போலீஸ் அதிகாரியான கமல், பணத்திற்காக எந்த வேலையையும் செய்யக் கூடியவர். இந்நிலையில், போதைப் பொருள் கடத்திவரும் பிரகாஷ் ராஜ்ஜிடம் இருந்து விலைமதிப்புள்ள போதைப் பொருளை திருடுகிறார். அதை பதுக்கி வைக்கும் போது மற்றொரு போலீசான திரிஷா பார்த்து விடுகிறார்.

போதைப் பொருளை திருடியதால் கமலின் மகனை பிரகாஷ் கடத்துகிறார். அவனை பணயக் கைதியாக வைத்துக் கொண்டு, திருடிய போதைப் பொருளை கேட்கிறார். மகனை மீட்கும் கட்டாயத்தில் இருக்கும் கமல், போதைப் பொருளை கொடுக்க நினைக்கிறார். ஆனால், அவர் பதுக்கி வைத்த இடத்தில் இருந்து போதைப் பொருள் காணாமல் போகிறது.

என்ன செய்வதென்று தெரியாமல் இருக்கும் கமல், எப்படி தன் மகனை மீட்டார்? அந்த போதைப் பொருளை எடுத்தது யார்? கமல் போதைப் பொருளை கடத்துவதற்கு காரணம் என்ன? என்பதே பரபரப்பான மீதிக்கதை.

‘உத்தம வில்லன்’, ‘பாபநாசம்’ என இரண்டு சென்டிமென்ட் படங்களுக்குப் பிறகு மீண்டும் ஆக்‌ஷன் கதைகளில் நடித்திருக்கிறார் கமல். வழக்கமான நேர்மை போலீஸ் போல் இல்லாமல் வித்தியாசமான போலீசாக நடித்திருக்கிறார். கமலின் நடிப்பை பற்றி சொல்ல தேவையில்லை. நடிப்பில் என்னை மிஞ்ச யாரும் இல்லை என்றளவிற்கு நடித்திருக்கிறார். குறிப்பாக ஆக்‌ஷன் காட்சிகளில் தனக்கே உரிய பாணியில் நடித்திருக்கிறார்.

முதல் முறையாக போலீஸ் வேடத்தில் நடித்திருக்கிறார் திரிஷா. போலீஸ் கதாபாத்திரத்திற்கு கச்சிதமாக பொருந்தியிருக்கிறார். திரிஷாவின் நடிப்பில் இப்படம் முக்கிய இடம் பெறும் என்பதில் சந்தேகமில்லை. குறிப்பாக ஆக்‌ஷன் காட்சிகளில் மிகவும் ரிஸ்க் எடுத்து நடித்திருக்கிறார்.

படத்திற்கு பலமாக பிரகாஷ் ராஜ்ஜின் நடிப்பு அமைந்திருக்கிறது. இவருடைய காட்சிகள் அனைத்திலும் ரசிகர்களிடம் கைத்தட்டல் பெறுகிறார். கமலை ஆட்டி வைக்கும் காட்சிகளில் வெகுவாக ரசிகர்களை கவர்ந்திருக்கிறார். மற்றொரு போலீசாக வரும் கிஷோர் மிடுக்கான போலீஸ் அதிகாரியாக நடித்திருக்கிறார். சம்பத், ஜெகன், ஆஷா சரத் ஆகியோர் கொடுத்த வேலையை சிறப்பாக செய்திருக்கிறார்கள்.

தமிழ் சினிமாவை அடுத்த கட்டத்திற்கு கொண்டு செல்லும் படமாக இயக்கியிருக்கிறார் இயக்குனர் ராஜேஷ். விறுவிறுப்பான திரைக்கதை படத்திற்கு பலம். படம் முடியும் போது இவ்வளவு சீக்கிரம் படம் முடிந்துவிட்டதாக, என்றளவிற்கு இயக்கியிருக்கிறார். கதாபாத்திரங்களை சிறப்பாக கையாண்டிருக்கிறார். ஆக்‌ஷன் படத்தை மிகவும் ஸ்டைலீஷாக கொடுத்திருக்கிறார்.

ஜிப்ரான் இசையில் படத்தில் ஒரு பாடல்தான். வழக்கமான படத்தில் இடம் பெறும் பாடல் போல் இல்லாமல் உருவாக்கியிருப்பது சிறப்பு. பின்னணி இசையில் மிரட்டியிருக்கிறார். சனு ஜானின் ஒளிப்பதிவு அருமை. குறிப்பாக கமல், திரிஷா, கிஷோர் மோதும் சண்டைக்காட்சி சிறப்பு.

மொத்தத்தில் ‘தூங்காவனம்’ ரசிகர்களை தூங்க விடவில்லை

http://www.tamilspy.com/archives/54230

பட விமர்சனங்களின் பதிவுகளுக்கு நன்றி  கொழும்பான்...! 

தூங்காவனம் படம் எப்படி?

 

சராசரி போலீஸ்கார கமலின் ஆசை மகன் கடத்தப்படுகிறான், தேடிச்செல்லும் கமல், மாயமாகும் போதைப்பொருள், கமல் மேல் சந்தேகப்பட்டு பின்தொடரும் த்ரிஷா, வில்லனாக மாஸ் காட்டும் பிரகாஷ் ராஜ் இவர்களின் ஒரு நாள் இரவில் நடக்கும் த்ரில் கலந்த ஆக்‌ஷன் கதையே தூங்காவனம்.

