ஆங் சான் சூகியை விடுவிக்கக் கோரி ஐநா பாதுகாப்புச் சபையில் தீர்மானம் நிறைவேற்றம்

[கிருபன்]

ஆங் சான் சூகியை விடுவிக்கக் கோரி ஐநா பாதுகாப்புச் சபையில் தீர்மானம் நிறைவேற்றம்

By Sethu

22 Dec, 2022 | 11:54 AM

மியன்மாரின் முன்னாள் அரசு தலைவர் ஆங் சான் சூகியை உடனடியாக விடுதலை செய்ய வேண்டுமென அந்நாட்டு இராணுவ ஆட்சியாளர்களைக் கோரும் தீர்மானத்தை ஐநா பாதுகாப்புச் சபை நிறைவேற்றியுள்ளது. 

2021 பெப்ரவரி முதல் மியன்மாரில் இராணுவ ஆட்சி நிலவுகிறது. நோபல் பரிசு பெற்ற 77 வயதான ஆங் சான் சூகி சிறையிலடைக்கப்பட்டுள்ளார். பல்வேறு வழக்குகளில் அவருக்கு சிறைத்தண்டனைகள் விதிக்கப்பட்டுள்ளன. 

இந்நிலையில் ஆங் சான் சூகியை விடுதலை செய்ய வேண்டும் எனக் கோரும் தீர்மானத்தை ஐநா பாதுகாப்புச் சபை நேற்று புதன்கிழமை நிறைவேற்றியது. 

மியன்மார் தொடர்பாக ஐநா பாதுகாப்புச் சபையினால் நிறைவேற்றப்பட்ட முதலாவது தீர்மானம் இதுவாகும்.

15 அங்கத்துவ நாடுகளுக்கு இடையிலான அப்பிராய பேதங்கள் காரணமாக, இதற்கு முன், மியன்மார் நிலைவரம் தொடர்பாக சம்பிரதாய பூர்வ அறிக்கைகள் மாத்திரமே வெளியிடப்பட்டிருந்தன. 

இந்நிலையில், ஆங் சான்சூகி மற்றும் முன்னாள் ஜனாதிபதி வின் மியின்ட் உட்பட கைதிகளை உடனடியாக விடுதலை செய்யவேண்டும் என மியன்மாரின் இராணுவ ஆட்சியாளர்களை ஐநா பாதுகாப்புச் சபை தீர்மானம் கோரியுள்ளது.

அதேவேளை, அனைத்து வகையான வன்முறைகளையும் உடனடியாக நிறுத்தப்பட வேண்டும் எனவும், அனைத்து தரப்பினரும் மனித உரிகைமகள், அடிப்படை சுதந்திரங்கள் மற்றும் சட்டத்தின் ஆட்சிக்கு மதிப்பளிக்க வேண்டும் எனவும் இத்தீர்மானம் கோரியுள்ளது.

ஐநா பாதுகாப்புச் சபையின் 15 அங்கத்தவர்களில் 12 நாடுகள் தீர்மானத்துக்கு ஆதரவாக வாக்களித்தன. அதன் நிரந்தர அங்கத்தவர்களான ரஷ்யா, சீனா வாக்களிப்பில் பங்குபற்றவில்லை. தீர்மான வரைபில் மாற்றங்கள் செய்யப்பட்டதையடுத்து, வீட்டோ அதிகாரத்தை பயன்படுத்துவதை இந்நாடுகள் தவிர்த்துக்கொண்டன. இந்தியாவும் வாக்களிப்பில் கலந்துகொள்ளவில்லை. 

 

https://www.virakesari.lk/article/143832

 

[nunavilan]

ஆங் சான் சூகி உள்ளிட்ட தலைவர்களை விடுதலை செய்ய வேண்டும்: ஐ.நா., வலியுறுத்தல்

‘மியான்மர் இராணுவத்தால் கைது செய்யப்பட்டுள்ள ஆங் சான் சூகி விரைவில் விடுதலை செய்யப்பட வேண்டும்’ என ஐ.நா. வலியுறுத்தி உள்ளது.
தென்கிழக்கு ஆசிய நாடான மியான்மரில் கடந்த ஆண்டு நவம்பர் மாதம் பொதுத்தேர்தல் நடைபெற்றது. இதில் அந்த நாட்டின் தலைவர் ஆங் சான் சூகி தலைமையிலான ஆளும் தேசிய ஜனநாயக கட்சி, மீண்டும் வெற்றி பெற்றது. ஆனால் அந்த நாட்டு இராணுவம் தேர்தலில் பெரிய அளவில் முறைகேடுகள் நடந்ததாக குற்றம் சாட்டியதோடு, தேர்தல் முடிவுகளை ஏற்க மறுத்தது. இராணுவத்தின் குற்றச்சாட்டு அடிப்படை ஆதாரமற்றவை’ எனக்கூறி தேர்தல் ஆணையம் அதை நிராகரித்தது.

இந்த விவகாரத்தில் மியான்மர் அரசுக்கும் அந்த நாட்டு இ ராணுவத்துக்கும் இடையே மோதல் போக்கு நீடித்து வந்த நிலையில், மியான்மர் இராணுவம் அதிரடியாக ஆட்சியை கைப்பற்றியதோடு ஆங் சான் சூகி, வின் மைன்ட் உள்பட முக்கிய அரசியல் தலைவர்கள் மற்றும் மூத்த அரசு அதிகாரிகளை கைது செய்து சிறை வைத்துள்ளது. மியான்மரில் அவசர நிலை பிரகடனப்படுத்தப்பட்டு இராணுவ ஆட்சி நடைபெறுகிறது. இதற்கு உலக அளவில் பல்வேறு நாடுகளின் தலைவர்கள் கடும் கண்டனம் தெரிவித்து வருகின்றனர்.

மியான்மரில் இராணுவத்திற்கு எதிராக நாட்டின் பல்வேறு பகுதிகளிலும் ஆர்ப்பாட்டங்கள் தொடர்கின்றன.
இது குறித்து பேசிய ஐ.நா., தலைவர் அண்டோனியோ குட்டாரெஸ், ‘தற்போது மியான்மரில் நிலவி வரும் சூழ்நிலை கவலையளிக்கிறது. ஜனநாயகம், மனித உரிமை ஆகியவை காக்கப்பட வேண்டும். மியான்மர் மக்களின் அடிப்படை உரிமைகள் மதிக்கப்பட வேண்டும். இ ராணுவத்தால் கைது செய்யப்பட்டுள்ள ஆங் சான் சூகி உள்ளிட்ட தலைவர்கள் அனைவரும் விரைவில் விடுதலை செய்யப்பட வேண்டும்’ என, வலியுறுத்தினார்.

https://thinakkural.lk/article/229582