உயிரில் உள்ள
ஒவ்வோர் அணுவும்
வலியால் துடிக்க
வாடும் எனக்கு-

 

உதவிட இந்த
உலகினில் யாருளர்...?

 

நெஞ்சம் முழுதும்
நிறைந்த சோகம்...
கொஞ்ச மேனும்
கருணை கொண்டு-

 

உதவிட இந்த
உலகினில் யாருளர்...?

 

பெற்றார் இன்றிப்
பிள்ளைகள் இன்றி
உற்றார் இன்றி
உழலும் எனக்கு-

 

உதவிட இந்த
உலகினில் யாருளர்...?

 

நாளும் பட்டினி..
நாளையும் பட்டினி..
வீழும் கண்துளி
விரல்கொண்டு துடைத்தினி-

 

உதவிட இந்த
உலகினில் யாருளர்...?

 

எண்ணற்ற துக்கம்...
இடையற்ற துயரம்...
கண்ணுற்றுக் கலங்கிக்
கடுகியே  வந்து-

 

உதவிட இந்த
உலகினில் யாருளர்...?

 

 

 

 

Edited March 17, 201411 yr by எஸ். ஹமீத்

'உதவிட' என்பதைத் தயவுசெய்து 'உதை விட' என்று படித்து விடாதீர்கள்...

கவிதையென்று பார்த்தால் கடைசியில் மின்னஞ்சலில் உதவுமாறு எழுதியிருக்கிறிங்கள் ஹமீத். வாழ்ந்திட வழிகள் அவரவர் முயற்சியும் உழைப்பின் வெற்றியுமே. கவிதையில் உதவி கோரும் உங்கள் அழைப்புக்கு எங்களால் எதையும் தரமுடியாமைக்கு வருந்துகிறோம்.

அன்புச் சகோதரி சாந்தி அவர்களுக்கு...

 

ஒரு கவிதையை அதன் அழகியலுடன்-பொருள் நயத்துடன்-கவிதையாகப் பார்க்க வேண்டுமே தவிர, கவிஞனின் சொந்த வாழ்க்கையாகப் பார்க்கக் கூடாது.

 

(குறிப்பு: இங்குள்ள ஒருவரைத் தவிர வேறு எந்த உறுப்பினர்களுக்கும் எனது மின்னஞ்சல் முகவரி தெரியாது)

 

எனினும் 'நேசக் கரம்' மூலம் பல்லாயிரக் கணக்கானோர்க்கு உதவும் உங்கள் உயர்ந்த சேவைக்கு என் மனம் நிறைந்த வாழ்த்துக்கள்...!

 

அன்புடன்,

 

எஸ். ஹமீத்

இது தனிப்பட்ட கவிஞனின் வாழ்வில் நுளைதல் அல்ல ஹமீத். பொதுவெளியில் உதவியென்று எழுதப்பட்டதால் அதற்கான பதில் மட்டுமே எனது. உங்கள் அஞ்சல் முகவரி எனக்கும் தெரியாது சகோதரனே. அது அவசியமும் இல்லைத்தான். எனினும் கவிதைக்கு பாராட்டுக்கள்.

அன்புச் சகோதரி...

 

கவிதை கண்டதும் 'உங்களுக்கு என்ன பிரச்சினை..என்னால் முடிந்த உதவிகளைச் செய்கிறேன்' என்று ஒரு மனிதாபிமானத்தின் சின்னம் எனக்குப் பிரத்தியேக செய்தி அனுப்பியிருந்தார். அந்த உள்ளத்தை நான் போற்றுகிறேன். ஆனாலும், அவருக்கு இன்னமும் நான் பதில் அனுப்பவில்லை.

 

அந்த நல்ல உள்ளத்தின் தூய வார்த்தைகளையும் உங்கள் பதில்களையும் ஒப்பிட்டுப் பார்க்கும் போது, எனக்குள் வேதனைதான் பெருக்கெடுக்கிறது.

 

ஒரு கவிஞன் தனக்குத் தானாக மட்டுமல்ல, பிறர்க்காகவும் தானாக மாறி நிற்பவன். அவன் அனைத்து ரூபங்களிலும் நின்று குரலெழுப்ப வல்லவன்.

 

இந்த விடயத்தைப் புரிந்து கொண்டிருந்தால் உங்கள் முதலாவது விமர்சனத்தை அத்துணை கடுமையாக எழுதியிருக்க மாட்டீர்கள்...ஒரு வகையில் அது எனது முகத்தில் காரி உமிழ்ந்தது போலிருக்கிறது...எனினும் தாங்கிக் கொண்டேன்.

 

நன்றி சோதரி...மிக்க நன்றி...!
 

வாசகர் சிலரின் கவிதைப் புரிதலின் காரணமாக, இந்தக் கவிதையின் சில வரிகள் என்னால் நீக்கப்பட்டுள்ளன.நல்ல புரிந்துணர்வுகளுடன் நாளும் வாழ்வோம் நானிலத்தில்!

கவிதை நன்று கமீத். வாருங்கள் வரவு நல்வரவாகுக.

இந்த இயந்திர  தனமான  வாழ்வில் உதவி என்றால் மிகவும்பின் நிற்பார்கள்.  துன்ப பட்ட  ஒருமன    நிலையில் எழுதி  உள்ளீர்கள்போல் இருக்கிறது.  ஒரு வழி அடைத்தால்  மறுவழி திறக்கும் என்பார்கள்.    இறைவனின்  அருளோடு முயற்சி செய்யுங்கள். கிடைக்கும்.

ஐயோ...இது எனக்கான உதவி தேடல் இல்லை சகோதரி...பொதுவாக எழுதினேன். எதுகை மோனையுடன் எழுத முயற்சி செய்ததால் சில சொற்கள் வலுக்கட்டாயமாக வந்து விழுந்து விட்டன. அவற்றையும் நீக்கியுள்ளேன்.

 

எனினும்,தங்கள் கருத்துக்கு மிக்க நன்றி நிலாமதி அவர்களே...

மிக்க நன்றி மெசொபொத்தேமியா சுமேரியர் அவர்களே...