தேன் சிந்துதே வானம்...........

இரவல் ஒளியெடுத்து இரவில் ஒளிஉமிழும்
அழகில் மயங்க வைக்கும் ஒற்றைத் திங்கள்
வளையில் ஒளித்திருந்து வாகாய் படம் பிடித்து
வளைய வரும் எட்டுக் காலில் நண்டு
காற்றடிக்கும் திசைகளெங்கும் காலாற நடைபயின்று
பூப்பந்தாய் உருண்டு வரும் இராவணனின் மீசை
வெள்ளி நிலா விளக்கேற்ற வீச்சுவலை இழுத்து வரும்
கடலோரக் கவிதைகளாய் கட்டுமரம்
சோளகத்தில் மோதிவரும் சுழற்காற்றில் தலையாட்டி
தாளலயம் தப்பாத தென்னம்பிள்ளை
வானக் குடைபிடிக்க வண்ணமலர் சிரிக்க
சோலையிலே இசைபாடும் கானக் குயில்
வாடைக் காற்றுரச வயல்களிலே கதிருரச
பூமணத்தை சுமந்து வரும் காலைத் தென்றல்
காலைப் பனித் துளியில் மேனி தனைத் துவட்டி
தளுக்காகச் சிரிக்கின்ற செம்பருத்தி
ஆத வன் எழும்பு முன்பு அடிவானம் சிவக்கு முன்பு
மேதினியை துயிலெழுப்பும் கோவில்மணி
பூவில் தேனெடுக்கும் புல்லரிப்பின் களிப்புடனே
ரீங்காரம் இடும் சில் வண்டின் ஓசை
கழுத்து மணி அசைய கன்றுகளும் விடைகொடுக்க
மேய்ச்சலுக்கு ஆயத்தமுறும் ஆநிரைகள்
தோளில் கலப்பையுடன் துவளாத உறுதியுடன்
வயற்காட்டை விரைந்து செல்லும் ஏர் உழவன்
இடையில் குடமசைய இருவிழியில் கனவுரச
துள்ளலுடன் நடைபயிலும் சமஞ்ச பெண்கள்
இரவின் நீளத்தை ஏன் விடியல் தகர்த்ததென்று
ஏக்கமுடன் விழிமலர்த்தும் புது மணப்பெண்
இரவெப்போ விடியுமென்று இருமலுடன் போராடி
சுடுநீர் அருந்துகின்ற முது நோயாளி
காவோலை தான்உரச காற்றுவந்து தாளமிட
ஓயாமல் ஒலிஎழுப்பும் பனங்கூடல்கள்
நீள் விசும்பின் எல்லை எங்கும் நீக்கமுற நிறைந்திருந்து
கண்சிமிட்டி களைப்படைந்த விண்மீன் கூட்டம்
தேன் சிந்தும் வானமதில் தான் சிந்தும் ஏழுவர்ணம்
நெஞ்சாம் கூட்டிற்குள் நினைவுகளோ வானவில்லாய்
அற்றைத் திங்களதின் அகலாத ஞாபகங்கள்
இற்றைத் திங்களிலும் நிழலாய் நிரந்தரமாய்.

                      --xxxx---xxxx---

கவிதை கருத்து அழகு 
கவிதையை பிரித்து பிரித்து போடுங்கள் 
சிறு சிறு பந்தியாக அப்போதுதான் வாசிப்பது இழகு

உங்கள் கருத்திற்கு நன்றி இனியவன்

எங்கள் கிராமங்களின் அதிகாலைப் பொழுதை அற்புதமாய்ப் படம் பிடித்துள்ளீர்கள்...! அருமை...!!

நன்றிகள் சுவி

தேன் சொட்டும் தேனடை இந்தக் கவிதை.

உங்கள் கருத்திற்கு நன்றிகள்  செயொன் யாழ்வெந்தன்  .

எனது கணனியில் இரட்டைக் கொம்பு எழுதமுடியாமலுள்ளது, எழுத்துப் பிழைக்கு மன்னிக்கவும்

காவலூர் கண்மணி... இன்று தான் உங்கள் கவிதையைப் பார்க்கக் கிடைத்தது!

தலையங்கத்தைப் பார்த்து விட்டு...ஏதோ சினிமாப்படம் பற்றியதாக்கும் என்று நினைத்து விட்டுக் கடந்து போய்விட்டேன்!

இன்று பார்க்கும் போது தான்.... எதையெதை எல்லாம் வாழ்க்கையில்...நிரந்தரம் என்று நினைத்திருந்தேனோ அத்தனையையும் தொலைத்து விட்டு நிற்கிறேன்!

அவ்வளவும் உங்கள் கவிதையில் வரிசைப்படுத்தப் பட்டிருக்கின்றது!

தொடர்ந்து கவியுங்கள்!

விளக்கு வைச்சாப் பிறகு ' பச்சை' கொடுக்கல், வாங்கல் செய்யிறது இல்லை..!

நாளைக்குத் தான்!

ஏன் இன்னும் வசிட்டா் வாயால் வாழ்த்து வரவில்லை எனக் காத்திருந்தென்.  எப்பவும் என் கவிதைகளை அழகாக விமா்சிப்பவா் புங்கையுரன். பாராட்டுக்கு நன்றிகள்.