கூட்டமைப்பு தனித்தனியாக போட்டியிடுவதை ஏற்றுக்கொள்ள முடியாது – செல்வம்

தேர்தலில் கதிரைகளுக் காக தனித்தனியாக போட்டியிடுவது என்பது எமது இலட்சியம் இல்லை எனவும் தமிழ் தேசியக் கூட்டமைப்பு தனித்தனியாக போட்டியிடுவதை ஏற்றுக்கொள்ள முடியாது எனவும்  வன்னி மாவட்ட நாடாளுமன்ற உறுப்பினர் செல்வம் அடைக்கலநாதன் தெரிவித்துள்ளார்.

மன்னாரில்   நேற்று (புதன்கிழமை) மாலை ஊடகங்களுக்கு கருத்து தெரிவிக்கையிலேயே அவர் இவ்வாறு தெரிவித்தார்.

அவர் மேலும் தெரிவிக்கையில், ”எந்த தேர்தலையும் நாங்கள் சந்திக்க தயாராக இருக்கிறோம்.அந்த வகையில் தற்போது அறிவிக்கப்பட்டுள்ள தேர்தலையும் நாங்கள் சந்திக்க வேண்டும்.எனினும் தேர்தல் முறையை நாங்கள் ஏற்றுக்கொள்ளவில்லை.

இந்த முறையானது மக்களால் தெரிவு செய்யப்பட்டவர்கள் ஆளுகின்ற நிலை இல்லாத முறையாக இருக்கிறது.மக்களினுடைய எண்ணங்கள் புறக்கணிக்கப்படுகின்றது.அந்த வகையில் தேர்தல் முறை மாற்றப்பட வேண்டும் என்பதே எமது கோரிக்கையாக உள்ளது.

உள்ளூராட்சி மன்றத் தேர்தல் அறிவிக்கப்பட்டுள்ளது.இந்த தேர்தலை சந்திக்க வேண்டி உள்ளது.ஒற்றுமையாக சந்திக்க வேண்டும் என்பது எமது நோக்கம்.

இந்த கால கட்டத்தில் இந்த தேர்தல் வருகிறது என்பதை பார்க்கின்ற போது அரசாங்கம் நடக்க இருக்கின்ற தேர்தலுக்கான நிதி யை உலக நாடுகளிடம் இருந்து பெற்று மக்களின் ஜனநாயக கோரிக்கைகளை மக்கள் செலுத்துகின்ற வாக்கின் ஊடாகவே அறிந்து கொள்ள முடியும்.

எனவே தேர்தல்கள் நடத்தப்பட வேண்டும் என்பதே எனது கருத்து.இந்த தேர்தல் முறைமை மாற்றப்பட வேண்டும் என்பதும் எமது பிரதான கருத்து.

இத் தேர்தலில் தமிழ் தேசியக் கூட்டமைப்பு ஒற்றுமையாக போட்டியிட வேண்டும் என்பதே எமது எதிர்பார்ப்பு.

தேர்தலில் கதிரைகளுக்காக தனித்தனியாக போட்டியிடுவது என்பது எமது இலட்சியம் இல்லை.தமிழ் தேசியக் கூட்டமைப்பு தனித்தனியாக போட்டியிடுவதை ஏற்றுக்கொள்ள முடியாது.

அனைத்து கட்சிகளும் ஒன்றிணைந்து ஒற்றுமையாக போட்டியிட வேண்டும்.தேர்தலுக்கான அமைப்பாக தமிழ் தேசியக்கூட்டமைப்பு இல்லை என்பதை குறிப்பிட விரும்புகிறேன்.

ஒற்றுமையாக எமது இனப்பிரச்சினை,மக்களின் பிரச்சினைகள் போன்றவற்றை நாங்கள் தட்டிக்கேட்கும்,அதனை செயல் படுத்துகின்ற விடையங்களை கையாளுகின்ற ஒரு அமைப்பாக தொடர்ந்து தமிழ் தேசியக்கூட்டமைப்பு செயல்பட வேண்டும்.

