எனக்கொரு வரமருள் பராபரமே....

புழுதி எழும் ஊரின்

புண்பட்ட வீதிகளில்

விழுது விட்ட ஆலமரத்தின்

பழுது பட்ட திண்ணையில்

தொழுது எழும் கோயிலின்

அழகு மிகு தேரடியில்

உழுது நாற்று நடும்

ஊரின் வயல் வரப்பில்

பொழுது விழும் நேரம்

களித்து மகிழ்ந்து நாங்கள்

கால்பந்து விளையாடும்

கல்லூரித்திடலில்

ஒழுகும் வழி சொன்ன

பள்ளியின் வகுப்பறையில்

ஆழ வேரெடுத்து

அழகாய் கிளைபரப்பி

நீள நெடுத்து நிற்கும்

முற்றத்து மாநிழலில்

வீழமாட்டேனென-திணவெடுத்து

சோளக்காற்றிடையும்

வாழ நிமிர்ந்து நிற்கும்-தென்னஞ்

சோலை மர நிழலில்

வாழ வழி பல தந்து

வளமும் தந்து-எம்

நீள நெடும் பரம்பரையின்

வரலாறு தந்த

வீரம் படுத்துறங்கும்

விடுதலைத்திருநாட்டில்

என் வாழும் நாட்களில்-இன்னும்

வாழும் நாட்களை

காலன் சிங்களவன்

கவர்ந்து கொண்டு போகாமல்

வாழ்ந்து களித்திட எனக்கொரு வரமருள்

பராபரமே!

Edited January 10, 200916 yr by பரதேசி

வீரம் படுத்துறங்காது பரதேசி.

புழுதி வீதியிலும், பல்லாண்டு வாழ்ந்த பழுதான திண்ணையிலும், தொழுத கோயிலிலும், ஊரின் வயல்களிலும், கால்ப்பந்து விளையாடிய கல்லூரித்திடலிலும், கால்பதித்து நடக்கும் காலம்வரும். கலங்கம் வேண்டாம். வீரம் செழித்தோங்கும் வேங்கையர் வீழ்ந்தால் அல்லவா... ஒப்பாரி வைத்து நீர் புலம்ப வேண்டும். ஓயாத அலையென்று பேர் கொண்ட தோழர்கள் ஊர்மடியில்த்தான் இன்னும் உறங்காமல் உள்ளார்கள். காப்பார்கள் கவலை வேண்டாம் ஆனால் நீர் உரம் ஊட்ட கையசைக்கும் நிமிடங்கள் ஒவ்வொன்றும் நீர் விட்டு வந்தவையை தரிசிக்கும் தருணங்களை விரைவுபடுத்தும் உணர்ந்திடுக.

அழகான கவிதை.... வார்த்தைகளுக்கிடையே சிறிய சந்தமும் கேட்கின்றது

கடவுளிடம் வரம் கேட்டு விடுதலை பெறமுடியாது...எமது ஒற்றுமையும், பலமும், அறிவு பூர்வமான ராஜ தந்திரங்களும், மனித உரிமைகளின் மீதான பற்றுதியுமே எமக்கு விடிவைத் தரும். அடக்குமுறை இறுதி வெற்றி கண்டதாய் சரித்திரம் இல்லை

எழுத்து பிழைகளை கொஞ்சம் கவனிக்கவும் (இதனை நிறைய பிழைகள் விடும் நான் சொல்லக் கூடாது)

நன்றி நிழலி மற்றும் சகாறவிற்கு! யாழ் களத்தில் இப்பொழுதுதான் எழுததொடங்கியுள்ளேன் இனிமேல் எழுத்துப்பிழைகள் வராமல் எழுதுகிறேன்.சுட்டிக்காடியமை

நீங்கள் மூச்சைப்பிடித்துக்கொண்டு எழுதி முடித்தீர்களோ என்னவோ நான் மூச்சுவிடாமல் படித்து முடித்தேன்!

காணிநிலம் வேண்டும் பராசக்தி" என்று கேட்ட அஞ்சாக்கவிஞன் போல தங்கள் வரிகளும் நெஞ்சில் நின்றிருக்கும் ஈர நினைவுகளைக் கொஞ்சமேனும் சிதறவிடாமல் எழுத்தில் வார்த்திருக்கிறது.

ஊரின் நினைவுகளை விட்டகற்ற முடியுமா?!! 'ஆண்டாண்டு காலமதாய் நாம் ஆண்டு வந்த பூமி' என்கின்ற தாயகப்பாடலை நினைவூட்டியது உங்கள் நிஜமான வரிகள்.

தொடர்ந்தும் எழுதுங்கள்.

எபி/தபி

வீழ்மாட்டேனென

வாழ 'வழி" பல

இவை தட்டச்சுப்பிழைகள் என்றேதோன்றுகின்றன....'வளி 'என்றால் காற்று 'வழி என்றால் பாதை.,

Edited January 9, 200916 yr by Thamilthangai