ஐ.தே.க. அதிருப்தியாளர் குழு, மு.கா இன்று அரசில் இணைகின்றது

சிறிலங்காவின் பிரதான எதிர்க்கட்சியான ஐக்கிய தேசியக் கட்சியிலிருந்து அரசாங்கத்தின் பக்கத்துக்கு கட்சிதாவும் நாடாளுமன்ற உறுப்பினர்களும் முஸ்லீம் காங்கிரசின் நாடாளுமன்ற உறுப்பினர்களும் இன்று அரசில் இணைய உள்ளனர். அதேவேளையில், இவ்வாறு அரசுடன் இணைந்துகொள்பவர்களையும் உள்ளடக்கிய அமைச்சரவை மறுசீரமைப்பும் இன்று நடைபெற உள்ளது.

ஐ.தே.க. தலைமையில் திருப்தியடைந்துள்ள சுமார் பதினேழு வரையிலான நாடாளுமன்ற உறுப்பினர்கள் இன்று அரசில் இணைந்து கொள்வார்கள் என அரசு எதிர்பார்க்கின்றது. ஆனால் 13 உறுப்பினர்களே ஐ.தே.க.வில் இணைந்து கொள்ள உள்ளனர் என ஐ.தே.க.வின் நாடாளுமன்ற உறுப்பினர் ஒருவர் தெரிவித்துள்ளார். இன்று காலை 10 மணிக்கு அலரி மாளிகையில் நடைபெறும் விஷேட வைபவம் ஒன்றில் இவர்கள் அனைவரும் அரசுடன் இணைந்துகொள்வதுடன், புதிய அமைச்சர் பொறுப்புக்களையும் ஏற்றுக்கொள்வார்கள் என அரசாங்க வட்டாரங்கள் தெரிவித்தன.

சிறி லங்கா சுதந்திரக் கட்சியும் ஐ.தே.க.வும் செய்து கொள்ளப்பட்ட புரிந்துணர்வு ஒப்பந்தம் நடைமுறையில் உள்ள போது ஐ.தே.க.வின் நாடாளுமன்ற உறுப்பினர்களை அரசு உள்வாங்குவது சிறீலங்கா அரசுத் தலைவர் மகிந்த ராஜபக்கசாவினது இரட்டை வேடத்தை உள்நாட்டிலும் சர்வதேசத்திலும் அம்பலப்படுத்தியுள்ளதாக ஐ.தே.க.வின் பாராளுமன்ற உறுப்பினர் லக்ஸ்மன் செனிவரட்னா தெரிவித்துள்ளார்.

அதேசமயம் சமாதான முயற்சிகளை முன்னெடுப்பதற்காகவே தாம் அரசில் இணைவதாக சிறி லங்கா முஸ்லீம் காங்கிரசின் தலைவர் ராவூப் ஹக்கீம் தெரிவித்துள்ளார். ஐ.தே.க. மற்றும் சிறிலங்கா முஸ்லிம் காங்கிரஸ் உறுப்பினர்கள் அரசுடன் இணைவதைத் தொடர்ந்து இன்று காலை சிறீலங்கா அரசின் அமைச்சரவை மறுசீரமைப்பு நடைபெற உள்ளது. ஐ.தே.காவின் 17 பாராளுமன்ற உறுப்பினர்களும் முஸ்லீம் கங்கிரசும் அரசில் இன்று இணைந்து கொள்வார்கள் என அரச தரப்பு தகவல் தெரிவிக்கின்றது.

இது தொடர்பாக அரச தரப்பு மேலும் தகவல் தருகையில்:

''புதிய அமைச்சர்களின் பதவியேற்பு வைபவம் இன்று காலை 10.00 மணியளவில் அரச தலைவரின் செயலகமான அலரி மாளிகையில் நடைபெற உள்ளது. ஐ.தே.க.வின் கட்சிதாவும் பாராளுமன்ற உறுப்பினர்கள் எந்தவித நிபந்தனைகளும் இல்லாமல் அரசில் இணையவும், அமைச்சர் பதவிகளை ஏற்கவும் முன்வந்துள்ளனர். மேலும் அரசில் இணையும் ஐ.தே.க. உறுப்பினர்களுடன் புதிய புரிந்துணர்வு ஒப்பந்தத்தை அரசு செய்துகொள்ளாது. ஏனெனில் இந்த புதிய ஒப்பந்தத்தால் ஏற்கனவே ஐ.தே.க, ஜே.வி.பி, மற்றும் றெலஉறுமய போன்ற கட்சிகளுடன் செய்துகொள்ளப்பட்ட புரிந்துணர்வு ஒப்பந்தங்களில் குழப்பம் ஏற்படலாம்.

கட்சிதாவும் 17 ஐ.தே.கா பாராளுமன்ற உறுப்பினர்களில் 10 பேருக்கு அமைச்சர் பதவிகளும் 7 பேருக்கு பிரதிஅமைச்சர் பதவிகளும் வளங்கப்பட உள்ளதுடன், இது தொடர்பாக நேற்று இரவும் கட்சிதாவும் ஐ.தே.க. உறுப்பினர்களுக்கும் அரசுத் தலைவருக்கும் இடையில் பேச்சுக்கள் இடம்பெற்றது'' என அவர்கள் தெரிவித்தனர்.

ஐ.தே.க.விலிருந்து அரச தரப்புக்கு கட்சிதாவும் 17 பாராளுமன்ற உறுப்பினர்களின் விபரம் வருமாறு: கரு ஜெயசூர்யா, எம்.எச் மொகமட், பி. தயாரட்னா, தர்மதாசா பண்டா, ஜீ.எல். பீரீஸ், காமினி லொக்குகே, மிலிந்த மொரகொட, பந்தல குணவர்த்தனா, மனோ விஜயரட்னா, ரஜிதா சேனாரட்னா, ஹேமகுமார நாணயக்காரா, நவீன் திஸநாயக்கா, நோமல் பெரேரா, எம்.முஸ்த்தப்பா, பி.சூரியாராட்ச்சி, லக்ஸ்மன் யாப்பா அபயவர்த்தனா, எட்வேட் குணசேகரா ஆகியோர் இன்று அரசில் இணைய உள்ளனர். மேலும் ரஞ்சித் மதுமபண்டாரா பின்னர் இணைந்து கொள்வார் என தெரிவிக்கப்பட்டுள்ளது.

அரசின் புதிய அமைச்சரவை 50 இற்கு மேற்பட்ட அமைச்சர்களை கொண்டிருக்கும் என எதிர்பார்க்கப்படுகின்றது. அப்படியானால் இது உலகத்தில் மிகப் பெரிய அமைச்சரவையாகும் எனபதும் குறிப்பிடத்தக்கது

http://www.eelampage.com/?cn=30643