ஹர்பஜனை குறிவைத்து மீண்டும் அவுஸ்திரேலிய வீரர்கள் தாக்குதல்

[28 - February - 2008]

இந்திய சுழற்பந்து வீச்சாளர் ஹர்பஜன்சிங்கை குறி வைத்து அவுஸ்திரேலியர்கள் மீண்டும் தாக்கத் தொடங்கியிருக்கிறார்கள்.

இந்திய - அவுஸ்திரேலிய கிரிக்கெட் வீரர்களிடையே களத்தில் தொடர்ந்து மோதல்கள் நடந்து வருகிறது. சிட்னி டெஸ்டில் ஹர்பஜன்சிங் இனவெறியுடன் சைமண்ட்ஸை திட்டியதாக கூறப்பட்ட புகார் பெரும் விஸ்வரூபம் எடுத்து அடங்கியது. அதன் பின் ஐ.சி.சி.தலையீட்டின் பேரில் முக்கோண ஒரு நாள் கிரிக்கெட் போட்டித் தொடரில் முதல் 9 போட்டிகளும் அமைதியாக நடந்து முடிந்தன.

ஆனால், சிட்னியில் இந்தியா- அவுஸ்திரேலியா இடையே நடந்த 10 ஆவது போட்டியின் போது மீண்டும் புகைச்சல் கிளம்பியது. இஷாந்த் ஷர்மா பந்து வீச்சில் ஆட்டமிழந்த பின் சைமண்ட்ஸ் ஏதோ சொல்ல அதற்கு பெவிலியன் திரும்பும்படி இஷாந்த் செய்கை காட்டினார். இது ஐ.சி.சி. விதி மீறல் என்று இஷாந்துக்கு போட்டிக் கட்டணத்திலிருந்து 15 சதவீதம் அபராதம் விதிக்கப்பட்டது.

அவுஸ்திரேலிய வீரர்கள் தான் கோபமூட்டும் வகையில் நடந்து கொள்கிறார்கள் என்று இந்திய அணி நிர்வாகம் ஐ.சி.சி. போட்டி நடுவரிடம் புகார் செய்தது. அவுஸ்திரேலிய கப்டன் பொண்டிங்கும் ஹைடனும் ஹர்பஜன்சிங்கை பைத்தியக்காரர்கள் என்று திட்டுவதாகவும் புகாரில் குறிப்பிடப்பட்டிருந்தது.

இந்த நிலையில் ஹர்பஜன்சிங் மீது ஹைடன் மீண்டும் ஒரு தாக்குதலை தொடுத்திருக்கிறார். பிரிஸ்பேன் வானொலிக்கு அவர் அளித்த பேட்டியில் கூறியதாவது;

ஹர்பஜன்சிங்குடன் போராட்டம் நீண்ட காலமாக இருந்து வருகிறது. முதல் முறையாக சந்தித்த போது அவர் எப்படி இருந்தாரோ அதேபோல் தான் இப்போதும் அவரது நடவடிக்கைகள் வெறுக்கத்தக்க ஒன்றாகவே இருக்கிறது. இதை அவர் பெற்ற தண்டனைகளிலிருந்து தெரிந்து கொள்ளலாம். அவர் தான் எப்போதும் எல்லை மீறுகிறார். இதனால் தான் கிரிக்கெட் வரலாற்றில் மற்ற வீரர்களை விட அவர் அதிக முறை குற்றச்சாட்டுக்கு ஆளாகியிருக்கிறார்.

ஒவ்வொரு போட்டியிலும் தோல்வியடைவதால் இந்திய வீரர்கள் இது போன்ற புகார்களை சொல்லி வருகிறார்கள். நான் அவரை மேட்போய் (பைத்தியக்காரன்) என்று சொல்லவில்லை. `பாட் போய்'(கெட்ட பையன்) என்று தான் அழைத்தேன்.

விளையாட்டாகச் சொன்னதை தவறாக எடுத்துக் கொண்டு விட்டார்.

