20ஆவது திருத்தச் சட்டமும் நாடாளுமன்றத்திற்கு!

 

நாடாளுமன்ற ஆசனங்களை 250ஆக அதிகரிக்கும் 20ஆவது அரசியலமைப்புத் திருத்தச் சட்டமூலத்தை ஶ்ரீலங்கா சுதந்திரக் கட்சி சார்பாக நாடாளுமன்றத்திற்குக் கொண்டுவருவதாக அமைச்சர் எஸ்.பீ.திஸாநாயக்க தெரிவித்துள்ளார்.

 

19ஆவது அரசியலமைப்புத் திருத்தச் சட்டம் நாடாளுமன்றத்திற்குக் கொண்டுவந்து விவாதிக்கும் சந்தர்ப்பத்திலேயே 20ஆவது திருத்தத்தையும் நாடாளுமன்றத்தில் சமர்ப்பிக்க ஶ்ரீலங்கா சுதந்திரக் கட்சி இணக்கம் கண்டுள்ளதாக அவர் மேலும் தெரிவித்தார்.

 

கொழும்பிலுள்ள சிங்கள தனியார் வானொலியொன்றுக்கு வழங்கிய செவ்வியிலேயே அவர் இதனைத் தெரிவித்துள்ளார்.

 

தொகுதி வாரியான தேர்தல் முறையில் 165 ஆசனங்களும், விகாதாசார தேர்தல் முறையில் 60 ஆசனங்களும், தேசியப் பட்டியலில் 25 ஆசனங்களும் அடங்கலாக மொத்தம் 250 ஆசனங்கள் நாடாளுமன்றத்தைப் பிரதிநிதித்துவம் செய்யும் வகையில் புதிய திருத்தம் செய்யப்படுவதற்கு ஶ்ரீலங்கா சுதந்திரக் கட்சி இணக்கம் கண்டுளு;ளதாக அவர் மேலும் தெரிவித்துள்ளார்.

 

இதுகுறித்து விசேட பேச்சுவார்த்தையொன்று அண்மையில் தேர்தல் ஆணையாளருடன் இடம்பெற்றதாகவும் அவர் மேலும் குறிப்பிட்டார்.

 

நிறைவேற்று அதிகாரம் கொண்ட ஜனாதிபதியின் அதிகாரங்களைக் குறைக்கும் 19ஆவது திருத்தச் சட்டத்துடன், தேர்தல் முறையில் மாற்றத்தை ஏற்படுத்தும் 20ஆவது திருத்தச் சட்ட மூலத்தையும் ஒன்றாக சமர்ப்பித்து நிறைவேற்ற வேண்டும் என ஶ்ரீலங்கா சுதந்திரக் கட்சியின் இந்தப் பேச்சுவார்த்தைகளின் போது நாடாளுமன்ற உறுப்பினர்கள் தீர்மானித்ததாக அவர் மேலும் குறிப்பிட்டார்.