பொத்துவில் ஊறணி மக்களின் காணி விரைவில் கிடைக்கும்: கருணா அம்மான்

 

(காரைதீவு நிருபர் சகா)

பொத்துவில் 60ஆம் கட்டை ஊறணி மக்களின் நீண்டகால பிரச்சினையான தாம் குடியிருந்த காணிகள் மிக விரைவில் மீண்டும் பெற்றுக்கொடுக்கப்படும்.

இவ்வாறு நேற்று அங்கு விஜயம் செய்த பிரதமரின் மட்டு.அம்பாறை இணைப்பாளரும் முன்னாள் பிரதியமைச்சருமான விநாயகமூர்த்தி முரளிதரன்(கருணாஅம்மான்) மக்கள் மத்தியில் தெரிவித்தார்.

பொத்துவில் பிரதேச செயலகப் பிரிவுக்குட்பட்ட ஊறணி 60ஆம் கட்டை காணிப் பிரச்சினையை முடிவுக்குக் கொண்டுவரும் முகமாக கருணா அம்மான் நேற்று அம்பாறை மாவட்ட மேலதிக அரசாங்க அதிபர் வே.ஜெகதீசன், திருக்கோவில் பிரதேச சபைத் தவிசாளர் இ.வ.கமலராஜன் மற்றும் பொத்துவில் பதில் பிரதேச செயலாளர் எ.சந்தரூபன், முன்னாள் பாராளுமன்ற உறுப்பினர் குணசேகரம் சங்கர், பொத்துவில் பிரதேச அமைப்பாளர் எஸ்.ரமணன் ஆகியோருடன் விஜயம் செய்தார்.

அங்கு 834 நாட்களாக தொடர்ச்சியாக முகாமிட்டு சத்தியாக்கிரகப் பேராட்டத்தில் ஈடுபட்டுவரும் ஊறணி மக்களுடன் கலந்துரையாடினர். மக்கள் தங்கள் பிரச்சினை பற்றி கூறினர். மக்கள் தலைவி றங்கத்தனா முழு விபரங்களையும் சமர்ப்பித்து சமகால சவால்கள் பற்றி விபரித்தார்.

அதன்பின்னர் கருணா அம்மான் அங்கு பேசுகையில்:

பொத்துவில் தமிழ் மக்களது பிரச்சினை பற்றி பிரதமருடன் பேசியுள்ளேன். தற்போது சூழல் சுற்றாடல் அதிகாரசபையின் அனுமதி மட்டுமே கிடைக்கப்பெற வேண்டும். அதனை ஒரு வாரத்தில் எமது மேலதிக அரச அதிபர் ஜெகதீசன் பெற்றதும் காணிகள் மக்களுக்கு பகிர்ந்தளிக்கப்படும்.
நீங்கள் இங்கு பல்லாண்டு காலம் வாழ்ந்து வந்துள்ளீர்கள். அன்றிருந்த ஒரு குடும்பம் இன்று 9குடும்பங்களாக பெருகியிருக்கும். எனவே அனைவருக்கும் காணி வழங்க ஏற்பாடு செய்யப்படும்.

தற்போது 200 குடும்பங்களுக்கும் மேலாக காணி வழங்க நடவடிக்கை எடுக்கப்பட்டுள்ளது. அதற்கு முதல் இங்குள்ள காட்டை வெளியாக்க நடவடிக்கை மேற்கொள்ளவிருக்கிறேன். அதுவரை பொறுமையாக இருங்கள்.

பிரதமர் மஹிந்த ராஜபக்ஷவின் திட்டத்தின் கீழ் நாட்டில் காணி இல்லாமல் யாரும் இருக்கக் கூடாது என்ற சிந்தனை உள்ளது. அதன்படி நான் மட்டக்களப்பு மாவட்டத்தில் மட்டும் 5500 குடும்பங்களுக்கு காணி பெற்றுக்கொடுத்துள்ளேன். முழு இலங்கையிலும் இதுவரை ஒன்றரை லட்சம் பேருக்கு காணி வழங்கப்பட்டுள்ளது.

நீங்கள் எனக்கு கடந்த தேர்தலில் 30ஆயிரம் வாக்குகளை அள்ளித்தந்துள்ளீர்கள். எம்.பியாக வராவிட்டாலும் அதற்கு மேல் சேவை செய்யக்கூடிய பதவியை எமது பிரதமர் தந்துள்ளார். படிப்படியாக பல வேலைத்திட்டங்களை ஆரம்பிக்கவிருக்கிறேன்.

மக்களின் ஒத்துழைப்புக் கிடைத்தால் பாரிய பணிகளை இங்கு செய்யவிருக்கிறேன்.
பெண் தலைமைத்துவக் குடும்பங்களுக்கு விசேட வேலைத்திட்டம் வகுத்துள்ளோம் என்றார்.

பொத்துவில் ஊறணி மக்களின் காணி விரைவில் கிடைக்கும்: கருணா அம்மான் – Thinakkural

13 hours ago, nunavilan said:

நீங்கள் எனக்கு கடந்த தேர்தலில் 30ஆயிரம் வாக்குகளை அள்ளித்தந்துள்ளீர்கள்.

அடுத்த தேர்தலில் வாக்கு வங்கியை உயர்த்த திட்டம் முன்னெடுக்கப்படுகிறது. ஒரு வார்த்தை மறைந்த மாவீரர்களுக்காக பேசுங்கள் பார்க்கலாம்.

மக்களின் பிரச்சினைகளுக்கு தீர்வு பெற்றுக்கொடுத்தால் அதை வரவேற்கலாம். அது யாராக இருந்தாலும் பரவாயில்லை.

14 hours ago, nunavilan said:

அங்கு 834 நாட்களாக தொடர்ச்சியாக முகாமிட்டு சத்தியாக்கிரகப் பேராட்டத்தில் ஈடுபட்டுவரும் ஊறணி மக்களுடன் கலந்துரையாடினர். மக்கள் தங்கள் பிரச்சினை பற்றி கூறினர்

அது உண்மையாய் இருந்தால், இன்றுமட்டும் இவர்கள் முகாமிட்டு காத்திருக்கத் தேவையில்லையே? எப்பவோ தீர்க்கப்பட்டிருக்குமே. இவர் மஹிந்தவின் அமைச்சரவையில் அமர்ந்து இவ்வளவு காலமும் வாய்ப்பாத்துக்கொண்டிருந்தாரோ?