அக்சன் பெய்ம் நிறுவன பணியாளர்களின் படுகொலைக்கு அரசாங்க படைகளே காரணமாக இருக்கலாம்

மூதூரில் அக்சன் பெய்ம் நிறுவன தொண்டர் நிறுவன பணியாளர்களின் படுகொலைக்கு அரசாங்க படைகளே காரணமாக இருக்கலாம் என்ற யுத்த நிறுத்த கண்காணிப்புக் குழுவின் குற்றச்சாட்டிற்கு அரசாங்கம் இதுவரை பதிலளிக்கவில்லை என இலங்கை யுத்த நிறுத்த கண்காணிப்புக் குழு தகவல் வெளியிட்டுள்ளது.

கடந்த வருடம் ஓகஸ்ட் மாதம் 4ம் திகதி மூதூரில் அக்சன் பெயம் நிறுவன பணியாளர்கள் 17 பேர் படுகொலை செய்யப்பட்ட சம்பவம் குறித்து விசாரணை நடத்திய யுத்த நிறுத்த கண்காணிப்புக் குழு அது தொடர்பான அறிக்கையினை ஸ்ரீலங்கா அரசாங்கத்திற்கும் தமிழீழ விடுதலைப்புலிகளுக்கும் கடந்தவருடம் ஓகஸ்ட் 29ம் திகதி அனுப்பி வைத்திருந்தது.

கண்காணிப்புக் குழுவின் அறிக்கையில் ஆகஸ்ட் 4ம் திகதி மூதூர் அரசாங்க படைகளின் கட்டுப்பாட்டில் இருந்துள்ளதால் அக்சன் பெயம் பணியாளர்களின் படுகொலைக்கு அரச படைகள் தவிர்ந்த வேறு எவரையும் குற்றம்சுமத்த முடியாது என சுட்டிக்காட்டப்ட்டுள்ளது.

இதேவேளை அரசாங்க கட்டுப்பாட்டில் இருந்த மூதுர் பிரதேசத்திற்கு தமது கண்காணிப்பாளர்கள் செல்வதற்கும் விசாரணை நடத்துவதற்கும் அரச படைகள் அனுமதி மறுத்தமை குறித்தும் கண்காணிப்புக் குழு அந்த அறிக்கையில் விசனம் தெரிவித்திருந்தது.

எனினும் ஸ்ரீலங்கா அரசாங்கம் இன்று வரை தமது அறிக்கைக்கு எழுத்து மூலமான பதில் எதனையும் அனுப்பவில்லை என்று யுத்த நிறுத்த கண்காணிப்புக் குழுவின் பேச்சாளர் தொபினூர் ஒமர்சன் தெரிவித்துள்ளார் கண்காணிப்புக் குழுவின் குற்றச்சாட்டு குறித்து அரசாங்கம் பகிரங்கமாக தமது கண்டனத்தை வெளியிட்டிருந்த போதிலும் அதனை எழுத்து மூலம் கண்காணிப்புக் குழுவிற்கு அனுப்பி வைக்காதமை பல்வேறு சந்தேகங்களை ஏற்படுத்தியுள்ளதாக அவதானிகள் கருத்து வெளியிட்டுள்ளனர்

-பதிவு

அரச படைகள் காரணமாக இருக்கலாம் எண்டு சொன்னால் அது இல்லாமலும் இருக்கலாம் எனவும் தொனிப்படும்... ! வெறும் ஊகங்களை மட்டும் சொல்லாமல் சரியான தாரவுகளை தரவேண்டியது கண்காணிப்பு குழுவின் பணி... அதுக்காகத்தான் நேர்வே சம்பளத்தை இலங்கையில் வாங்குகிறார்கள்...!!