தமிழக முதல்வர் கருணாநிதியுடன் ரணில் ஆகஸ்ட் முதல் வாரத்தில் முக்கிய சந்திப்பு

வீரகேசரி நாளேடு

மங்கள சமரவீர 20 ஆம் திகதி இந்தியாவிற்கு விஜயம் ஐக்கிய தேசியக் கட்சியின் தலைவரும் எதிர்க்கட்சி தலைவருமாகிய ரணில் விக்ரமசிங்கவிற்கும் தமிழக முதல்வர் முத்துவேல் கருணாநிதிக்கும் இடையில் முக்கிய சந்திப்பொன்று இடம்பெறவுள்ளதாக நம்பகரமான வட்டாரங்களிலிருந்து தெரியவருகின்றது.

இவ்விருவருக்கும் இடையிலான இந்த முக்கிய சந்திப்பு ஆகஸ்ட் மாதம் முதல் வாரத்தில் தமிழகத்தில் இடம்பெறுவதற்கான சாத்தியக்கூறுகள் தென்படுவதாகவும் அதற்கான ஆரம்பகட்ட வேலைகளை தமிழக அரசாங்க முக்கியஸ்தர்கள் மேற்கொண்டு வருவதாகவும் தெரிவிக்கப்படுகின்றது.

இவ்விருவருக்கும் இடையில் தமிழகத்தில் ஆகஸ்ட் மாதம் முதல் வாரத்தில் இடம்பெறவிருக்கின்ற சந்திப்பு தொடர்பான ஏற்பாடுகளை மேற்கொள்வதற்காக ஐக்கிய தேசியக்கட்சியின் சர்வதேச விவகாரங்களுக்கான பொறுப்பாளரும் கொழும்பு மாவட்ட பாராளுமன்ற உறுப்பினருமான ரவி கருணாநாயக்க கடந்த வாரம் இந்தியாவிற்கு சென்றிருந்ததாகவும் தெரிவிக்கப்படுகின்றது. இந்தியாவிற்கு சென்றிருந்த ரவி கருணாநாயக்க எம்.பி, தமிழக முதல்வர் முத்துவேல் கருணாநிதியின் மகன், அமைச்சர் மு.க ஸ்டாலின், தமிழ் நாட்டு அரசாங்க அமைச்சர்கள் உள்ளிட்ட முக்கியஸ்தர்களை சந்தித்து முக்கிய பேச்சுவார்த்தையில் ஈடுபட்டுள்ளார் என்றும் தெரிவிக்கப்படுகின்றது.

இந்த சந்திப்பில் தமிழக முதல்வர் கருணாநியுடன் பேச்சுநடத்த ஐக்கிய தேசியக்கட்சி தெரிவித்துள்ள விருப்பம் தொடர்பாக விரிவாக கலந்துரையாடியுள்ளதுடன், அதற்காக ஏற்பாடுகளை மேற்கொள்ளுமாறும் ரவி கருணாநாயக்க எம்.பி முக்கியஸ்தர்களிடம் கேட்டுக்கொண்டுள்ளாதாக தெரிவிக்கப்படுகின்றது.

ஐக்கிய தேசியக்கட்சி தலைவர் ரணில் விக்கிரம சிங்கவிற்கும் தமிழக முதல்வர் மு.கருணாநிதிக்கும் இடையில் இடம்பெறவிருக்கின்ற முக்கிய சந்திப்பில் எவ்வாறான விடயங்கள் பேசப்படவிருக்கின்றன என்பது தொடர்பாக சரியான தகவல் எதுவும் வெளியாவில்லை எனினும் இலங்கையில் இடம்பெற்று வருகின்ற மனித உரிமை மீறல்கள் தொடர்பாக ஐக்கிய தேசியக் கட்சி மேற்கொள்ளவிருக்கின்ற சர்வதேச மட்டத்திலான நடவடிக்கையின் ஒருக்கட்டமாகவே ரணில் விக்ரமசிங்க தமிழகம் செல்லவிருப்பதாக தெரிவிக்கப்படுகின்றது. ஐக்கிய தேசியக்கட்சி தலைவர் ரணில் விக்ரம சிங்க தமிழக விஜயத்தை முடித்துக்கொண்டு மேற்குலக குறிப்பாக ஐரோப்பிய நாடுகளுக்கு செல்லவிருப்பதாக கட்சி வட்டாரங்களிலிருந்து தெரியவருகின்றது.

