கொலை குற்றவாளிக்கு சட்ட ஆலோசனை வழங்கினாரா நீதியமைச்சர்?

 

 

இலங்கை கடற்படையின்  குழு ஒன்றினால் 10 மாணவர்கள் கடத்திச் செல்லப்பட்டு கொலை செய்யப்பட்டதாக கூறப்படும் சம்ப வத்துடன் தொடர்புடைய குற்றவாளிகளுக்கு நல்லாட்சி அரசாங்கத்தின் நீதியமைச்சர் விஜயதாச ராஜபக்ச சட்ட ஆலோசனை வழங்கியுள்ளதாக தகவல்கள் வெளியாகியுள்ளன.

 

முன்னாள் ஜனாதிபதி மகிந்த ராஜபக்ச ஆட்சிக்காலத்தில் கடற்படையினரால் கடத்தப்பட்ட 10 மாணவர்கள் திருகோணமலை கட ற்படை முகாமில் வைத்து கொலை செய்யப்பட்டதாக கூறப்படுகிறது.

 

விஜயதாச ராஜபக்சவின் செயற்பாடானது, நல்லாட்சி அரசாங்கத்தில் இருந்து கொண்டு அதனை அழிக்கும் பயங்கரமான சதி த்திட்டம் என அரசியல் அவதானிகள் கூறியுள்ளனர்.

 

2008-2009ஆம் ஆண்டுகளில் நடந்த இந்த மாணவர்களின் கொலைச் சம்பவங்கள் தொடர்பாக கடற்படையின் முன்னாள் தளபதி வசந்த கரன்னாகொடவிடம் குற்றப் புலனாய்வு திணைக்களம் கடந்த 5ஆம் திகதி 5 மணி நேரத்திற்கும் மேல் விசாரணை நடத்தி யுள்ளது.

 

திணைக்களத்தினர் விசாரணை நடத்துவதற்கு முன்னர், கரன்னாகொட விஜயதாச ராஜபக்ச மற்றும் முன்னாள் பிரதம நீதியரசர் சரத் என் சில்வா ஆகியோரிடம் சட்ட உதவிகளை பெற்றுக்கொண்டுள்ளார்.

 

இதற்கு முன்னர் கரன்னாகொட குற்றப் புலனாய்வு திணைக்களத்திடம் வழங்கியுள்ள எழுத்து மூலமான வாக்குமூலத்தை தவிர எந்த கேள்விக்கும் பதிலளிக்க வேண்டாம் என விஜயதாச ராஜபக்சவும் சரத் என் சில்வாவும் கரன்னாகொடவிற்கு ஆலோசனை வழங்கியுள்ளனர்.

 

மேலும் குற்றப் புலனாய்வு திணைக்களத்தினர் தன்னிடம் விசாரணை நடத்தும் முன்னர், விஜயதாச ராஜபக்ச மற்றும் சரத் என் சில்வா ஆகியோர் தனது நண்பர்கள் என கூறியுள்ளார்.

 

தான் நீதியமைச்சராக இருக்கும் வரையில் கோத்தபாய ராஜபக்சவை கைது செய்ய இடமளிக்கப்போவதில்லை என விஜயதாச ராஜபக்ச நாடாளுமன்றத்தில் ஒரு முறை கூறியிருந்தார்.

 

எனினும் இதனை விட அவர் தற்போது மேற்கொண்டுள்ள நடவடிக்கை மிகவும் பாரதூரமானது என சுட்டிக்காட்டப்பட்டுள்ளது.

 

கடற்படையினர் கடத்திச் சென்று கப்பம் கோரி 10 தமிழ், சிங்கள, முஸ்லிம் மாணவர்களை கொலை செய்த சம்பவத்துடன் தொடர்புடைய குற்றவாளிகளை சட்டத்திற்கு முன் கொண்டு வருவதாக ஜெனிவா மனித உரிமை பேரவையில் நீதியமைச்சர் என்ற வகையில் விஜயதாச ராஜபக்ச உறுதியளித்திருந்தார்.

 

இவ்வாறு உறுதியளித்தவர், அந்த குற்றச் செயலுடன் தொடர்புடையவர்களுக்கு இரகசியமான முறையில் சட்ட உதவியளிப்பது நல்லாட்சி அரசாங்கத்தை ஆபத்தில் தள்ளுவதாகும் எனவும் தெரிவிக்கப்பட்டுள்ளது.

http://onlineuthayan.com/news/18734

இவர் பெரும் ஊழல்வாதி. ஆயினும், மகிந்தவை அப்போதிருந்து எதிர்த்து, எதிர்கட்சியும், மைத்திரியும் பதவிக்கு வர ஆதரவாயிருந்த துணிச்சலுக்கே, இவரது தவறுகள் மறக்கப்படுகின்றன.