இஷாந்த் ஷர்மாவிடம் பல முறை சொல்லியிருக்கிறேன். உனக்கு 19 வயது தான் ஆகிறது. விளையாட்டில் இதை எளிதாக எடுத்துக் கொள்ள வேண்டும். இந்தச் சின்ன வயதிலேயே உன்னுடைய பந்துவீச்சுப் பற்றி ஏன் வருத்தப்படுகிறாய் என்று அறிவுறுத்தினேன் என்றார்.

thinakural.com

உலக சாம்பியன் கிரீடம் நழுவி வருவதால் அவுஸ்திரேலிய வீரர்கள் பிதற்றி வருகின்றனர்

[29 - February - 2008] [Font Size - A - A - A]

* ஹர்பஜன் சிங் சீற்றம்

உலக சாம்பியன் கிரீடம் நழுவி வருவதை உணர்ந்து அவுஸ்திரேலிய வீரர்கள் ஏதேதோ சொல்லி பிதற்றிக் கொண்டிருக்கிறார்கள் என்று இந்திய வீரர் ஹர்பஜன் சிங் கூறியுள்ளார்.

அவுஸ்திரேலிய வீரர் ஹைடன் இந்திய வீரர் ஹர்பஜன் சிங்கை வெறுக்கத்தக்க வீரர் என்றும், இஷாந்த் ஷர்மா தனது பந்து வீச்சு குறித்து தேவையில்லாமல் அலட்டிக் கொள்கிறார் என்றும் கடுமையாக விமர்சித்திருந்தார். ஹைடனின் திடீர் சாடல் குறித்து ஹர்பஜன் சிங்கிடம் சிட்னியில் நிருபர்கள் கருத்துக் கேட்டனர். அதற்கு பதிலளித்து ஹர்பஜன்சிங் கூறியதாவது;

தாங்கள் தான் உலகச் சாம்பியன், தங்களை வீழ்த்த யாருமில்லையென்ற நிலைமை சந்தேகத்திற்கிடமாகி வருவதை உணர்ந்து அவுஸ்திரேலியர்கள் இவ்வாறு சொல்லலாம். அந்தக் கிரீடம் தங்களிடமிருந்து விலகி வருவதை அவர்கள் உணர்ந்திருக்கிறார்கள். இல்லாவிட்டால், ஒரு 19 வயது பையனை (இஷாந்த் ஷர்மா) கிரிக்கெட்டில் முதிர்ச்சியான வீரர் (ஹைடன்) ஏன் வம்புக்கிழுக்க வேண்டும்?

ஹைடனைப் போல் நானும் ஏட்டிக்கு போட்டியாக வசைபாட விரும்பவில்லை. ஹைடனை பற்றி மற்ற சர்வதேச கிரிக்கெட் வீரர்கள் என்ன நினைக்கிறார்கள் என்று கேட்டுப் பாருங்கள்?

ஒவ்வொரு ஆட்டத்திலும் தோற்பதால் தான் இந்திய வீரர்கள் இது போன்ற புகார்களை கூறி வருவதாக ஹைடன் கூறியிருக்கிறார். நீங்களும் (நிருபர்கள்) அப்படித்தான் நினைக்கிறீர்கள். இந்த சீசனில் அவுஸ்திரேலிய அணியை ஓட ஓட விரட்டியது நாங்கள் மட்டும் தானென்றார்.

கடந்த 17 ஆம் திகதி அடிலெய்டில் நடந்த ஒருநாள் போட்டியின் போது ஹர்பஜன் சிங் துடுப்பெடுத்தாட வரும்போது, அவுஸ்திரேலிய கப்டன் பொண்டிங் அவரை வம்புக்கு இழுத்தார். அப்போது ஹர்பஜன் சிங்கிடம் பொண்டிங், உனது திறமையை இங்கே காட்டு என்று கூறினார். அதற்கு சூடாக பதிலளித்த ஹர்பஜன் சிங், இந்தத் தொடரில் உங்களை விட நான் நன்றாக தான் ஆடி வருகிறேன் என்றார்.

இதனால் கோபமுற்ற பொண்டிங், ஹர்பஜன்சிங் ஆட்டமிழந்ததும் அவரைக் கெட்ட வார்த்தையால் திட்டினார். ஆனால், ஹர்பஜன்சிங் அவரை திரும்பிப் பார்க்கும் போது, சக வீரர்களுடன் சேர்ந்து விக்கெட் வீழ்த்திய மகிழ்ச்சியை கொண்டாடிக் கொண்டிருந்தார்.

அவுஸ்திரேலிய வீரர்கள் இந்த விடயத்தில் கெட்டிக்காரர்கள். எதிரணி வீரரை திட்டுவார்கள். பின், திரும்பிப் பார்க்கையில், அப்படி ஏதும் பேசாத மாதிரி நடந்து கொள்வார்கள். இது அவர்களுக்கு கை வந்த கலை என்றும் ஹர்பஜன்சிங் குறிப்பிட்டார்.

thinakural.com