மக்கள் பிரதிநிதிகளான எமக்கும் பல தேவைகள் உண்டுஇது குறித்து ஊடகங்கள் அலட்டிக்கொள்ளத்தேவையில்லை

வீரகேசரி நாளேடு

மக்கள் பிரதிநிதிகள் என்றாலும் எங்களுக்கும் தனிப்பட்ட தேவைகள் இருக்கின்றன. நாங்கள் உணவு உட்கொள்ளவேண்டும். முடிவளர்க்கவேண்டும். உடைஅணியவேண்டும். இவ்வாறு பல தேவைகள் உள்ளன. நாங்கள் அரசியலுக்கு வருவதற்கு முன்னரும் சொகுசு வாகனங்களில் சென்றோம். அரசியலுக்கு வந்த பின்னரும் சொகுசு வாகனங்களை பயன்படுத்துகின்றோம். இவை குறித்து ஊடகங்கள் அலட்டிக்கொள்ளத் தேவையில்லை என்று ஊடகத்துறை அமைச்சர் அநுர பிரியதர்ஷன யாப்பா கூறினார்.

ஊடகவியலாளர்கள் தமது கடமைகளை பொறுப்புடன் மேற்கொண்டால் குற்றவியல் சட்டமூலம் கொண்டுவரப்படவேண்டும் என்ற கருத்து முன்வைக்கப்படாது. ஊடகத்துறை அமைச்சர் என்ற வகையில் ஊடக சுதந்திரத்தையும் ஊடகவியலாளர்களின் பாதுகாப்பையும் உறுதிபடுத்த நடவடிக்கை எடுப்பேன் என்றும் அவர் கூறினார்.

கொழும்பில் உள்ள அரசாங்க தகவல் திணைக்களத்தில் நேற்றுக்காலை இடம்பெற்ற வாராந்த அமைச்சரை முடிவுகளை அறிவிக்கும் செய்தியாளர் மாநாட்டில் கலந்துகொண்டு கருத்து தெரிவிக்கையிலேயே அமைச்சர் மேற்கண்டவாறு கூறினார்.

இவ்விடயம் குறித்து அவர் மேலும் கூறியதாவது :

ஊடகவியலாளர்கள் பொறுப்புடன் செய்திகளை வெளியிடவேண்டும். எந்தவொரு நபரினதும் தனிப்பட்ட வாழ்க்கை நடைமுறை பாதிக்கப்படாதவகையில் செய்திகள் வெளியிடப்படவேண்டும். ஒருவரின் தனிப்பட்ட வாழ்க்கையில் ஊடகங்கள் தலையிடுவதனால் அவரின் குடும்பத்தார் எந்தளவு பாதிக்கப்படுகின்றனர் என்று சிந்திக்கவேண்டும். பிள்ளைகளால் பாடசாலைக்கு செல்ல முடியாத நிலைமை ஏற்படுகின்றது.

மக்கள் பிரதிநிதிகள் உணவு உட்கொள்ளக்கூடாதா ? இது என்ன நியாயம் ? மக்கள் பிரதிநிதிகளான எங்களுக்கும் தேவைகள் உள்ளன. நாங்கள் சொகுசான கார்களில் பயணம் செய்வது குறித்து ஊடகங்கள் ஏன் அலட்டிக்கொள்ளவேண்டும் ? எங்களுக்கு பல்வேறு மேலதிக வருமானங்கள் உள்ளன. அமைச்சர் பந்துல குணவர்த்தன திரைப்பட தயாரிப்பாளருடன் பிரபலமான தனியார் கல்வி விரிவுரையாளர். இந்நிலையில் அவர் சொகுசான காரில் பயணம் செய்வதில் என்ன ஆச்சரியம்? நாங்கள் ஹோட்டல்களில் உணவு உட்கொண்டால் அது தவறா ?

ஊடகங்கள் தமது பொறுப்பை சரியான முறையில் நிறைவேற்றவேண்டும். ஊடகத்துறை அமைச்சர் என்ற வகையில் ஊடக சுதந்திரத்தை பாதுகாக்க நடவடிக்கை எடுப்பேன். குற்றவியல் அவதூறு சட்டமூலம் இந்த நாட்டில் 100 வருடங்களுக்கு மேல் இருந்துள்ளது. கடந்த 2002 ஆம் ஆண்டே இந்த சட்டமூலம் நீக்கப்பட்டது. சட்டமூலம் அமுலில் இருந்தபோது நாட்டில் சிறப்பாக ஊடகங்கள் செயற்பட்டன. குற்றவியல் அவதூறு சட்டத்தின் கீழ் மிகவும் இலகுவாக வழக்கு தாக்கல் செய்ய முடியாது. 10 காரணங்கள் முன்வைக்கப்படவேண்டும். அத்துடன் மேல் நீதிமன்றத்தில் விசாரணை செய்யப்படவேண்டும். இதுவரை எத்தனை ஊடகவியலாளர்கள் குற்றவியல் சட்டமூலத்தை வாசித்துள்ளனர் என்று தெரிய வில்லை.

இலங்கையில் ஊடகவியலாளர்கள் தமது தகவல் மூலத்தை பாதுகாக்க நடவடிக்கை எடுக்கப்படவேண்டும் என்று கூறுகின்றனர். ஆனால் அமெரிக்காவில் இந்த கோரிக்கை நிராகரிக்கப்பட்டுள்ளது.

இதேவேளை ஐக்கிய தேசிய கட்சி ஊடக சுதந்திரத்தை பெற்றுக்கொடுப்பது போன்று நடிக்கின்றது. அண்மையில் ஊடகவியலாளர் மாநாடொன்றில் பாராளுமன்ற உறுப்பினர் லக்ஷ்மன் கிரியெல்ல தான் பாதுகாப்பு செயலாளரை கைது செய்யவேண்டும் என்று கூறியதாகவும் அவ்விடயம் ஊடகங்களில் வெளிவரவில்லை என்றும் தெரிவித்திருந்தார்.

விடுங்கோப்பா பிரியதர்சன யாப்பா. உங்களுடைய அலட்டல்களுக்கு உங்கள் ஊடகங்களும் ஒரு கேடா?