வேலையின்மை, ஊழலை கண்டித்து நடைபெற்ற போராட்டத்தில் உயிரிழந்தவர்களின் எண்ணிக்கை 34 ஆக அதிகரிப்பு

பொருளாதார பிரச்சனை, வேலையின்மையை காரணம் காட்டி ஈராக் அரசுக்கு எதிராக நடத்தப்பட்ட போராட்டத்தில் உயிரிழந்தவர்களின் எண்ணிக்கை 34 ஆக அதிகரித்துள்ளது.

ஈராக் பிரதமர் அப்துல் மஹதி தலைமையிலான அரசு பொருளாதார பிரச்சனை, வேலையின்மை, ஊழல் உள்ளிட்டவற்றிற்கு தீர்வு காண வலியுறுத்தி நேற்று முன் தினம் தலைநகர் பாக்தாத்தில் போராட்டம் நடத்தப்பட்டது.

அங்குள்ள வரலாற்று சின்னமான சரீர் சதுக்கத்தில் தொடங்கிய போராட்டத்தில் போலீசாருக்கும், போராட்டக்காரர்களுக்கும் இடையே மோதல் ஏற்பட்டது. அதையடுத்து, கண்ணீர் புகைக்குண்டுகளை வீசியும், தடியடி நடத்தியும் அவர்களை கட்டுப்படுத்த போலீசார் முயன்றனர்.

அப்போது வன்முறை வெடிக்கவே போலீசார் துப்பாக்கிச்சூடு நடத்தினர். இதில் ஒன்பது பேர் உயிரிழந்த நிலையில் பலர் படுகாயமடைந்தனர். இந்நிலையில், போராட்டத்தில் உயிரிழந்தவர்களின் எண்ணிக்கை 34 ஆக அதிகரித்துள்ளது.

மேலும், 423 பாதுகாப்பு படையினர் உட்பட ஆயிரத்து 518 பேர் படுகாயமடைந்துள்ளனர். இதையடுத்து, பிரதமர் அப்துல் மஹதி போராட்டம் பரவும் நசிரியா, திவானியா உள்ளிட்ட நகரங்களில் ஊரடங்கு உத்தரவு பிறப்பித்துள்ளார்.

https://www.polimernews.com/dnews/83242/வேலையின்மை,-ஊழலை-கண்டித்துநடைபெற்ற-போராட்டத்தில்உயிரிழந்தவர்களின்எண்ணிக்கை-34-ஆக-அதிகரிப்பு