தமது நிலைப்பாட்டை வலியுறுத்தி மனித உரிமைகள் கண்காணிப்பகம் மனோ தித்தவலவுக்கு கடிதம்

இலங்கையின் அமைச்சரவை ஒப்புதல் வழங்கியுள்ள காணாமல் போனோர் தொடர்பிலான அலுவலகம் தொடர்பில் மீண்டும் ஒருமுறை மனித உரிமைகள் கண்காணிப்பகம் கேள்வி எழுப்பியுள்ளது.

இதில் ஏற்கனவே தமது கண்காணிப்பகம் வெளியிட்ட கருத்தை வலியுறுத்தியே இன்றும் கேள்வி எழுப்பப்பட்டுள்ளது.

ஜெனீவா மனித உரிமைகள் பேரவையின் யோசனைப்படி இலங்கை ஏற்றுக்கொண்ட விடயங்களில் காணாமல் போனோர் அலுவலகமும் அடங்குகிறது.

இந்தநிலையில் கடந்த வாரம் இலங்கையின் அமைச்சரவை இவ்வாறான ஒரு அலுவலகம் அமைக்கப்படுவதற்கு தமது அனுமதியை வழங்கியிருந்தது.

இந்தநிலையில் குறித்த அலுவலகம் நிறுவப்படுமாக இருந்தால் அது காணாமல் போனோரின் உறவினர்களின் கருத்துக்களையும் உள்வாங்கவேண்டும் என்று கண்காணிப்பகம் தெரிவித்திருந்தது.

இதனை நிராகரிக்கும் தொனியில் இலங்கையின் நல்லிணக்க பொறிமுறை செயலத்தின் செயலாளர் மனோ தித்தவல, கண்காணிப்பகத்துக்கு கடிதம் ஒன்றை அனுப்பியிருந்தார். இதனையடுத்தே கண்காணிப்பகம் மனோ தித்தவலவுக்கு பதில் கடிதத்தை அனுப்பியுள்ளது.

அதில் இலங்கையின் விடயங்களில் பல்லாண்டுகள் தொடர்கொண்ட அமைப்பு என்ற வகையில், காணாமல் போனோரின் உறவினர்களின் கருத்துக்களும் உள்வாங்கப்பட்டே இந்த அலுவலகம் அமைக்கப்படவேண்டும் என்று கண்காணிப்பகம் கோரியுள்ளது.

நல்லிணக்க பொறிமுறைகளை ஏற்படுத்துவதில் இலங்கை அரசாங்கத்துக்கு பிரச்சினைகள் உள்ளன.

எனினும் ஜெனீவாவில் ஏற்றுக்கொண்ட யோசனைகளை இலங்கை அரசாங்கம் நிறைவேற்ற கடமைப்பட்டிருக்கிறது என்று கண்காணிப்பகம் குறிப்பிட்டுள்ளது.

இதேவேளை இந்தவிடயம் குறித்து ஜெனீவாவில் அடுத்த வாரம் பேசவுள்ளதாக கண்காணிப்பகத்தின் ஆசிய வலயப்பணிப்பாளர் பிரட் அடம்ஸ் தெரிவித்துள்ளார்.

http://www.tamilwin.com/lifestyle/01/107393