இதேவேளை ஸ்ரீலங்கா சுதந்திரகட்சியின் மக்கள் பிரிவின் ஏற்பாட்டாளர் மங்கள சமரவீர தலைமையிலான குழுவினர் எதிர்வரும் 20 ஆம் திகதி வெள்ளிக்கிழமை இந்தியாவிற்கு விஜயம் ஒன்றை மேற்கொள்ளவுள்ளனர். இந்த விஜயத்தின் போது இந்திய அமைச்சர்கள், கட்சி தலைவர்களை சந்தித்து பேச்சுவார்த்தை நடத்துவதுடன் ஸ்ரீலங்கா சுதந்திர கட்சியின் மக்கள் பிரிவின் கொள்கை தொடர்பாக விளக்கமளிக்கவுள்ளார்.

மங்கள சமரவீர தனது இந்திய விஜயத்தின் போது புதுடில்லிக்கு சென்று இந்திய வெளிவிவகார அமைச்சரை சந்தித்து பேச்சுவார்த்தை நடத்துவதற்காக ஏற்பாடுகளும் மேற்கொள்ளப்பட்டு வருவதாக ஸ்ரீலங்கா சுதந்திரகட்சியின் மக்கள் பிரிவின் முக்கியஸ்தர் ஒருவர் தெரிவித்தார்.

ஐக்கிய கட்சியின் தலைவர் ரணில் விக்ரம சிங்கவிற்கும் ஸ்ரீலங்கா சுதந்திரக்கட்சியின் மக்கள் பிரிவின் ஏற்பாட்டாளர் மங்கள சமரவீரவிற்கும் இடையில் அண்மையில் இடம்பெற்ற சந்திப்பையடுத்து மங்கள சமரவீர தலைமையிலான குழுவினர் இந்தியாவிற்கு செல்லவிருந்தனர் எனினும் ஐக்கிய தேசியக் கட்சிக்கும் ஸ்ரீலங்கா சுதந்திரகட்சியின் மக்கள் பிரிவிற்கும் இடையில் 19 ஆம் திகதி வியாழக்கிழமை கைச்சாத்திடப்படவுள்ள புரிந்துணர்வு உடன்படிக்கை தொடர்பான ஆவணங்களை தயாரிப்பதற்கான ஏற்பாடுகளை மேற்கொண்டிருந்தமையினால் அவரின் இந்தியவிஜயம் 20 ஆம் திகதிக்கு பிற்போடப்பட்டதாக தெரிவிக்கப்படுகின்றது.

ரவி கருணாநாயக்க எம்.பி கருத்து தமிழக முதல்வர் முத்துவேல் கருணாநிதிக்கும் ஐக்கிய தேசியக் கட்சி தலைவர் ரணில் விக்ரம சிங்கவிற்கும் இடையில் இடம்பெறவுள்ளதாக கூறப்படுகின்ற சந்திப்பு தொடர்பாக ரவி கருணாநாயக்க எம்.பி கருத்து தெரிவிக்கையில்;தமிழக முதல்வர் மு.கருணாநிதியை சந்திப்பதற்கான ஏற்பாடுகளை மேற்கொள்ளுமாறு ஐக்கிய தேசியக்கட்சி கோரிக்கை ஒன்றை விடுத்துள்ளது. அந்த கோரிக்கைக்கு இன்றுவரையிலும் உரிய பதில் கிடைக்கவில்லை எனினும் இச்சந்திப்பு ஆகஸ்ட் மாதம் முதல் வாரத்தில் இடம்பெறுவதற்கான சாத்தியக்கூறுகள் இருக்கின்றன

இலங்கையில் இடம்பெறுகின்ற மனித உரிமை மீறல்கள் தொடர்பாக சர்வதே ரீதியில் தெளிவுபடுத்தும் வகையில் ஐக்கிய தேசியக் கட்சியினால் மேற்கொள்ளப்பட்டு வருகின்ற சர்வதேச மட்டத்தில் தெளிவு படுத்துவதற்கான வேலைத்திட்டத்தின் ஒரு கட்டமாகவே ஐக்கிய தேசியக் கட்சியின் தலைவர் ரணில் விக்ரமசிங்க தலைமையிலான குழுவினர் இந்தியாவிற்கு செல்லவிருக்கின்றனர். இதன்போது தழிழக முதல்வரை சந்தித்து பேச்சுவார்த்தை நடத்துவதற்கான ஏற்பாடுகளை மேற்கொள்ளுமாறு கோரிக்கை விடுத்துள்ளோம் என்றார்.

ஏன் முத்துவேல் கருனாநிதிக்கு வேற வேலை இல்லையோ.

சிலவேளை சிங்கள மக்களுக்கும் இலவச தொலைக்காட்சி கொடுக்க சொல்லி ரனிலுக்கு அறிவுரை சொல்லப்போறாரோ.

இவரும் இலவச தொல்லைகாட்சி மூலம் தானே ஆட்சிக்கு வந்தவர்