பெல்ஜியத் தலைநகர் ப்ரஸ்ஸல்ஸில் சுடப்பட்டவர் அடையாளம் காணப்பட்டார்

பெல்ஜியத் தலைநகர் ப்ரஸ்ஸல்சில் செவ்வாய்க் கிழமையன்று காவல்துறை நடவடிக்கையில் சுட்டுக கொல்லப்பட்ட நபர் அல்ஜீரியாவைச் சேர்ந்தவர் என கண்டறியப்பட்டுள்ளது.

பல்கெய்த் முஹம்மது என்ற அவர் பெல்ஜியத்திற்கு சட்டவிரோதமாக சென்றவர் எனத் தெரியவந்துள்ளது.
ஐஎஸ் குழுவினரின் கொடி, தீவிரவாத சித்தாந்தங்கள் அடங்கிய புத்தகம், ஒரு ஏகே 47 ரக துப்பாக்கி ஆகியவை அவரது உடலுக்கு அருகில் கிடந்ததாக பொலிசார் கூறுகின்றனர்.

அந்த வீட்டிலிருந்து தப்பிச்சென்ற மேலும் இரண்டு பேரைக் காவல்துறையினர் தேடிவருகின்றனர்.மேலும் இரண்டு பேரைக் காவல்துறையினர் விசாரித்துவருகின்றனர். ஆனால், அவர்கள் இந்த துப்பாக்கிச் சூடு சம்பவத்துடன் தொடர்புடையவர்களா என்பது தெரியவில்லை எனக் கூறப்படுகிறது.

கடந்த நவம்பரில் பாரிஸில் நடந்த தீவிரவாதத் தாக்குதல் தொடர்பான சோதனையின் போது இந்த துப்பாக்கிச் சூடு சம்பவம் நடந்துள்ளது. செவ்வாய்க் கிழமை மதியம் இந்த வீட்டைச் சோதனையிட காவல்துறையினர் அங்கு சென்றனர்.

அவர்கள் உள்ளே நுழைந்ததும் அந்த வீட்டிற்குள் இருந்தவர்கள் காவல்துறையினரைப் பார்த்து சுட ஆரம்பித்ததாக காவல்துறை தெரிவிக்கிறது.

இந்த நடவடிக்கையில் ஃப்ரெஞ்சு காவல்துறையினரும் ஈடுபட்டனர். அவர்களில் ஒருவர் துப்பாக்கிச் சூட்டில் காயமடைந்தார்.

பெல்ஜியத்தின் தலைநகர்  பிரசல்ஸில் பாரிய தேடுதல் நடவடிக்கை ஆரம்பமாகியுள்ளது:

16-03-2016 - 01:55

பாரிஸ் தாக்குதல் சந்தேக நபர்களை இலக்கு வைத்து பெல்ஜியத்தின் தலைநகர்  பிரசல்ஸில் பாரிய தேடுதல் நடவடிக்கை ஆரம்பமாகியுள்ளது. பிரசல்ஸின் புறநகர் பகுதியான பொரெஸ்டில் உள்ள அடுக்குமாடி ஒன்றில் பொலிஸார் தேடுதல் நடவடிக்கையை மேற்கொண்ட வேளை பாரிஸ் தாக்குதல் சந்தேகநபர் என கருதப்படும் ஒருவர் சுட்டுக் கொல்லப்பட்டுள்ள அதேவேளை அங்கிருந்து சில சந்தேகநபர்கள் தப்பியோடியுள்ளதாகவும் செய்திகள் வெளியாகியுள்ளன.

இதன் போது நான்கு பொலிஸார் காயமடைந்துள்ளனர். இந்த தேடுதல் நடவடிக்கையில் பிரான்ஸ் பொலிஸாரும் ஈடுபட்டனர். அதன் போது பிரான்ஸின் பெண் பொலிஸ் அதிகாரியொருவர் காயமடைந்துள்ளார் என அதிகாரிகள் தெரிவித்துள்ளனர். பொலிஸார் அடுக்குமாடியொன்றை சோதனையிட சென்ற வேளை அங்கிருந்த பலர் அவர்கள் மீது துப்பாக்கி பிரயோகத்தை மேற்கொண்டனர் என அதிகாரிகள் குறிப்பிட்டுள்ளனர்.