(தினத்தந்தி)

பெனாசிர் படுகொலையை தொடர்ந்து, பாகிஸ்தான் மக்கள் கட்சிக்கு அவருடைய 19 வயது மகன் பிலாவல் புதிய தலைவராக தேர்ந்து எடுக்கப்பட்டார். பெனாசிரின் கணவர் சர்தாரி, கட்சியின் இணை தலைவராக நியமிக்கப்பட்டார்.

பாகிஸ்தானில் வருகிற 8-ந் தேதி பொதுத்தேர்தல் நடைபெற இருந்த நிலையில், முன்னாள் பிரதமரும் பாகிஸ்தான் மக்கள் கட்சி தலைவருமான பெனாசிர் படுகொலை செய்யப்பட்டார்.

புதிய தலைவர்

பெனாசிர் படுகொலையை தொடர்ந்து, பாகிஸ்தான் முழுவதும் கலவரம் நடைபெற்று வருகிறது. அவருடைய படுகொலை பற்றி முரண்பட்ட தகவல்கள் வெளியாகி வருகின்றன. இந்த நிலையில், பெனாசிரின் `பாகிஸ்தான் மக்கள் கட்சி'க்கு அடுத்த தலைவர் யார் என்ற கேள்வி எழுந்தது.

பெனாசிரின் மூத்த மகன் பிலாவல், கணவர் ஆசிப் அலி சர்தாரி, கட்சியில் பெனாசிருக்கு அடுத்த இடத்தில் இருந்த மக்தும் அமின் பாஹிம், மற்றொரு மூத்த தலைவரான ஷா முகமது குரேஷி ஆகிய 4 பேர்களில் ஒருவர் புதிய தலைவராக தேர்ந்தெடுக்கப்படலாம் என்று தகவல் வெளியாகின.

நிர்வாகிகள் கூட்டம்

இந்நிலையில், கட்சியின் புதிய தலைவரை தேர்ந்து எடுப்பதற்காகவும், வருகிற 8-ந் தேதி நடைபெறும் தேர்தலில் பங்கேற்பது குறித்து முடிவு எடுக்கவும் மக்கள் கட்சியின் மத்திய கமிட்டி நிர்வாகிகள் கூட்டம் நேற்று கூடியது. பெனாசிரின் சொந்த கிராமமான நவுதேரா என்ற இடத்தில் நடந்த இந்த கூட்டத்துக்கு, கட்சியின் மூத்த தலைவர் மக்தும் அமின் பாஹிம் தலைமை வகித்தார்.

இந்த கூட்டத்துக்கு, பெனாசிரின் மூத்த மகன் பிலாவல் சிறப்பு அழைப்பாளராக அழைக்கப்பட்டு இருந்தார். கூட்டம் தொடங்கும் முன்பாக குரான் வாசிக்கப்பட்டது. அதனைத் தொடர்ந்து பெனாசிர் மறைவுக்காக சிறப்பு பிரார்த்தனை நடைபெற்றது.

`அச்சமற்ற பெண்மணி'

கூட்டத்தில் பெனாசிரின் கணவர் சர்தாரி உருக்கமாக பேசினார். "தீவிரவாதிகளால் உயிருக்கு அச்சுறுத்தல் இருந்த போதிலும் வெளிநாட்டில் இருந்து பாகிஸ்தானுக்கு திரும்பிய அச்சமற்ற பெண்மணி, பெனாசிர்'' என்று அப்போது அவர் குறிப்பிட்டார்.

"நாட்டில் முழுமையான ஜனநாயகத்தை கொண்டு வருவதற்கான அவரது போராட்டத்தை தொடருவதே அவருக்கு நாம் செய்யும் அஞ்சலி. பெனாசிர் பூட்டோ இறந்து விட்டார். ஆனால், ஒவ்வொரு வீட்டில் இருந்தும் ஒரு பூட்டோ தோன்றுவார்'' என்றும் அவர் உணர்ச்சிகரமாக கூறினார்.

மகன் தலைவர் ஆனார்

பின்னர், கட்சியின் புதிய தலைவரை தேர்ந்து எடுப்பது குறித்து ஆலோசிக்கப்பட்டது. பெனாசிரின் மகன் பிலாவலை புதிய தலைவராக தேர்வு செய்வது என்று முடிவு செய்யப்பட்டது. எனினும், கட்சி விதிகளின்படி 22 வயது நிரம்பியவரே தலைவராக முடியும். ஆனால், பிலாவலுக்கு 19 வயது மட்டுமே ஆவதால் அது குறித்து பரிசீலனை நடந்தது.

இறுதியில் கட்சியின் தலைவராக பிலாவலை தேர்ந்தெடுப்பது என்று ஒருமனதாக தீர்மானிக்கப் பட்டது. இதையடுத்து 19 வயது மாணவரான பிலாவல், பாகிஸ்தான் மக்கள் கட்சியின் அடுத்த தலைவராக தேர்வு செய்யப்பட்டார். பிலாவல், இங்கிலாந்தில் உள்ள பல்கலை கழகத்தில் படித்து வருகிறார்.

தேர்தலில் பங்கேற்க முடிவு

பிலாவலின் தந்தையும், பெனாசிரின் கணவருமான ஆசிப் அலி சர்தாரி, கட்சியின் இணை தலைவராக நியமிக்கப்பட்டார். தலைவர் தேர்தலை தொடர்ந்து, வருகிற 8-ந் தேதி நடைபெறும் பொதுத் தேர்தலில் பங்கேற்பது குறித்தும் கூட்டத்தில் விவாதிக்கப்பட்டது.

நீண்ட விவாதத்துக்கு பின்னர், பாகிஸ்தான் பொதுத் தேர்தலில் பங்கேற்பது என்று முடிவானது. பாகிஸ்தானில் உள்ள பல்வேறு எதிர்கட்சிகள் தேர்தலை புறக்கணித்து உள்ளன என்பது குறிப்பிடத்தக்கது.

பெனாசிர் படுகொலை விசாரணையை நேர்மையாகவும் சுதந்திரமாகவும் நடத்தும்படி ஐ.நா. சபையை வற்புறுத்துவதற்காக, கட்சி சார்பில் புதிய கமிட்டி ஒன்றும் அமைக்கப்பட்டு உள்ளது.

குடும்ப அரசியலுக்கு என்னும் முற்றுப்புள்ளியில்லையா?

குடும்ப அரசியலுக்கு என்னும் முற்றுப்புள்ளியில்லையா?

இந்த கேள்வியை அவசரப்பட்டு கேட்டு விட்டீர்கள் என நினைக்கின்றேன்