பனிச்சறுக்கலுக்குச் சென்றவர்கள் விபத்தில் சிக்கினர்

[Kavi arunasalam]

ஒஸ்ரியா - இத்தாலி எல்லையில் அமைந்துள்ள Luttach என்ற இடத்தில்  இருபதிலிருந்து இருபத்தியொரு வயது வரை மதிக்கத்தக்க யேர்மனிய சுற்றுலாப் பயணிகள் 6பேர் இறந்தும் 11 பேர்காயப்பட்டும் ஒரு துயரச் சம்பவம்  இன்று நடந்திருக்கிறது.

கடந்த வார இறுதியில்தான் ஒஸ்ரியாவின் தெற்கு Tyrol என்ற இடத்தில் ஏற்பட்ட பனிச்சரிவு விபத்தில் மூன்று யேர்மனியர்கள் இறந்து போனார்கள். இப்பொழுது இது இரண்டாவது சம்பவம். குளிர் காலத்தில்  பனிச்சறுக்கலுக்காகச் செல்லும் சுற்றுலாப் பயணிகளுக்கு இவை அதிர்ச்சிச் செய்திகள்.

இன்றைய சம்பவத்தில் இறந்த யேர்மனியர்கள் பற்றிய விபரங்கள் இன்னமும் அறியப்படவில்லை.

சம்பவம் பற்றிய தகவல் இப்படி இருக்கிறது.

ஞாயிற்றுக்கிழமை காலை 1 மணியளவில் பனிச் சறுக்கலுக்காக யேர்மனியில் இருந்து வந்த பயணிகள்  தாங்கள் பயணித்த பஸ்ஸின் அருகே நின்றிருக்கிறார்கள். அப்பொழுது 28 வயது இளைஞன் ஒருவன் தான் ஓட்டி வந்த காரை  பஸ் அருகே நின்றிருந்த சுற்றுலாப் பயணிகள் மீது மோதியிருக்கிறான்.

கார் ஓட்டிவந்த இளைஞன் Kiens நகரைச் சேர்ந்தவர் என்றும் அவர் நிறைய மது அருந்தியவராக இருந்தார் என்றும் Rai Suedtirol வானொலி தனது செய்தியில் குறிப்பிட்டிருக்கிறது.