ஞாயிற்றுகிழமை, யூன் 5, 2011

இறுதிப் போரின் போது இடம்பெற்ற மனிதப் பேரவலத்தைப் பற்றி பிரிட்டனின் "சனல்4" தொலைக்காட்சி ஒருமணி நேர ஆவணப்படத்தைத் தயாரித்திருந்தது. அனைத்துலக மன்னிப்புச் சபையின் ஏற்பாட்டில் நேற்றுமுன்தினம் இந்த ஆவணப்படம் ஐ.நா. மனித உரிமைகள் சபையில் காண்பிக்கப்பட்டது. பலநாடுகளின் தூதர்கள் அதனைப் பார்த்துக் கண்ணீர் விட்டுக் கலங்கினர். அதில் இடம்பெற்றிருந்த பல காட்சிகளைத் தம்மால் பார்க்க முடியவில்லை என்று கூறினர். பலர் திகைத்தே போயினர்.

.

ஆவணப்படம் காட்சிப்படுத்தப்பட்ட போது இலங்கையின் பிரதிநிதியாகக் கலந்து கொண்டிருந்த பிரதி சட்டமா அதிபர் ஏ.எம்.டி.நவாஸ், அந்தக் காட்சிகள் பொய்யானவை என்று பின்னர் கலந்துரையாடலில் மறுத்தார். அந்த வீடியோ நம்பகத்தன்மையற்றது என்றார்.

.

ஆனால், கலந்துரையாடலுக்குத் தலைமை வகித்த அனைத்துலக மன்னிப்புச் சபையின் ஆசிய பிராந்திய பணிப்பாளர், போர்க் குற்றங்கள் என்று திட்டவட்டமாகத் தெரிவிக்கக்கூடிய குற்றங்களில் இலங்கை அரசு ஈடுபட்டுள்ளது என்பதை இந்த ஆவணப்படம் உறுதிப்படுத்துவதாகத் தெரிவித்தார்.

.

"அனைத்துலக மனித உரிமைச் சட்டங்களும் மனிதாபிமானச் சட்டங்களும் மீறப்பட்டுள்ளன என்பது தெளிவாகிறது. வைத்தியசாலைகள் போன்ற இடங்கள் மீது மீண்டும் மீண்டும் ஷெல் தாக்குதல்கள் நடத்தப்பட்டுள்ளன. ஒரு தடவை இரண்டு தடவைகள் அல்ல. 65 தடவைகள் நடத்தப்பட்டுள்ளன'' என்றார்.

.

ஆவணப்படத்தைப் பார்வையிட்ட பின்னர் கருத்துத் தெரிவித்த மனித உரிமைகள் சபைக்கான அமெரிக்கா தூதர் எலீன் டொனாகோ, "போர்க் குற்றச்சாட்டுக்களுக்குப் பொறுப்புக்கூற வேண்டிய அவசியத்தை மீண்டும் ஒரு தடவை இது நிரூபித்துள்ளது'' என்றார்.

.

"ஐ.நா. நிபுணர் குழுவின் அறிக்கைக்கு ஆக்கபூர்வமான வகையில் பதிலளிக்குமாறு இலங்கை அரசிடம் நாம் வலியுறுத்து கிறோம். இலங்கை மக்களின் நல்லிணக்கத்துக்கும் குற்றச்சாட்டுக்களுக்குப் பொறுப்புக் கூறுவதற்குமான அடுத்த கட்ட நடவடிக்கைகள் குறித்து கொழும்பு சிந்திக்க வேண்டும்'' என்றும் அவர் தெரிவித்தார்.

.

இலங்கையில் நல்லிணக்கம் பற்றி அரசு கூறிவருகின்ற போதும், வடக்கு மக்களின் சார்பில் பேசவல்லவர்களிடம் கேட்டால் அங்கு "எதுவுமே நடக்கவில்லை'' என்பதை அறிய முடியும் என்று காட்டமாகத் தெரிவித்தார் அனைத்துலக மன்னிப்புச் சபையைச் சேர்ந்த பீற்றர் பிலின்டர்.

My link