சிறிலங்கா புலனாய்வுத்துறையினரால் கடத்தப்பட்டு பின்னர் கைது செய்யப்பட்டதாக அந்நாட்டு அரசாங்கத்தினால் அறிவிக்கப்பட்ட 'உதயன்' மற்றும் 'சுடரொளி' பத்திரிகைகளின் பிரதம ஆசிரியர் என்.வித்தியாதரனுக்கு கொழும்பு மாவட்ட நீதவான் ஜெகான் பலப்பிட்டிய மூன்று மாத தடுப்புக்காவல் உத்தரவு பிறப்பித்துள்ளார்.

தெமட்டக்கொடையில் உள்ள கொழும்பு குற்றத்தடுப்பு பிரிவு அலுவலகத்தில் கடந்த மாதம் 26 ஆம் நாள் தொடக்கம் தடுத்து வைக்கப்பட்டிருந்த என்.வித்தியாதரனை குற்றத்தடுப்பு காவல்துறையினர் நேற்று புதன்கிழமை நீதிமன்றத்தில் முன்னிலைப்படுத்தினர்.

பாதுகாப்பு அமைச்சின் செயலாளர் கோத்தபாய ராஜபக்சவின் உத்தரவுப்படி வித்தியாதரன் மீது மேலும் விசாரணை நடத்த வேண்டும் என காவல்துறையினர் நீதிவான் ஜெகான் பலப்பிட்டியவிடம் அனுமதி கோரினர்.

கொழும்பில் தமிழீழ விடுதலைப் புலிகள் வானூர்தி தாக்குதல் மேற்கொண்டபோது தொலைபேசியில் கலந்துரையாடியமை குறித்து தொடர்ந்து விசாரணை நடத்த வேண்டும் என்றும் காவல்துறையினர் நீதிமன்றத்தில் சுட்டிக்காட்டினர்.

அதற்கு ஏதுவாக வித்தியாதரனின் உடல் நலம் குறித்த கொழும்பு சட்ட மருத்துவ அதிகாரியின் மருத்துவ அறிக்கையும் நீதிமன்றத்தில் சமர்ப்பிக்கப்பட்டது.

அதனையடுத்து, நீதவான் ஜெகான் பலப்பிட்டிய மூன்று மாத தடுப்புக்காவலில் வைக்குமாறு தெமட்டக்கொடையில் உள்ள கொழும்பு குற்றத்தடுப்பு காவல்துறையினருக்கு அனுமதி வழங்கினார்.

மூன்று மாத உத்தரவு வித்தியாதரன் கைது செய்யப்பட்ட கடந்த 26 ஆம் நாளில் இருந்து ஏற்புடையதாகும் என்றும் நீதிவானின் குறித்த உத்தரவில் தெரிவிக்கப்பட்டுள்ளது.

புதினம்

கைதான ஊடகவியலாளர்கள் தொடர்பில் நடவடிக்கை எடுக்குமாறு எல்லைகளற்ற ஊடகவியலாளர் அமைப்பு மனித உரிமை ஆணையத்திடம் கோரிக்கை

வீரகேசரி இணையம் - இலங்கையின் பாதுகாப்புத் தரப்பினரால் தடுத்து வைக்கப்பட்டுள்ள ஊடகவியலாளர்களான ஜே.எஸ்.திசநாயகம் என்.வித்தியாதரன் சார்பாக உடனடியாகத் தலையிட்டு உடனடியாக நடவடிக்கைகளை மேற்கொள்ளுமாறு எல்லைகள் அற்ற ஊடகவியலாளர் அமைப்பு ஐக்கிய நாடுகள் மனித உரிமை ஆணையத்தைக் கேட்டுக் கொண்டுள்ளதாக ஏ.எப்.பி செய்தி வெளியிட்டுள்ளது.

படையினருக்கும் விடுதலைப்புலிகளுக்கும் இடையில் இடம்பெற்று வரும் போரில் சிக்குண்டு உள்ள மக்கள் தொடர்பாக எழுதிய இரண்டு கட்டுரைகளை அடிப்படையாக வைத்து பயங்கரவாதத் தடைச்சட்டத்தின் கீழ் ஒரு வருடத்திற்கும் மேலாகத் சண்டே ரைம்ஸ் பத்திரிகையாளரான ஜே.எஸ்.திசநாயகம் தடுத்து வைக்கப்பட்டுள்ளதாகவும் மற்றும் கடந்த பெப்ரவரி மாதம் 26ம் திகதியில் இருந்து தடுத்து வைக்கப்பட்டுள்ள சுடரொளி செய்தியாளர் வித்தியாதரனை, தமிழீழ விடுதலைப் புலிகளுக்கும் அவருக்கும் இடையில் நெருங்கிய தொடர்பிருப்பதாக நிறுவுவதற்கு அதிகாரிகள் முயற்சித்து வருவதாக குற்றம் சாட்டப்பட்டுள்ளதாக தெரிவிக்கப்பட்டுள்ளது.