மாறிவிடு தமிழினமே

அநியாயச் சிங்களத்தின்

ஆக்கினைகள் பொறுக்காமல்

அந்நியத்தை வந்தடைந்த

அன்பான சோதரரே

அதிகாரச் சிங்களத்தின்

அடக்குமுறை தாங்காமல்

அகதிகளாய் புலம்பெயர்ந்த

அன்பான உறவுகளே

அந்நியத்தில் நீர்செய்யும்

அழுக்கான செயல்கள்தந்த

கவலைகளை இறக்கிவைக்க

கண்ணீரால் எழுதுகிறேன்

புலம்பெயர்ந்த மண்ணில்நீh

புரிகின்ற அராஜகத்தால்

புண்ணான மனத்துடன்நான்

புலம்பியிதை எழுதுகிறேன்

சீருடனே வாழுமுந்தன்

சிறப்பினைநான் காணவந்தேன்

சில்லறைச் செயல்கண்டு

சினந்துநான் எழுதுகிறேன்

குடும்பம் போல்நீங்கள்

கூடி வாழாமல்

குழுக்கள் பலசெய்து

குழம்புவதும் முறைதானோ

அண்ணன் தம்பியாக

அனுசரித்து வாழாமல்

அடிதடியில் இறங்கிநீரும்

அழிவதுவும் முறைதானோ

பெற்றோர்சொல் கேட்பதுவும்

பெரியோரை மதிப்பதுவும்

சின்னத் தனமென்று

சிந்தித்தல் முறைதானோ

அழகான தமிழ்மண்ணில்

அடுக்கடுக்காய் பலமுத்து

ஆனாலும் அவற்றைநாம்

அள்ளிவரத் தவறிவிட்டோம்

அருமருந்தாய் சேர்க்கவல்ல

அருமைகளை விட்டுவிட்டு

அம்மண்ணின் சாக்கடையை

அரவணைத்து நிற்கின்றோம்

சீயென்று போய்விட்ட

சீர்கெட்ட சீதனத்தை

சீமைக்கு வந்தபின்னும்

சீராட்டல் முறைதானோ

கீழ்ச்சாதி அவனென்று

கீழ்த்தரமாய் பேசுகின்ற

சிறுமைத் தனமின்னும்

சிதையாமல் இருப்பதேனோ

பருவப் பெண்ணொருத்தி

புூப்படைந்த செய்தியினை

பறைதட்டிச் சொல்கின்ற

பழக்கத்தை மாற்றாயோ

நாலு சுவருக்குள்

நடக்கின்ற சங்கதியை

பத்திரிகை அடித்திங்கே

பறைதட்டல் சரிதானோ

அன்றாடப் பிழைப்பின்றி

அல்லலுறும் மக்களங்கே

அரைவயிறுக் கஞ்சியின்றி

அணுவணுவாய்ச் சாகின்றார்

அல்லாடும் சோதரரை

அணுவேனும் நினைக்காமல்

அநியாயச் சடங்குக்காய்

ஆயிரமாய்ச் சிந்துவதேன்

புன்னகையின் மகிமைதனை

புரியாமல் நின்றுதினம்

பொன்னகையால் மேனியினை

போர்த்துவதும் சரிதானோ

அடுக்கடுக்காய் நகைக்கடையும்

அடிக்கொரு துணிக்கடையும்

அயராத உம்முழைப்பை

அள்ளிவிடத் துடிக்கிறதே

ஆசியரின் கலாச்சாரம்

அருமையிலும் அருமையென்று

அன்னியரில் பலரின்று

அதைத்தேடி அலைகின்றார்

ஆனாலும் தமிழர்நீரோ

ஆங்கிலேயக் கலாச்சார

அழுக்கைத் தழுவியும்மை

அலங்கோல மாக்குவதேன்

எட்டுமுழச் சேலையினை

எப்போதும் உடுங்களென்று

இங்கிலாந்துப் புூமியிலே

இடித்துரைத்தல் நியாயமில்லை

ஆனாலும் அதற்காக

அரையும் குறையுமாக

உடல்தெரிய உடையுடுத்தல்

உண்மையிலே நியாயமில்லை

கருமைக் கேசத்தின்

கவர்ச்சியினை அறியாமல்

கலர்பண்ணும் கேவலத்தை

கண்டுநான் கலங்குகிறேன்

மதுவும் மங்கையும்தான்

மதிப்பென்று எண்ணுகின்ற

