வலிகாமம் வடக்கிலிருந்து வெளியேற்றப்பட்டவர்கள் மீள்குடியேற்றம் கோரி போராட்டம்

யாழ்ப்பாணம் வலிகாமம் வடக்கில் இருந்து வெளியேற்றப்பட்டு பல வருடங்களாக முகாம்களில் வசித்து வரும் மக்கள் தங்களை தமது சொந்தக் காணிகளில் குடியேறுவதற்கு அனுமதிக்குமாறு கோரி வெள்ளியன்று உண்ணாவிரதப் போராட்டத்தில் ஈடுபட்டிருந்தனர்.

சுன்னாகம் கண்ணகி முகாம் பகுதியில் இந்தப் போராட்டம் இடம்பெற்றுள்ளது.

அரச அதிகாரிகள், நாடாளுமன்ற உறுப்பினர்கள், அமைச்சர்கள், வடமாகாண சபையினர் உள்ளிட்ட பலரிடமும் தமது கோரிக்கையைத் தெரிவித்த போதிலும் எந்தப் பலனும் ஏற்படவில்லை என அவர்கள் கூறினர்.

அத்துடன் இலங்கைக்கு வருகை தந்திருந்த பிரித்தானிய பிரதமர் டேவிட் கேமரான், ஐ.நா. மனித உரிமைகள் ஆணையாளர் அல் ஹுசைன், ஜனாதிபதி, பிரதமர் உள்ளிட்ட பலருக்கும் தமது வேண்டுகோளை முன்வைத்திருந்த போதிலும் பிரச்சினைக்கு முடிவு ஏற்படவில்லை என்றார் போராட்டத்தில் கலந்து கொண்ட கோணப்பிலவு முகாம் தலைவர் பொன்னுத்துரை இன்பராசா.

ஜனாதிபதி மைத்திரிபால சிறிசேன அவர்கள் தமது முகாமுக்கு வந்தபோது, ஆறு மாத காலத்தில் தங்களுடைய பிரச்சினைக்குத் தீர்வு காணப்படும் என உறுதியளித்திருந்த போதிலும், தங்களுடைய காணிகள் பலாலி விமான தள அபிவிருத்திக்காகப் பயன்படுத்தப்படும் என்று வெளியாகியுள்ள அறிக்கை தங்களுக்கு அச்சத்தை மூட்டியிருக்கின்றது என்கிறார் அவர்.

முன்னாள் நாடாளுமன்ற உறுப்பினர் சுரேஸ் பிரேமச்சந்திரன், வடாகாண சபை உறுப்பினர் சர்வேஸ்வரன், மீள்குடியேற்ற சங்கத் தலைவர் கஜீபன் உள்ளிட்ட முக்கியஸ்தர்களும் இந்தப் போராட்டத்தில் கலந்து கொண்டிருந்தனர்.

நாடாளுமன்ற உறுப்பினர் டக்ளஸ் தேவானந்தா உண்ணாவிரதப் போராட்டத்தில் ஈடுபட்டிருந்தவர்களைச் சந்தித்துக் கலந்துரையாடினார்.

http://www.bbc.com/tamil/sri_lanka/2016/03/160304_valikamam