உதயன் மீதான தாக்குதலின் சூத்திரதாரி நாடாளுமன்றில் சுதந்திரமாக செயற்படுகிறார் : சபையில் சுட்டிக்காட்டினார் சரவணபவன் எம்.பி.

இராணுவத்தினரின் ஆதரவுடன் உதயன் பத்திரிகை அலுவலகத்திற்குள் நுழைந்த ஆயுததாரிகள் வெறியாட்டம் நடத்தி இரண்டு ஊழியர்களைச் சுட்டுக் கொன்றார்கள். மூன்று பேரைக் காயப்படுத்தினார்கள். ஒரு கோடி ரூபா அளவிலான சொத்துக்களை நாசமாக்கினார்கள். 

 

இதனைச் செய்தவர்களின் தலைவர் -தாக்குதலின் சூத்திரதாரி - முன்னைய ஆட்சியில் அமைச்சராக இந்தச் சபையில் இருந்தார். இன்று நாடாளுமன்ற உறுப்பினராக சுதந்திரமாகச் செயற்படுகிறார். இவ்வாறு, நாடாளுமன்றில் நேற்றுமுன்தினம் தெரிவித்தார் தமிழ்த் தேசியக் கூட்டமைப்பின் நாடாளுமன்ற உறுப்பினர் ஈ.சரவணபவன்.

 

இது தொடர்பில் அவர் குறிப்பிட்டுள்ளதாவது,

இலங்கை வரலாற்றிலேயே முதன்முதலில் ஊடக நிறுவனமொன்றுக்குள் புகுந்து, அங்கிருந்தவர்களைச் சுட்டுக் கொன்று, சொத்துக்களுக்கெல்லாம் சேதம் விளைவித்த சம்பவம் 2006 ஆம் ஆண்டு மே  மாதம் 02 ஆம் திகதி- சர்வதேச ஊடக சுதந்திர தினமான மே 3 ஆம் திகதிக்கு முதல் நள்ளிரவு - யாழ்ப்பாணத்தில் இடம்பெற்றது.

 

உதயன் பத்திரிகை அலுவலகத்திற்குள் நுழைந்த ஆயுததாரிகள் வெறியாட்டம் நடத்தி இரண்டு ஊழியர்களைச் சுட்டுக் கொன்றார்கள். 3 பேரைக் காயப்படுத்தினார்கள். ஒரு கோடி ரூபா அளவிலான சொத்துக்களை நாசமாக்க னார் கள். இலங்கையின் ஊடக வரலாற்றையே அதிர்ச்சியால் புரட்டிப்போட்ட இந்தச் சம்பவம் குறித்து இதுவரையில் எந்த விசாரணையும் இல்லை. 

 

இந்த நல்லாட்சி அரசின் கீழும் நடவடிக்கை எடுக்கப்படவில்லை. அந்தத் தாக்குதல் இராணுவத்தினரின் ஆசீர்வாதத்துடனும், ஆதரவுடனும்தான் நடத்தப்பட்டதென்றாலும் அதனை நேரடியாகச் செய்தவர்களின் தலைவர் - தாக்குதலின் சூத்திரதாரி - முன்னைய ஆட்சியில் அமைச்சராக இந்தச் சபையில் இருந்தார். இன்று நாடாளுமன்ற 

உறுப்பினராக சுதந்திரமாகச் செயற்படுகிறார். 

 

தான் செய்த கொலைகளுக்காக,  ஊடக நிறுவனங்களைத் தாக்கியமைக்காகத் தன்மீது வழக்கு விசாரணை மேற்கொள்ளப்படுமென்றோ, சிறையில்  அடைக்கப்படுவோமென்றோ எந்த அச்சமுமின்றி, இங்கு அமர்ந்திருக்கும் போது, வெளியே ஊடகவியலாளர்களும் ஊடக நிறுவனங்களும் எப்படி முழுமையான சுதந்திரத்தை அனுபவிக்க முடியும்? அந்தக் குற்றவாளி அரசின் பங்காளிக் கூட்டணி ஒன்றிலேயே உப தலைவராக இருக்கும்போது, ஊடகவியலாளர்களால் எப்படி சுதந்திரமாகச் செயற்பட முடியும்? நல்லாட்சி அரசின் கீழும் இப்படியான குற்றவாளிகள் பாதுகாக்கப்படுகிறார்களென்கின்ற போது, ஊடகவியலாளர்களால் எப்படி முழுமையான சுதந்திரத்துடன் செயற்படமுடியும்? என்றார்.

http://onlineuthayan.com/news/4879