நாங்கள் முன் வைத்த கோரிக்கை மட்டக்களப்பில் இடம் பெற இருக்கும் தமிழரசுக் கட்சியின் கூட்டத்தில் முடிவு எடுக்கப்படும் என எதிர்பார்க்கின்றேன்.

ஒற்றுமையை வலியுறுத்துகின்ற வகையில் எதிர்பார்க்கின்றோம்.எதிர்வரும் 10 ஆம் திகதிக்கு பின் நாங்கள் என்ன செய்வது என்ற நிலைப்பாட்டை தெரிவித்துக் கொள்ள முடியும் “ என அவர் மேலும் தெரிவித்தார்.

https://athavannews.com/2023/1318791

15 hours ago, தமிழ் சிறி said:

எதிர்வரும் 10 ஆம் திகதிக்கு பின் நாங்கள் என்ன செய்வது என்ற நிலைப்பாட்டை தெரிவித்துக் கொள்ள முடியும் “ என அவர் மேலும் தெரிவித்தார்.

விக்கினேஸ்வரன் வேறு கட்சியில் போட்டியிட எத்தனித்த போது; அவருக்கு வேறு தெரிவு இருக்கவில்லை. சும்மா இருந்தவரை இழுத்துவந்து இணைத்துவிட்டு, அவரது பெயருக்கு சேறடிப்பதும் நாறடிப்பதும் அவரது முயற்சிகளுக்கு முட்டுக்கட்டை போடுவதும் முடிந்தால் வேறொரு கட்சியை ஆரம்பித்து வெண்டுகாட்டட்டும் என்கிற சவாலுமாக இருந்தபோது சித்தார்த்தனை விக்கினேஸ்வரனுடன் இணையும்படி  ஒரு ஆலோசனை வைக்கப்பட்டபோது வெற்றியடைய முடியுமா என்கிற சந்தேகத்தில் மறுத்துவிட்டார், (இது நானறிந்த செய்தி) அதன்பிறகு வந்த தேர்தலில் த. தே. கூட்டமைப்பு வாங்கிய அடியைப்பார்த்து தனது முடிவை மறுபரிசீலனை செய்ய வேண்டிய நிலைக்கு சித்தார்த்தனோடு செல்வம் அடைக்கலமும் தள்ளப்பட்டனர். ஒரு பேட்டியில் சித்தார்த்தன் இதை குறிப்பிட்டிருந்தார். அதாவது கூட்டமைப்புக்குள் சுமந்திரனின் அடாவடியும் சம்பந்தனின் தட்டிக்கேட்க முடியாமையும் தெரிந்திருந்தும் சம்பந்தனை எதிர்க்க முடியாத நிலை அதாவது அவரது வயதுக்கு அவர்கள் கொடுக்கும் மரியாதையை அவர் தவறாக கணக்குப்போட்டு கட்சியை தவறான பாதையில் வழிநடத்தியிருக்கிறார். இந்த நிலை  தொடர்ந்ததால் அவர்கள் தேர்தல் வெற்றியை எண்ணி வேறொரு முடிவை எடுக்க வேண்டிய நிலைக்கு தள்ளப்பட்டனர். சம்பந்தனின் எதிர்நோக்கற்ற சுயநல அரசியல், கட்சி உடைவதற்கு காரணமாகிறது. அண்மையில் ஜனாவின் நேர்காணலில் கூட இதே காரணம் எதிரொலித்தது. சம்பந்தன் தனது முடிவை பரிசீலிக்காவிட்டால் சித்தார்த்தன், அடைக்கல நாதன் விக்கினேஸ்வரனுடன் இணைவார்கள். எந்த விக்கினேஸ்வரனை ஓடஓட விரட்டினார்களோ அவரின் கையை பலப்படுத்துகிறார்கள் தங்கள் பிடிவாதத்தால். ஆனால் விக்கினேஸ்வரன் கட்சியை உடைக்காமல் இவர்களோடு சேர்ந்து பயணிப்பதையே விரும்புகிறார் போலத் தெரிகிறது.