பிரிட்டனுக்கு கடத்தப்படும் நூற்றுக்கணக்கான ஆபிரிக்க குழந்தைகள் கொத்தடிமைகளாக வாழும் அவலம்

பிரிட்டனுக்கு கடத்தப்படும் நூற்றுக்கணக்கான ஆபிரிக்க குழந்தைகள் கொத்தடிமைகளாக வாழும் அவலம்

[04 - February - 2008]

லண்டன் : ஆண்டுதோறும் நூற்றுக் கணக்கான குழந்தைகள் ஆபிரிக்காவிலிருந்து பிரிட்டனுக்கு கடத்திச் செல்லப்பட்டு அடிமைகளாக பயன்படுத்தப்படுவது விசாரணையொன்றில் தெரியவந்துள்ளது.

நைஜீரியா போன்ற நாடுகளில் குழந்தைகளை கடத்துவதற்கென்றே கும்பல்கள் செயற்பட்டு வருகின்றன. மூன்று அல்லது நான்கு வயதுச் சிறுவர்களின் விலை 8 இலட்சம் ரூபாவென புலனாய்வு விசாரணையொன்றில் தெரிய வந்துள்ளது.

பணம் கிடைக்கும் என்பதற்காக கர்ப்பமாகவுள்ள இளம் வயது பெண்கள் கூட தங்களுக்கு பிறக்கப்போகும் குழந்தைகளை விற்பனை செய்யத் தயாராகவுள்ளனர். ஆட்கடத்தல்களில் ஈடுபடும் கும்பல்களால் இக் குழந்தைகள் கடத்தப்படுகின்றன.

பிரிட்டனில் குழந்தைகள் வசதியாக வாழலாம் என்று ஆசைகாட்டி அங்கு இவர்களை கடத்திச் செல்வதன் மூலம் அவர்களை பயன்படுத்தி சட்டவிரோத குடியிருப்பு மற்றும் குழந்தைகள் நல உதவிகளை கடத்தல்காரர்கள் பெறுகின்றனர். பல இலட்சக்கணக்கான ரூபா பணம் இதன் மூலம் கிடைக்கிறது. அதன் பின்னர் இச்சிறுவர்களை அடிமைத் தொழிலுக்கு விற்று விடுகின்றனர்.

வீட்டு வேலை, சுத்தம் செய்வது, சமைப்பது சிறு குழந்தைகளை கவனித்துக் கொள்வது மற்றும் ஹோட்டல் அல்லது கடைகளில் வேலை செய்வது போன்றவற்றில் இவர்கள் ஈடுபடுத்தப்படுகின்றனர்.

ஒருநாளைக்கு 16 மணிநேரம் கடுமையாக வேலை வாங்கப்படுகின்றனர். லண்டன், பெர்மிங்ஹாம், மன்செஸ்டர் நகரங்களிலும் இவர்கள் அடிமைகளாக பயன்படுத்தப்படுகின்றனர். சில குழந்தைகள் உடல் ரீதியாகவும் துன்புறுத்தப்படுவதுடன் பாலியல் பலாத்காரத்துக்கும் ஆளாக்கப்படுகின்றனர்.

லாகோஸ் நகரை அடிப்படையாகக் கொண்டு செயற்படும் ஆட்கடத்தல் கும்பல் மட்டும் ஆண்டுக்கு 500 குழந்தைகளை இதுபோல் கடத்தி வருகிறது. பொலிஸார் மேற்கொண்ட நடவடிக்கையில் ஓராண்டில் மட்டும் 330 குழந்தைகள் மீட்கப்பட்டுள்ளன. ஆனால், பல்லாயிரக்கணக்கான குழந்தைகள் பிரிட்டனில் கொத்தடிமைகளாக வேலைவாங்கப்படுவதாக தெரிவிக்கப்படுகிறது.

thinakural.com