உலகத் தமிழினம் ஓரணியில் திரளவேண்டிய தருணம் இது! - உண்ணாவிரதத்தில் குதிக்க முன் திருமாவளவன் சுடர் ஒளிக்குப் பேட்டி

உலகத் தமிழினம் ஓரணியில் திரளவேண்டிய தருணம் இது! - உண்ணாவிரதத்தில் குதிக்க முன் திருமாவளவன் சுடர் ஒளிக்குப் பேட்டி

"இலங்கையில் அழிவை எதிர்கொண்டு ஆபத்தில் சிக்கியிருக்கும் ஈழத் தமிழ் மக்களைக் காப்பதற்காக உலகத் தமிழர்கள் எல்லோரும் ஓரணியில் திரளவேண்டிய தருணம் இது. அந்த ஐக்கிய எழுச்சியை உருவாக்குவதற்காகவே நான் இந்த உண்ணாவிரதப் போராட்டத்தில் குதித்துள்ளேன்." - விடுதலைச் சிறுத்தைகள் அமைப்பின் தலைவர் தொல் திருமாவளவன் தமது சாகும் வரையான உண்ணாவிரதப் போராட்டத்தில் இன்று குதிப்பதற்கு முன்னர் நேற்று மாலை சுடர் ஒளி’க்கு வழங்கிய விசேட செவ்வியிலேயே இவ்வாறு தெரிவித்தார். அவர் மேலும் தெரிவித்தவை வருமாறு:-

இலங்கையில் இனவெறிப் போரை நிறுத்துமாறும், அமைதிப் பேச்சை உடன் ஆரம்பிக்குமாறும் இலங்கை அரசை இந்திய மத்திய அரசு வலியுறுத்த வேண்டும்.

உலகத் தமிழினம் ஒன்றுபட்டு, வெகுண்டெழுந்து இந்த அழுத்தத்தை இந்திய மத்திய அரசுக்குக் கொடுக்கவேண்டும். அதற்கான இறுதித் தருணம் இதுதான்.

உலகத் தமிழினத்தை தட்டி எழுப்பி, வெகுண்டெழச்செய்யும் உணர்வு நிலையை ஏற்படுத்தியே இந்த உண்ணாநிலைப் போராட்டத்தில் குதிக்க முடிவெடுத்தேன்.

தங்கள் உரிமைகள் வேண்டி கடந்த இரண்டரை தசாப்தங்களாக ஈழத் தமிழர்கள் நடத்தும் போராட்டமும் அவர்களும் அழிக்கப்பட்டு விடவோ, ஒழிக்கப்பட்டு விடவோ நாம் அனுமதிக்க முடியாது. அந்த இழிகொலையை நாம் பார்த்து வாளாவிருக்கக்கூடாது.

ஈழத்தமிழர்களின் நலனுக்காக குரல் கொடுங்கள் என்று தமிழகத்தில் உள்ள தரப்புகள் எல்லாம் சேர்ந்து அழுத்தம் கொடுத்து, பல போராட்டங்களை நடத்தி, தமிழகத்தின் ஒட்டு மொத்தக் கருத்தை வெளிப்படுத்தியும் இந்திய மத்திய அரசு அசைந்து கொடுப்பதாக இல்லை.தமிழகத்தினதும் உலகத் தமிழர்களினதும் உணர்வுகளுக்கு மத்திய அரசு மதிப்புக் கொடுப்பதாக இல்லை.

இந்திய மத்திய அரசு அமைதி காக்கின்றது அல்லது ஈழத்தமிழர்களுக்கு எதிராக நடந்து கொள்கின்றது என்பதற்காக நாம் சும்மா இருந்து விட முடியாது.

தமிழக மக்களும் புலம்பெயர்வால் தமிழர்களும் ஒரணியில் ஒன்றுபட்டு எழுந்து ஈழத் தமிழர்களுக்காகக் குரல் கொடுத்து மத்திய அரசை அசையச் செய்ய வேண்டும்.

அதற்காக எல்லா இடங்களிலும் ஈழத் தமிழர்களுக்காக குரல் எழுப்பும் ஜனநாயகப் போராட்டங்கள் மக்கள் பேரெழுச்சியாக வெடித்து வெளிப்பட வேண்டும்.

நாம் எல்லாத் தரப்புகளும் ஒன்றிணைந்து உலகளாவிய ரீதியில் பெரிய அளவில் அழுத்தம் கொடுத்தால்தான் இந்திய மத்திய அரசு அசைந்து கொடுக்கும். அப்போதுதான் ஈழத் தமிழினம், இலங்கையின் சிங்கள அரசின் பேரழிவு ஆக்கிரமிப்பில் இருந்தும், அழித்தொழிப்பு நிலையிலிருந்தும் தப்பிப் பிழைக்க வாய்ப்புக் கிட்டும்.

அந்த நோக்கிலேயே இந்தப் போராட்டத்தில் குதித்திருக்கிறேன் - என்றார் திருமாவளவன்.

- உதயன்

ஈழத் தமிழருக்காக திருமாவளவன் சாகும்வரை உண்ணாவிரதப் போர்! - இன்று முதல் சென்னையில்

வன்னியில் உடனடியாக போரை நிறுத்துமாறு இலங்கை அரசுக்கு இந்திய மத்திய அரசும் தமிழக மாநில அரசும் உடனடியாக ஆக்கபூர்வமான நடவடிக்கையை எடுக்க வேண்டும் என்று வலியுறுத்தி விடுதலைச் சிறுத்தைகள் அமைப்பின் தலைவர் தொல் திருமாவளவன் சென்னையில் இன்று முதல் சாகும் வரை உண்ணாவிரதப் போராட்டத்தில் குதிக்கின்றார்.

சென்னை சேப்பாக்கத்தில் உள்ள தமிழக அரசின் விருந்தினர் விடுதிக்கு முன்பாக - எம். ஏ. சிதம்பரம் ஸ்ரேடியத்துக்கு வெளியே - அமைக்கப்படுகின்ற உண்ணாவிரத மேடையில் இன்று காலை 9.00 மணிக்கு உண்ணாவிரத போராட்டத்தை ஆரம்பிக்கிறார் திருமாவளவன்.

‘ இனவெறிப் போரை நிறுத்து!’, ‘அமைதிப் பேச்சை நடத்து!!’ ஆகிய இரு கோரிக்கைகளையும் இந்திய மத்திய அரசிடம் முன்வைத்து - அதற்கு தமிழக அரசும் உண்மையான நடவடிக்கைகளை எடுக்க வேண்டுமென வலியுறுத்தி - இந்த உண்ணாவிரதப் போராட்டத்தை திருமாவளவன் நடத்துகிறார் என விடுதலைச் சிறுத்தைகள் அமைப்பு அறிவித்தது.

தமிழகத்தின் முக்கிய கட்சிகளில் ஒன்றான விடுதலைச் சிறுத்தைகள் அமைப்பின் ஸ்தாபகத் தலைவரான திருமாவளவன் ஈழத் தமிழ் மக்களுக்காக நீண்டகாலமாகக் குரல் கொடுத்து வருபவர் என்பது குறிப்பிடத்தக்கதாகும்.

இந்த உண்ணாவிரதப் போராட்டத்துக்கான ஏற்பாடுகள் தொடர்பான கலந்துரையாடல்களில் திருமாவளவனும் அவரது கட்சியினரும் நேற்றுமாலை ஈடுபட்டிருந்தனர்.

- உதயன்