவேற்றிய தீர்மானம் வருமாறு:-

கூட்டாட்சி தத்துவத்திற்கு எதிராகவும், மாற்றாந்தாய் மனப்பான்மையுடனும் செயல்பட்டு வரும் மத்திய அரசுக்கு கண்டனம்!  

தமிழ் நாட்டில் சிறப்பாக செயல்படுத்தப்பட்டு வரும் பொது விநியோகத் திட்டத்திற்கு குந்தகம் விளைவிக்கும் வகையில் உணவுப் பாதுகாப்புச் சட்டத்தினை நிறைவேற்ற முயற்சித்தல் சர்க்கரை ஆலைகளின் மீதான கட்டுப்பாட்டை தளர்த்துதல்; குறைந்த கட்டணத்தில் நிறைவான சேவையை அளிக்கும் அரசு போக்குவரத்துக் கழகங்கள் கொள்முதல் செய்யும் டீசலின் விலையை வரலாறு காணாத அளவுக்கு உயர்த்துதல்; மாநிலங்களை கலந்தாலோசிக்காமல் தீவிரவாதத்திற்கு எதிரான தேசிய மையத்தினை ஏற்படுத்த முயற்சி செய்தல் போன்ற கூட்டாட்சித் தத்துவத்திற்கு ஊறு விளைவிக்கும் நடவடிக்கைகளையும்;

தமிழ் நாடு அரசு கேபிள் டி.வி. நிறுவனத்திற்கு உரிமம் வழங்காதது; தமிழக மீனவர்களை தொடர்ந்து அச்சுறுத்தும் இலங்கை அரசை தட்டிக் கேட்காதது; தானே புயல் ஏற்பட்ட போதும், நீலம் புயல் ஏற்பட்ட போதும், வறட்சி கோரத்தாண்டவம் ஆடிய போதும் தமிழக அரசு கோரிய நிவாரணத் தொகைகளை வழங்காதது; தேசிய வளர்ச்சிக் குழுக் கூட்டத்தில் மாநிலத்தின் தேவைகளை எடுத்துச் சொல்லக்கூட போதுமான நேரத்தை ஒதுக்காதது;

குடும்ப அட்டைதாரர்களுக்கு வழங்கப்படும் மண்ணெண்ணெயின் அளவை குறைப்பது; தமிழகத்திற்குத் தேவையான மின்சாரத்தை மத்திய தொகுப்பிலிருந்து வழங்காதது; இலங்கைத் தமிழர்களுக்கு ஆதரவாக செயல்படாதது; தமிழக மீனவர்களின் வாழ்வாதாரத்தை உறுதி செய்ய நடவடிக்கை எடுக்காதது போன்ற பாரபட்சமான நடவடிக்கைகளையும் எடுத்து வரும் மாற்றாந்தாய் மனப்பான்மை கொண்ட மத்திய அரசுக்கு இச்செயற்குழு தனது வன்மையான கண்டனத்தைத் தெரிவித்துக் கொள்கிறது.

இவ்வாறு தீர்மானம் நிறைவேற்றப்பட்டுள்ளது.

http://dinaithal.com/index.php?option=com_content&view=article&id=15516:the-issue-of-war,-the-issue-of-fishermen-step-in-the-complex-central-government-condemned-the-aiadmk&catid=36:tamilnadu&Itemid=102