2011ல் ப்ரென்சு மொழியில் 89 நிமிடம் ஓடக்கூடிய ஆக்‌ஷன் படமான 'ஸ்லீப்லஸ் நைட்'  என்கிற படமும்  தூங்காவனமும் ஒரே சிறுகதையிலிருந்து படமாக்கப்பட்டது. அந்த ப்ரெஞ்ச் சிறுகதையின் உரிமையை கமல் வாங்கியுள்ளார். அதை  தமிழுக்கு ஏற்றவாறு 127 நிமிடமாக்கி சுவாரஸ்யத்தையும் விருவிருப்பையும் கலந்து தந்திருக்கிறார் இயக்குநர் ராஜேஷ்.

ஆஷா சரத்திடம் விவாகரத்து பெற்று மகனோடு இருக்கும் நார்காட்டிக்ஸ் அதிகாரி கமல்ஹாசன். பணத்திற்கு ஆசைப்பட்டு விலைமதிப்புள்ள போதைப்பொருளை யூகிசேதுவுடன் சேர்ந்து மறைத்துவைக்கிறார் கமல். அதனால் கமலின் மகனை கடத்திச் சென்று மிரட்டுகிறார் பிரகாஷ்ராஜ். போதைப்பொருளைக் கொடுத்து மகனை காப்பாற்றினாரா கமல் என்பதே க்ளைமேக்ஸ்.

காலையில் போதைப் பொருளைக் கைப்பற்றுவதில் முதல் காட்சித் தொடங்கி ஒரு நாள் இரவு முழுவதும் நடக்கும் சம்பவமே கதை. வேகமாக நகரும் முதல் பாதி, கதைக்கேற்ற மித வேகத்தில் இரண்டாம் பாதி என்று கச்சிதமாக படத்தொகுப்பை தந்திருக்கிறார் ஷான் முகமது. படத்தின் விருவிருப்பை கூட்டுவதற்கு ஏற்ற பலமான பின்னணி இசை. படத்தில் வைரமுத்து வரிகளில் ஒரே ஒரு பாடல் மட்டுமே. அதுவும் படம் முடிந்து டைட்டில் ஓடும்போது தான்.

யூகிசேது, கிஷோர், சம்பத், ஆஷா சரத் என்று அவர்களுக்கான கதாப்பாத்திரத்தில் பக்காவான நடிப்பை நடித்திருக்கிறார்கள். போலீஸ் அதிகாரியாக வரும் த்ரிஷாவிற்கு பேசப்படும் படங்களின் வரிசையில் இந்தப் படமும் ஒன்று என்பதில் சந்தேகமில்லை. 

“என் பையன் சட்டையில சின்ன கரை பட்டாலும் உன்ன செதச்சிடுவேன்” என்று சொல்லவுமே திரையரங்கே அதிர்கிறது. மகன் மேல் அதீத பாசம் வைத்திருக்கும் கமல், மகனிடம் பேசவேண்டும் என்று தொலைப்பேசியில் மட்டும் வந்துபோகும் ஆஷா சரத் காட்சிகள் கச்சிதம்.

சமையல் அறையில் கமலுடன் த்ரிஷாவின் சண்டைக்காட்சிகளில், கமலுக்கு இணையாக ஸ்கோர் செய்திருக்கிறார் த்ரிஷா. சண்டைக்குப் பிறகு என் மகனைக் காப்பாத்தணும் என்று கமல் கண்ணீர் விடும் காட்சிகள் க்ளாஸ் ரகம்.

வில்லனாக பிரகாஷ்ராஜ் டெரராக மட்டுமில்லாமல் கவுண்டர் காமெடியிலும், நடிப்பிலும் கைதட்டலை பெறுகிறார்.  படம் முழுவதும் ஒரு க்ளப்பிற்குள்ளேயே நடக்கிறது. பார்த்த காட்சிகளையே மீண்டும் மீண்டும் பார்க்க வேண்டிய துர்தஷ்டமான நிலை ரசிகர்களுக்கு நேர்ந்தது மட்டுமே கவலை. எதற்கெடுத்தாலும் சமையல் அறைக்குள் ஓடி வந்து ஒழிந்துகொள்கிறார் கமல். வேற இடமே இல்லையா பாஸ்!

கமல் படமென்றால் முத்த காட்சி நிச்சயம் இருக்கவேண்டும் என்று எதிர்பார்க்கும் ரசிகர்களுக்காக, இந்தப் படத்திலும் முத்தக் காட்சியை புகுத்தியிருக்கிறார் இயக்குநர். ஆனால் யார் அந்த நாயகி, எதற்கு அந்த காட்சி என்பது மட்டும் ட்விஸ்ட். படம் பார்த்து தெரிஞ்சிக்கோங்க பாஸ்.

படத்தில் ஒரே ஒரு பாடல் மட்டுமே, காதலுக்கென்று தனிக் காட்சிகள் இல்லை, தனியாக காமெடி டிராக் என்றில்லாமல் படத்தொடு நகரும் காமெடிகள் என்று தமிழ் சினிமாவின் அடுத்தக் கட்ட நகர்விற்கு தேவையான படங்களில் தூங்காவனமும் ஒன்று.

http://www.vikatan.com/cinema/article.php?aid=54929