ஆரிடம் முறையிடுவோம்?

ஆரிடம் முறையிடுவோம்? எவரை நம்புவோம்?

அவனியிலே எம்மை அணைத்திட யாருளர்?

போரியல் வாழ்வினைப் பழக்கத்திற் கொண்டோம்

புதியவை யல்லஇத் துன்பங்கள் எமக்கு

சூரியத் தலைவனங்கு எதிர்வு கூறுகின்றான்

சாற்றும் நூறாண்டு நூறாண்டு காலம்

நேரிய பாதையிற் பதிலடி கொடுத்திட

நேரம் வந்ததெனத் திடமுரைக் கின்றான்

மனிதநேயப் பணியாளர் தாமங்கு செயலாற்ற

மிக்கவே அச்சுறுத்தல் நிறையிழி நாடென

மனிதவுரிமை அமைப்பொடு ஐ நா சபையினரும்

மட்டிலாக் கண்டனம் மனதாரக் கூறுகிறார்.

நனிவுயர் எம்மக்கள் நாடோறும் மடிதல்

நன்றாக அறிந்துமிவர் எதுவுமே செய்திலர்

கனியமுத வார்த்தையிற் சிங்களர் அவரைக்

கட்டுக்குள் வீழ்த்தித் தம்பக்கம் சாய்க்கின்றார்

அறிக்கைகள் விடுகின்றார் அடிக்கடி வருகின்றார்

அனுதாபம் எனுஞ்சொல் அழகாய் உரைக்கின்றார்

நெறிதவறா நடுநிலமை பேணுதலாய்க் காட்டி

நெடுந்தூரப் பயணத்தில் நேரம் கழிக்கின்றார்

வறியவர் முதியவர் வஞ்சிக்கப் பட்டவர்

வன்முறையிற் பிள்ளைகள் இழந்தோரைப் பாராது

பொறியில் வீழ்ந்தார் பொய்புரட்டுப் புகல்வோரின்

புன்மைக ளறிந்தும் பின்னிலை யடைந்தார்

ஊடக வியலாளர் இடரினில் ஆழ்கின்ற

உலகின் முதற்தர நாடது இலங்கையெனப்

பாடல் வரிகளாய்ப் பலதடவை எடுத்தியம்பிப்

பக்கச் சார்பற்ற மனிதரெனக் காட்டுகிறார்.

வேடிக்கை மாந்தரிவர் வில்லங்கம் தீர்ப்பரென

வீணான நம்பிக்கை கொள்ளல் வேண்டாம்

கூடிடுவோம் நாமிங்கு களமிறங்கி முழங்கிடவோம்

கொடுமைகள் தம்மை உலகினிற் பரப்பிடுவோம்.

கிழக்குமா காணம்தனிற் குடிகள் சிதறுண்டு

கீழ்த்தர இராணுவ ஆட்சிக்குட் சிக்குண்டார்.

இழப்பதற் கெதுவுமின்றி ஏதிலியாய் உடமைகள்

அற்றவராய்ப் பட்டினியில் உயிர் துறக்கின்றார்.

வழக்குத் தானுரைத்து வாழ்ந்தநிலம் மீட்டிட

வகையறியா இன்னலில் வாடியவர் சோர்கின்றார்.

பழிக்கஞ்சாப் பாதகரின் தலைமையிற் றானங்கு

பலதும் இயங்கிடப் பாவமவர் என்செய்வார்?

வங்காள தேசத்தை வகுத்து அளித்திட

வலிந்து பாரதம் வலக்கை நீட்டியது.

தங்களின் விடிவிற்காய் உழைத்த கொசோவாவும்

சபையாம் ஐ.நாவின்கீழ் அமைதி பெறுகிறது

எங்கெலாம் விடுதலை வேண்டினரோ அங்கெலாம்

இருளகற்றும் திருப்பம் பலமாகத் தெரிகிறது.

தங்கமாம் தமிழீழப் போராட்டம் தன்னில்

தயக்கமும் குழப்பமும் தரணிக் கேனோ?

இழித்தலிலும் ஏய்த்தலிலும் இலங்கை அரசினர்

உலகத் தினரை ஆழ்த்திய போதினிலும்

பழித்து ரைத்துப் பலவடுக்கள் பகன்று

பயங்கர வாதிகளெனப் பட்டங்கள் சூட்டியும்

அழித்தொ ழித்தன்று இந்தியரைப் புலிகள்

அனுப்பிட ஆயுதம் வழங்கியது அறிந்தும்

மழித்த சிரசுகொள் மதவெறி பிடித்த

மனிதம் தொலைத்தோர்க் கஞ்சுவதும் ஏனோ?

இத்தகை ஏதுக்கள் நாமறிந்த போதினிலும்

இவ்வுலகத் தவர்தம்மை நம்புதல் முறையோ?

மெத்தவுமே நினைப்போம் தலைவன்சேர் மறவர்கள்

மேதினியில் எமக்கென மிளிரும் மேதாவிகள்.

எத்தகைய மீட்சியும் எம்மினத்தால் மட்டுமே

எண்ணத்திற் பதித்திடுவீர் புலம்பெயர் தமிழினமே!

சத்தமிட்டு உரற்றிநின்று சார்ந்த நாடுகளின்

தலைமைக்கு நிலமைதனை எடுத்துரைத் திடுவீர்!.

-கனடாவிலிருந்து பவித்திரா-

நெறிதவறா நடுநிலமை பேணுதலாய்க் காட்டி

நெடுந்தூரப் பயணத்தில் நேரம் கழிக்கின்றார்

நேரம் கழிப்பதும் ஒருவிதத்தில் ஓர் போரியல் உத்தியே. ஆனால் நடுநிலமை நிற்கும்போது நேரம் கழிவது தவிர்க்கமுடியாதது.

இத்தகை ஏதுக்கள் நாமறிந்த போதினிலும்

இவ்வுலகத் தவர்தம்மை நம்புதல் முறையோ?

மெத்தவுமே நினைப்போம் தலைவன்சேர் மறவர்கள்

மேதினியில் எமக்கென மிளிரும் மேதாவிகள்.

எத்தகைய மீட்சியும் எம்மினத்தால் மட்டுமே

எண்ணத்திற் பதித்திடுவீர் புலம்பெயர் தமிழினமே!

சத்தமிட்டு உரற்றிநின்று சார்ந்த நாடுகளின்

தலைமைக்கு நிலமைதனை எடுத்துரைத் திடுவீர்!.

அது தான் புலம் பெயர்ந்த எங்களால் இலகுவாக ஆனால் கட்டாயமாக செய்ய வேண்டிய ஒன்று.