தாய்க்குப்பின் வந்த தாரம் - காதலர் தினக் கவிதை

இன்று காதலர் தினம். காதலர் தினம் என்ன அவர்களுக்கு மட்டும்தானா நமக்கில்லையா? வாழ்வில் இணைந்து கொண்ட தம்பதிகளுக்கும் காதலுண்டல்லவா! ஆனால் அதன் இயல்புதான் சற்று வேறாயிருக்கும். அந்த வேறுபட்ட இயல்பைச் சில வருடங்களுக்கு முன் கவிதையாக்கினேன். அதனைக் கீழே தருகிறேன்.

தாய்க்குப்பின் வந்த தாரம்

வாய்க்குச் சுவைதருவாள் என்றும் வாழ்விற் துணைவருவாள் - காம 
நோய்க்கு மருந்தாவாள் துயர் போக்கும் அருள் தருவாள்

அள்ளி அணைக்கையிலே மனம் ஆறும் பரிசத்திலே
உள்ள நிறைவினிலே துன்பம் ஓடிடும் தூரத்திலே

அன்னையிருந்த இடம் இன்று அவள் அரியணையாம்
என்னைக் கலந்துவிட்டாள் இன்று எனதென்றொன்றுமில்லை

வட்ட நிலாவொளிரும் அவள் வதனப் புன் சிரிப்பில்
கெட்டதெல்லாமழியும் அவள் கிட்டநிற்கும் மகிழ்வில்

நெஞ்சு நிறைந்த சுகம் அவள் நிமிர்ந்து பார்க்கையிலே
அஞ்சுதற்கேதுமில்லை அவள் அருகிருக்கையிலே

கள்ளக் கடைக்கண்ணால் என்னைக் கவனிக்கும் போதில்
உள்ளம் நெகிழ்ச்சியுறும் நெஞ்சில் உவகை மீதூறும்

ஊட்டி அக்காதல்வெறி என்றன் உயிரை வாங்குதற்காய் - கண்ணை
ஈட்டியென எறிவாள் என்றன் இதயம் தேன்வடிக்கும்

பாலைப் பசுந்தரைபோல் நான் படும் துயர்களிலே
சோலைக் குளிர் தருவாள் நான் துயர்மறந்திருப்பேன்

நெஞ்சில் நிறைந்தவளை மன நிறைவைத் தந்தவளை 
அஞ்சிடத் தேவையில்லா மன ஆறுதல் தந்தவளை

தாய்க்கு அடுத்தவளாய் என்னைத் தாங்கிட வந்தவளை
சேய்களைப் பெற்றெடுத்து அறம் சிறக்கச் செய்தவளை

கண்ணின் இமைபோல என்னைக் காத்து அன்பு செய்து
உண்ண உணவளித்து உடற் பசிக்கும் தீனியிட்டு

சக்தி வடிவினளாய் முன்னைத் தவத்தின் நற்பயனாய்
முக்தியதில்லறமே எனும் முடிவைத் தந்தவளை

தாயின் அடுத்தவளாய் உயர் தராதரம் கொடுத்தே 
தூய மனதுடனே நான் சொல்லும் புகழுரைகள்

இல்லெனும் கோயிலிலே நான் இசைக்கும் அர்ச்சனைகள்
சொல்லறம் பேணுபவர் மனம் தோன்றும் நல்லுரைகள்.

நல்லதும் கெட்டதும்தான் நமது வாழ்வினிலே
உள்ளவையானாலும் அதில் உமியை நீக்கிவிட்டே

வாழ்வு தரும் சுவையை மட்டும் வடித்து இன்பமுடன்
நாளும் மகிழ்வுறலே என்றும் நமக்கு வேண்டியதாம்

அன்பை இயற்றுகிற உயர் அரிய இல்லறத்தில்
இன்பமும் துன்பமதும் என இரண்டும் உள்ளனவால்

வண்டியின் சக்கரம்போல் இல் வாழ்வில் துணைவர்களும்
ஒண்டித்தியங்கிடலே என்றும் உண்மை நிறைவு தரும்.