மடமைத் தனத்தைநாம்

மறந்திடுவோம் இளைஞர்களே

ஒருவனுக்கு ஓருத்தியென்ற

ஒப்பற்ற பண்பாட்டை

இரவு விடுதிகளில்

இழப்பதுவும் சரியில்லை

ஆட்டங்கள் பழகுகின்றார்

அரங்கேற்றம் காணுகின்றார்

ஆனாலும் தமிழ்படிக்க

அடியோடு மறந்துவிட்டார்

தாய்மொழியை அறியாமல்

தம்குழந்தைதனை வளர்த்து

தமிழ்அழியக் காரணமாய்

தரணியிலே வாழ்கின்றீர்

அழகு தமிழiயுந்தன்

அருமைச் செல்வங்கள்

அறியாமல் இருக்கின்ற

அவலத்தை மாற்றிடுவோம்

வீண்வம்பு பேசுகின்ற

வீணர்கள் செயலாலே

புனிதமான கோயில்கூட

பொலிவிழந்து நிற்கிறது

எல்லோர்க்கும் பொதுவான

எம்பெருமான் சந்நிதியில்

எளிமையினைக் காணாமல்

எனக்குள்ளே புளுங்குகிறேன்

உன்வீட்டுச் சாக்கடையை

உணராமல் நின்றுதினம்

ஊரார் வம்புகளை

உரைத்துநிற்றல் முறைதானோ

பழிபாவம் பாராது

பணம்தேடும் வேகத்தில்

மனிதத்தைத் தொலைத்துவிட்ட

மனிதருக்கும் ஒருவார்த்தை

அடுத்த தலைமுறையாய்

அன்னியத்தை வந்தடையும்

அப்பாவி இளைஞர்களை

அடிமைகளாய் நடத்தாதே

பணக்காரத் தோரணையில்

பழிபாவம் செய்கின்றீர்

பலகோயில் போனாலும்

பழிபாவம் போகாது

தவறுகளே செய்யாதோர்

தரணியிலே யாருமி;ல்லை

தவறென்று அறிந்தபின்னும்

தவிர்க்காதோர் மனிதரில்லை

நடந்தவற்றை மறந்திடுவோம்

நடப்பவற்றை நினைத்திடுவோம்

நன்மக்களாய் வாழ்ந்து

நானிலத்தில் தமிழ்வளர்ப்போம்

மணிவாசகன்

மணிவாசகனுக்கு,

தங்களின் கவிதை அருமை, காலத்துக்குப் பொருத்தமான ஜதார்த்தக் கவிதை, தமிழருக்கென தனித்துவமான பண்பாடு, கலாசாரம் இருப்பது நிஜமல்லவா.

உங்களின் - கவி கோவம் -

காலத்தின் தேவை!

தொடருங்கள்- ஒரே தடவையில் எல்லாமாக - இல்லாம

கொஞ்ச இடைவெளி விட்டு உங்க படைப்புகளை தாருங்கள் !

கருத்து சொல்ல நேரம் வேணும் இல்லையா? 8)

நல்லாயிருக்குது. வாழ்த்துக்கள்.

உங்களைப்போல பலரும் புழுங்கிக் கொண்டிருக்கும் விடயங்களை அருமையாகக் கவிதையாக்கியிருக்கிறீர்கள்

காவியா

கருத்துக்களைச் சொன்ன அனைவருக்கும் நன்றி

வர்ணனின் கவனத்திற்கு

கருத்திற்கு நன்றி. புதிதாக வந்ததால் அதீத அர்வம் அதிகமாய் எழுத வைத்தவிட்டது. இனிமேல் கவனத்தில் எடுக்கிறேன். மறந்திடாமல் கருத்துக்களைத் தொடர்ந்து எழுதவும்

மணிவாசகன்

புலத்தில் நடப்பவையை புட்டுப்புட்டு வைத்திருக்கின்றீர்கள்

மணிவாசகரைப்போல மணியாய் எழுதுகின்றீர்கள்.

மீண்டும் நல்லதொரு நீண்ட கவிதையைத் தந்தமைக்கு எனது பாராட்டுக்கள்.

தங்களின் தமிழ்ப்புலமை மேலும் மேலும் வளர எனது வாழ்த்துக்கள்.

காலத்துக்கு பொருத்தமான தங்கள் கவிதை அருமை. மேலும் தொடர்ந்து எழுதுங்கள். வாழ்த்துக்கள்