சமூக வலைத்தள பதிவுகளை கட்டுப்படுத்தப் புதிய சட்டம்

சமூக வலைத்தளங்களில் தனிநபரை இழிவுபடுத்தும் வகையிலான பதிவேற்றங்களுக்கு எதிராகப் புதிய சட்டமொன்று கொண்டுவரப்படவுள்ளது என்று  நீதி மற்றும் புத்தசாசன அமைச்சர் விஜயதாச ராஜபக்ச தெரிவித்தார். அத்துடன் வழக்குகளின் கால தாமதத்தைக் குறைப்பதற்கு விசேட நடவடிக்கைகளை அரசு முன்னெடுக்கவுள்ளது என்றும் அமைச்சர் குறிப்பிட்டார்.

நீதி அமைச்சில் நேற்று முன்தினம் இடம்பெற்ற சட்டம் ஒழுங்குபடுத்தல் ஆணைக்குழுக்களின் பிரதிநிதிகளுடனான கூட்டத்தொடரின் பின்னர் கருத்துத் தெரிவிக்கும் போதே அமைச்சர் மேற்கண்டவாறு தெரிவித்தார்.

இது தொடர்பில் அவர் மேலும் தெரிவித்துள்ளதாவது 

தற்போதைய காலத்துக்கு ஏற்ற வகையில் புதிய சட்டங்களை உருவாக்குவதற்கு அரசு திட்டமிட்டுள்ளது. அதேபோன்று நடைமுறையில் உள்ள சட்டதிட்டங்களை மறுசீரமைக்கும் வேலைத்திட்டங்களும் மும்முரமாக முன்னெடுக்கப்பட்டு வருகிறன. அத்தோடு தற்போது அதிகளவிலான வழக்குகள் மிகவும் காலதாமதம் அடைவதால் குறித்த வழக்குகளைத் துரிதப்படுத்துவதற்கு அவசர நடவடிக்கைகள் முன்னெடுக்கப்பட வுள்ளன. இவற்றில் மிகவும் முக்கியமான வழக்குகளுக்கு விசேட அவதானம் செலுத்தப் படவுள்ளது. இதற்கான ஏற்பாடுகளும் சட்டம் ஒழுங்குபடுத்தல் ஆணைக்குழுவில் ஆராயப்பட்டது.

அத்தோடு தற்போது அதிகளவில் சமூக வலைத்தளங்களில் தனி நபரொருவரை இழிவுபடுத்தும் முகமான  பதிவேற்றங்கள் அதிகளவில் காணப்படுகின்றன. இதன்படி இவ்வாறான பதிவேற்றங்களை முன்னெடுப்போருக்கு எதிராகப் புதிய சட்டமொன்றை அரசு கொண்டுவரவுள்ளது. இதற்கான ஏற்பாடுகளையும் நாம் முன்னெடுக்கவுள்ளோம். அத்துடன் மோட்டார் வாகனத் திணைக்களத்துக்கான சட்டங்களிலும் திருத்தங்கள் கொண்டு வருவதற்குத் திட்டமிட்டுள்ளோம் என்றார்.

    http://onlineuthayan.com/news/1614

இன, மதரீதியாக இழிவுபடுத்துவோரைத் தண்டிக்கும் சட்டமொன்றைக் கொண்டுவந்து நிறைவேற்றினால் வன்முறைகள் குறைவடையும்.